ତାଇପେଈ : ଆମେରିକାର ଆଉ ଏକ ସଂସଦୀୟ କମିଟି ତାଇଓ୍ବାନ ଗସ୍ତ କରିବା ପରେ ଚୀନ ରକ୍ତମୁଖା ହୋଇଯାଇଛି । ସୋମବାର ସଂଧ୍ୟାରେ ଚୀନର ୩୦ଟି ଲଢୁଆ ବିମାନ ଓ ୫ଟି ଯୁଦ୍ଧ ଜାହାଜ ତାଇଓ୍ବାନକୁ ଘେରିଯାଇଥିବା ତାଇଓ୍ବାନର ପ୍ରତିରକ୍ଷା ମନ୍ତ୍ରାଳୟ କହିଛି ।
Sambad is now on WhatsApp
Join and get latest news updates delivered to you via WhatsApp
ମନ୍ତ୍ରାଳୟର ସୂଚନା ଅନୁସାରେ ତାଇଓ୍ବାନ ବାୟୁସୁରକ୍ଷା ଚିହ୍ନଟ ଜୋନ ଅତିକ୍ରମଣ କରିଥିବା ୩୦ଟି ଚୀନ ବିମାନ ମଧ୍ୟରୁ ୮ଟି ସୁଖୋଇ-୩୦ ଲଢୁଆ ବିମାନ, ୪ଟି ସେନୟାଙ୍ଗ ଜେ-୧୬ ବିମାନ, ଦୁଇଟି ସେନୟାଙ୍ଗ ଜେ-୧୧ ବିମାନ ଓ ୧୪ଟି ଅନ୍ୟ କେତେକ ଚୀନ ନିର୍ମିତ ବିମାନ ଅନ୍ତର୍ଭୁକ୍ତ । ସେହିପରି ତାଇଓ୍ବାନର ଉତ୍ତର-ପୂର୍ବ ଦିଗରେ ଚୀନର ଏକ ଜେଡି-୯ ହେଲିକପ୍ଟର ଉଡ଼ୁଥିବା ତାଇଓ୍ବାନ ଠାବ କରିଛି । ଚୀନର ମୁକାବିଲା କରିବାକୁ ତାଇଓ୍ବାନ ପକ୍ଷରୁ କେତେକ ଲଢୁଆ ବିମାନ ଓ ଏୟାର ଡିଫେନ୍ସ ସିଷ୍ଟମ ମୁତୟନ କରାଯାଇଥିଲା ।
ସୂଚନାଯୋଗ୍ୟ ଯେ, ଗତ ରବିବାରଦିନ ସିନେଟର ଏଡ୍ ମାର୍କେଙ୍କ ନେତୃତ୍ବରେ ଏହି ୫ ଜଣିଆ ସଂସଦୀୟ ଦଳ ତାଇପେଈରେ ପହଞ୍ଚି ତାଇଓ୍ବାନର ବିଭିନ୍ନ ରାଜନୈତିକ ଦଳର ମୁଖ୍ୟମାନଙ୍କୁ ଭେଟି ତାଇଓ୍ବାନର ସୁରକ୍ଷା ସଂପର୍କରେ ଆଲୋଚନା କରିଛନ୍ତି । ଏହି ବୈଠକ ଅବସରରେ ତାଇଓ୍ବାନର ଡେମୋକ୍ରାଟିକ୍ ପ୍ରୋଗ୍ରେସିଭ ଦଳ (ଡିପିପି) ସହ ଉକ୍ତ ଆମେରିକୀୟ ସାଂସଦମାନେ ଏକ ବୈଠକ କରିଥିଲେ । ଏହାକୁ ନେଇ ଚୀନ ସରକାରଙ୍କ ପକ୍ଷରୁ ତୀବ୍ର ପ୍ରତିକ୍ରିୟା ପ୍ରକାଶ କରାଯାଇଥିଲା ଓ ପୁଣି ଥରେ ଯୁଦ୍ଧାଭ୍ୟାସ ଆରମ୍ଭ ପାଇଁ ଧମକ ଦିଆଯାଇଥିଲା ।