ମା’ର ଯତ୍ନ ନେବାକୁ ବଡ ଘର ନୁହେଁ ବରଂ ବିଶାଳ ହୃଦୟ ଆବଶ୍ୟକ, ଏଭଳି କାହିଁକି କହିଲେ ସୁପ୍ରିମକୋର୍ଟ ଜାଣନ୍ତୁ
ନୂଆଦିଲ୍ଲୀ: ଜଣେ ମାଆର ଯତ୍ନ ନେବା ପାଇଁ ବଡ଼ ଘର ନୁହେଁ ବରଂ ବିଶାଳ ହୃଦୟ ଆବଶ୍ୟକ ହୋଇଥାଏ | ଜଣେ ବୃଦ୍ଧ ମହିଳାଙ୍କ ପୁଅ ତାଙ୍କର ସେବା ନକରିବା ମାମଲାର ଶୁଣାଣି ବେଳେ ସୁପ୍ରିମକୋର୍ଟ ଏହି ରାୟ ଦେଇଛନ୍ତି | ବୃଦ୍ଧ ମହିଳାଙ୍କ ଝିଅମାନେ କୋର୍ଟରେ ଆବେଦନ କରିଥିଲେ ଯେ ସେମାନଙ୍କ ଭାଇ ମା’ର ଯତ୍ନ ନେଉନାହାଁନ୍ତି, ତେଣୁ ମା’ଙ୍କ ଦାୟିତ୍ୱ ସେମାନଙ୍କୁ ଦିଆଯିବା ଉଚିତ | ଝିଅମାନେ କହିଛନ୍ତି ଯେ ତାଙ୍କ ଭାଇ, ମା’ଙ୍କର ସମ୍ପତ୍ତିକୁ ନିଜ ନାମରେ କରିନେଇଛନ୍ତି, କିନ୍ତୁ ମା’ଙ୍କର ଯତ୍ନ ନେଉ ନାହାଁନ୍ତି | ଏହାକୁ ନେଇ କୋର୍ଟ ନିର୍ଦ୍ଦେଶ ଦେଇଛନ୍ତି ଯେ ବର୍ତ୍ତମାନ ମହିଳାଙ୍କ ସ୍ଥାବର ବା ଅସ୍ଥାବର ସମ୍ପତ୍ତି ପୁଅକୁ ହସ୍ତାନ୍ତର କରାଯିବ ନାହିଁ। ଏହା ବ୍ୟତୀତ କୋର୍ଟ ମଙ୍ଗଳବାର ସୁଦ୍ଧା ପୁଅର ଜବାବ ମାଗିଛନ୍ତି।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ମୁତାବକ ବୃଦ୍ଧା ଜଣକ ଡିମେନ୍ସିଆରେ ପୀଡିତ ହୋଇଥିବାବେଳେ ତାଙ୍କ ଝିଅମାନେ ମା’ଙ୍କ ଦାୟିତ୍ୱ ନେବାକୁ ନିର୍ଦ୍ଦେଶ ଦେବାକୁ କୋର୍ଟରେ ଯାଚିକା ଦାଖଲ କରିଥିଲେ | ଆଜି କୋର୍ଟ କହିଛନ୍ତି ଯେ ବର୍ତ୍ତମାନ ଝିଅମାନେ ମାଆର ଦାୟିତ୍ୱ ତୁଲାଇବା ଉଚିତ୍ | ଏହାକୁ ନେଇ ମହିଳାଙ୍କ ପୁଅର ଓକିଲ ଶୋଏବ କୁରେଶି କହିଥିଲେ ଯେ ଝିଅମାନେ ସେମାନଙ୍କ ଶାଶୂଘରେ ରହୁଥିବାବେଳେ ମା’ଙ୍କୁ ରଖିବା ପାଇଁ ପର୍ଯ୍ୟାପ୍ତ ସ୍ଥାନ ନାହିଁ |
ଏହାକୁ ନେଇ ବିଚାରପତି କହିଥିଲେ ଯେ ମା’ଙ୍କୁ ରଖିବା ପାଇଁ କେତେ ସ୍ଥାନ ଅଛି ତାହା କଥା ନୁହେଁ, କିନ୍ତୁ ପ୍ରଶ୍ନ ହେଉଛି ମା’ର ଯତ୍ନ ନେବାକୁ କେତେ ହୃଦୟ ଅଛି?’ ଜଷ୍ଟିସ୍ ଡିୱାଇ ଚନ୍ଦ୍ରଚୁଡ଼ ଏବଂ ଜଷ୍ଟିସ ସୂର୍ଯ୍ୟକାନ୍ତଙ୍କ ଖଣ୍ଡପୀଠ ଏହି ରାୟ ଦେଇଛନ୍ତି | ବୃଦ୍ଧ ମହିଳାଙ୍କ ଝିଅ ପୁଷ୍ପା ତିୱାରୀ ଏବଂ ଗାୟତ୍ରୀ କୁମାର ମାର୍ଚ୍ଚରେ ଏକ ଆବେଦନ କରିଥିଲେ ଯେ ସେମାନଙ୍କ ମା’ଙ୍କୁ ଫେବୃଆରୀରେ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ଏହା ପରେ ତାଙ୍କ ଭାଇ ସେମାନଙ୍କ ମା’ଙ୍କୁ ଏକ ଅଜ୍ଞାତ ସ୍ଥାନରେ ରଖିଛନ୍ତି ଏବଂ ତାଙ୍କୁ ସାକ୍ଷାତ କରିବାକୁ ମଧ୍ୟ ଅନୁମତି ଦିଆଯାଉନାହିଁ |