ନୂଆଦିଲ୍ଲୀ: ଆମ୍ ଆଦମୀ ପାର୍ଟି (ଆପ୍‌) ସାଂସଦ ସ୍ବାତୀ ମାଲିୱାଲ ଦିଲ୍ଲୀ ମୁଖ୍ୟମନ୍ତ୍ରୀ କେଜ୍ରିୱାଲଙ୍କ ସହାୟକ ବିଭବ କୁମାରଙ୍କ ବିରୋଧରେ ଅଭିଯୋଗ କରିଥିଲେ। ଏହି ଘଟଣା ପରେ ଦିଲ୍ଲୀ ରାଜନୀତି ତେଜିବାରେ ଲାଗିଛି। ସ୍ବାତୀ ନିଜ ଦଳର ନେତାଙ୍କ ବିରୋଧରେ ଆକ୍ରମଣ ଏବଂ ଅସଦାଚରଣ ଅଭିଯୋଗ ଆଣିବା ଘଟଣାକୁ ଆପ ଭିତ୍ତିହୀନ ବୋଲି କହିଥିବା ବେଳେ ବିଭବ କୁମାରଙ୍କୁ ପୁଲିସ ଗିରଫ କରିଛି।

Advertisment

ତେବେ ଦିଲ୍ଲୀ ମହିଳା ଆୟୋଗ (ଡିସିଡବ୍ଲ୍ୟୁ)ର ଅଧ୍ୟକ୍ଷ ଥିବା ସ୍ବାତୀ ମାଲିୱାଲଙ୍କ ପଦ, ପଦବୀ ଓ ସମ୍ପତ୍ତି ବିଷୟରେ ଏକ ରିପୋର୍ଟ ପ୍ରକାଶ ପାଇଛି। ଚଳିତ ବର୍ଷ ଜାନୁଆରିରେ ରାଜ୍ୟସଭା ନିର୍ବାଚନରେ ​​ସ୍ବାତୀ ମାଲିୱାଲ ତାଙ୍କ ସମ୍ପତ୍ତିର ବିବରଣୀ ପ୍ରଦାନ କରିଥିଲେ।

ଏଥିରେ ଉଲ୍ଲେଖ ରହିଥିବା ସମ୍ପତ୍ତି ବିବରଣୀରୁ ସ୍ପଷ୍ଟ ହେଉଛି କି ସ୍ବାତୀ ୧୯,୨୨,୫୧୯ଟଙ୍କାର ସମ୍ପତ୍ତିର ମାଲିକାଣୀ। ଏଥିମଧ୍ୟରୁ ତାଙ୍କ ପାଖରେ ମାତ୍ର ୨୦,୦୦୦ ନଗଦ ଟଙ୍କା ଥିବା ବେଳେ ୩୨,୦୦୦ ବ୍ୟାଙ୍କରେ ଜମା ଅଛି। ଏଥିସହିତ ସେୟାର ବଜାରରେ ୮,୯୦,୮୧୧ଟଙ୍କା  ଓ ଏଲଆଇସି ୧୭, ୧୩୮ଟଙ୍କା ନିବେଶ କରିଛନ୍ତି ସ୍ବାତୀ।

ସ୍ବାତୀଙ୍କ  ନିବେଶ ପୋର୍ଟଫୋଲିଓରେ ଏସୀୟ ପେଣ୍ଟସ୍, ଫାଇନ୍ ଅର୍ଗାନିକ୍ସ, ପିଡିଲାଇଟ୍, ଟିସିଏସ୍, ଟାଇଟନ୍ ସହିତ ଅନ୍ୟାନ୍ୟ ସେୟାରରେ ରହିଛି।

ଏହା ବ୍ୟତୀତ ସ୍ବାତୀ ମାଲିୱାଲଙ୍କ ପାଖରେ ୬,୬୨,୪୫୦ ଟଙ୍କା ଅଳଙ୍କାର ରହିଛି। ୨୦୨୨-୨୩ ଆର୍ଥିକ ବର୍ଷରେ ସ୍ବାତୀ ଆୟକର ରିଟର୍ଣ୍ଣରେ ୨୪,୧୨,୪୭୦ ଟଙ୍କା ଆୟ ଘୋଷଣା କରିଥିଲେ। ଆଶ୍ଚର୍ଯ୍ୟର ବିଷୟ ଏତେ ସବୁ ସମ୍ପତ୍ତିର ମାଲିକାଣୀ ଥିବା ସ୍ବାତୀଙ୍କ ପାଖରେ ନିଜର କୌଣସି ଗାଡ଼ି ନାହିଁ।