ଚୀନର ଡ୍ରୋନ ଖସାଇବାକୁ ଏହି ‘ଗନ୍’ ବ୍ୟବହାର କରୁଛି ତାଇଓ୍ବାନ ସେନା
ତାଇପେଈ : ତାଇଓ୍ବାନ ପକ୍ଷରୁ ଚୀନର ଏକ ଗୁପ୍ତଚର ଡ୍ରୋନ ଖସାଇଦିଆଯିବା ପରେ ଦୁଇ ପକ୍ଷ ମଧ୍ୟରେ ଉତ୍ତେଜନା ଆହୁରି ବଢିଯାଇଛି । ଏହା ସତ୍ତ୍ବେ ଚୀନର ଆହୁରି ଅଧିକ ସଂଖ୍ୟକ ଡ୍ରୋନ ତାଇଓ୍ବାନରେ ଅନୁପ୍ରବେଶ କରୁଛନ୍ତି । ଏହା ପରେ ତାଇଓ୍ବାନ ସେନା ମଧ୍ୟ ଏସବୁ ଡ୍ରୋନଗୁଡ଼ିକ ବିରୋଧରେ ଅଭିଯାନକୁ ତୀବ୍ର କରିଛି । ଚୀନର ଡ୍ରୋନକୁ ଖସାଇବାକୁ ତାଇଓ୍ବାନ ସେନା ଏକ ସ୍ବତନ୍ତ୍ର ପ୍ରକାରର ଆଣ୍ଟି-ଡ୍ରୋନ ଗନ୍ ବ୍ୟବହାର କରୁଛି । ଏହା ଗନ ହୋଇଥିଲେ ବି ଏଥିରୁ କୌଣସି ଗୁଳି ବାହାରେ ନାହିଁ ବରଂ ଏକ ସ୍ବତନ୍ତ୍ର ଫ୍ରିକ୍ବେନ୍ସିର ଲେଜର ରଶ୍ମି ବାହାରେ । ଏହି ଗନ ଡ୍ରୋନକୁ ନିୟନ୍ତ୍ରଣ କରୁଥିବା ଗ୍ରାଉଣ୍ଡ ଷ୍ଟେସନ ଛାଡ଼ୁଥିବା ଫ୍ରିକ୍ବେନ୍ସିକୁ ଜାମ କରିଦିଏ । ଫଳରେ ଗ୍ରାଉଣ୍ଡ ଷ୍ଟେସନ ଏହି ଡ୍ରୋନ ଉପରୁ ନିୟନ୍ତ୍ରଣ ହରାଏ । ଡ୍ରୋନଟି ନିୟନ୍ତ୍ରଣ ବାହାରକୁ ଚାଲିଯିବା ପରେ ତଳେ ପଡ଼ିଯାଏ ଅଥବା ଅଚଳ ହୋଇ ଘୂରିବୁଲେ ।
Sambad is now on WhatsApp
Join and get latest news updates delivered to you via WhatsApp
ଗତ ଗୁରୁବାରଦିନ ତାଇଓ୍ବାନର କିନମେନ ଦ୍ବୀପ ନିକଟରେ ଅନୁପ୍ରବେଶ କରିଥିବା ଚୀନର ଡ୍ରୋନକୁ ତାଇଓ୍ବାନ ସେନାର କିନମେନ ଡିଫେନ୍ସ କମାଣ୍ଡ ପକ୍ଷରୁ ଗୁଳିକରି ଖସାଇଦିଆଯାଇଥିଲା । ତାଇଓ୍ବାନ ସେନା ପକ୍ଷରୁ ପ୍ରଥମେ ଚେତାବନୀ ଦିଆଯିବା ପରେ ଡ୍ରୋନକୁ ଗୁଳି କରି ଖସାଇ ଦିଆଯାଇଥିଲା ।
ଚୀନର ଡ୍ରୋନଗୁଡ଼ିକ ତାଇଓ୍ବାନର ସାମରିକ ପ୍ରତିଷ୍ଠାନ ଓ ସେନାଛାଉଣୀ ଉପରେ ଉଡ଼ି ଫଟୋ ଉଠାଉଥିବାରୁ ତାଇଓ୍ବାନର ସୁରକ୍ଷା ପ୍ରତି ବିପଦ ବଢିଯାଇଛି । ଏହାକୁ ଦୃଷ୍ଟିରେ ରଖି ଚୀନ ଡ୍ରୋନଗୁଡ଼ିକୁ ଦେଖିବା ମାତ୍ରେ ଗୁଳିକରି ଖସେଇଦେବାକୁ ତାଇଓ୍ବାନ ସେନା ନିର୍ଦ୍ଦେଶ ଦେଇଛି ।