ତାଇପେଈ : ତାଇଓ୍ବାନ ଅଂଚଳରେ ଉତ୍ତେଜନା ସାମାନ୍ୟ ହ୍ରାସ ପାଇଥିଲେ ବି ଚୀନର ସାମରିକ କାର୍ଯ୍ୟକଳାପ ଜାରି ରହିଛି । ଚୀନର ଗୁପ୍ତଚର ଡ୍ରୋନ ଗୁଡ଼ିକ ତାଇଓ୍ବାନ ଉପରେ ଉଡ଼ୁଥିବାରୁ ତାଇଓ୍ବାନ ସରକାର ଚିନ୍ତାରେ ପଡ଼ିଯାଇଛନ୍ତି । ବିଶେଷକରି ଚୀନର ଡ୍ରୋନଗୁଡ଼ିକ ତାଇଓ୍ବାନର ସାମରିକ ପ୍ରତିଷ୍ଠାନ ଓ ସେନାଛାଉଣୀ ଉପରେ ଉଡ଼ି ଫଟୋ ଉଠାଉଥିବାରୁ ତାଇଓ୍ବାନର ସୁରକ୍ଷା ପ୍ରତି ବିପଦ ବଢିଯାଇଛି । ଏହାକୁ ଦୃଷ୍ଟିରେ ରଖି ଚୀନ ଡ୍ରୋନଗୁଡ଼ିକୁ ଦେଖିବା ମାତ୍ରେ ଗୁଳିକରି ଖସେଇଦେବାକୁ ତାଇଓ୍ବାନ ସେନା ନିର୍ଦ୍ଦେଶ ଦେଇଛି । ଏପରିକି ବଡ଼ ଡ୍ରୋନ ହେଲେ ରକେଟ୍ ମାରି ଖସେଇ ଦେବାକୁ ନିର୍ଦ୍ଦେଶ ଦିଆଯାଇଛି । ଏହି ନିର୍ଦ୍ଦେଶ କାର୍ଯ୍ୟକାରୀହେଲେ ଉତ୍ତେଜନା ପୁଣି ବଢିବାର ସମ୍ଭାବନା ରହିଛି ।
Sambad is now on WhatsApp
Join and get latest news updates delivered to you via WhatsApp
ଗତ ଶନିବାର ଦିନ ଚୀନର ଡ୍ରୋନଗୁଡ଼ିକ ତାଇଓ୍ବାନର କିନମେନଠାରେ ଥିବା ଏକ ସୈନ୍ୟ ଚୌକି ଉପରେ ଉଡ଼ି ଫଟୋ ଉଠାଇଥିଲେ । ଚୀନ ଡ୍ରୋନକୁ ଦେଖିବାପରେ ତାଇଓ୍ବାନ ସୈନିକମାନେ ଚେତାବନୀ ସୂଚକ ଫାୟାର କରିଥିଲେ । ଏହା ପରେ ଡ୍ରୋନଗୁଡ଼ିକ ପଳାଇଯାଇଥିଲେ । ତେବେ ବାରମ୍ବାର ଚୀନ ଡ୍ରୋନଗୁଡ଼ିକ ସୀମା ଲଙ୍ଘନ କରୁଥିବାରୁ ତାଇଓ୍ବାନ ସେନାର ଚିନ୍ତା ବଢିଯାଇଛି । ଏଣିକି ଚେତାବନୀ ସତ୍ତ୍ବେ ଯଦି ଡ୍ରୋନଗୁଡ଼ିକ ଅନୁପ୍ରବେଶ କରନ୍ତି ତେବେ ସେଗୁଡ଼ିକୁ ପ୍ରଥମେ ଚେତାବନୀ ଦିଆଯିବ, ତଥାପି ନମାନିଲେ ଗୁଳି କରି ଖସାଇଦିଆଯିବାକୁ ସେନାକୁ ନିର୍ଦ୍ଦେଶ ଦିଆଯାଇଛି ବୋଲି ତାଇଓ୍ବାନ ସେନାର କିନମେନ ଡିଫେନ୍ସ କମାଣ୍ଡ ପକ୍ଷରୁ କୁହାଯାଇଛି ।