ସ୍ୱିସ୍ ବ୍ୟାଙ୍କରେ କେତେ ଅଛି ଭାରତୀୟଙ୍କ କଳାଟଙ୍କା? କେନ୍ଦ୍ର ସରକାରଙ୍କୁ ୩୩ ଲକ୍ଷ ଆକାଉଣ୍ଟର ତଥ୍ୟ ଦେଲେ ସ୍ୱିଜରଲାଣ୍ଡ ସରକାର
ନୂଆଦିଲ୍ଲୀ: ବିଦେଶରେ ଗଚ୍ଛିତ ଥିବା କଳାଧନ ବିରୋଧରେ କେନ୍ଦ୍ର ସରକାରଙ୍କୁ ଆଜି ଆଉ ଏକ ସଫଳତା ମିଳିଛି । କଳାଧନକୁ ନେଇ ସ୍ୱିଜରଲାଣ୍ଡ ସହ ହୋଇଥିବା ଚୁକ୍ତି ମୁତାବକ ସ୍ୱିସ୍ ବ୍ୟାଙ୍କରେ ଥିବା ଭାରତୀୟ ଖାତା ଧାରକଙ୍କ ତୃତୀୟ ତାଲିକା ପ୍ରକାଶ ପାଇଛି । ଭାରତକୁ ସ୍ୱିଜରଲାଣ୍ଡ ସରକାର ପ୍ରାୟ ୩୩ ଲକ୍ଷ ଆକାଉଣ୍ଟର ବିବରଣୀ ଦେଇଛନ୍ତି | ଏନେଇ ସ୍ୱିଜରଲାଣ୍ଡ ସରକାର କହିଛନ୍ତି କି ଏହି ତାଲିକାରେ ୯୬ଟି ଦେଶର ୩୩ ଲକ୍ଷ ଖାତା ଧାରକଙ୍କ ସୂଚନା ଦିଆଯାଇଛି ।
Sambad is now on WhatsApp
Join and get latest news updates delivered to you via WhatsApp
ସ୍ୱିଜରଲାଣ୍ଡର ସଂଘୀୟ କର ପ୍ରଶାସନ(ଏଫଟିଏ) ମୁତାବକ ଚଳିତ ବର୍ଷ ଅଧିକ ୧୦ଟି ଦେଶକୁ ସେମାନଙ୍କ ଖାତା ଧାରକଙ୍କ ବାବଦରେ ସୂଚନା ଦିଆଯାଇଛି । ଏହା ମଧ୍ୟରେ ଆଣ୍ଟିଗ୍ରୁଆ, ବାରବୁଡା, ଅଜରବୈଜାନ, ଡୋମିନିକା, ଘାନା, ଲେବନାନ, ମକାଓ, ପାକିସ୍ତାନ, କତାର, ସମୋଆ ଓ ବୁଆତୁ ଅଛନ୍ତି । ଏହାପୂର୍ବରୁ ୨୦୧୯ ସେପ୍ଟେମ୍ବର ମାସରେ ବି ସ୍ୱିଜରଲାଣ୍ଡ ସରକାର ୭୫ଟି ଦେଶର ଖାତା ଧାରକଙ୍କ ନାମ ସେୟାର କରିଥିଲା ।
ଆସନ୍ତା ୨୦୨୨ ସେପ୍ଟେମ୍ବର ମାସରେ ପୁଣି ଥରେ ସ୍ଵିସ ବ୍ୟାଙ୍କ ପକ୍ଷରୁ ଆଉ କିଛି ଖାତାଧାରକଙ୍କ ତଥ୍ୟ ଦିଆଯିବ ବୋଲି କୁହାଯାଇଛି | ଅନ୍ୟପଟେ ୨୬ଟି ଦେଶ ସ୍ୱିଜରଲାଣ୍ଡ ସହ ସୂଚନା ସେୟାର କରିଥିବା ବେଳେ ସ୍ୱିଜରଲାଣ୍ଡ ସରକାର ନିଜ ତରଫରୁ କୌଣସି ସୂଚନା ସେୟାର କରିନାହିଁ । ଅନୁମାନ କରାଯାଉଛି କି ତଥ୍ୟ ସୁରକ୍ଷା କାରଣରୁ ୧୪ଟି ଦେଶକୁ ସ୍ୱିଜରଲାଣ୍ଡ ସୂଚନା ଦେବାକୁ ମନା କରିଛି । ଏହାସହ ୧୨ଟି ଦେଶ ଜାଣିଶୁଣି ସୂଚନା ପ୍ରାପ୍ତ ନକରିବାକୁ ସହମତି ପ୍ରକାଶ କରିଛନ୍ତି ।