ହୈରାତ ଓ କାନ୍ଦାହାରରେ ଥିବା ଭାରତୀୟ ଦୂତାବାସରେ ପଶି ଜରୁରୀ କାଗଜପତ୍ର ନେଇଗଲା ତାଲିବାନ
କାବୁଲ: ଆଫଗାନିସ୍ତାନ ଦଖଲ କରିବା ପରେ ଏବେ ତାଲିବାନ ତା’ର ଅସଲ ରୂପ ଦେଖାଇବାରେ ଲାଗିଛି । ଅନ୍ତର୍ଜାତୀୟ ଗଣମାଧ୍ୟମର ରିପୋର୍ଟ ମୁତାବକ ତାଲିବାନ ଯୋଦ୍ଧାମାନେ କାନ୍ଦାହାର ଓ ହୈରାତରେ ବନ୍ଦ ଥିବା ଭାରତୀୟ ଦୂତାବାସର ତାଲା ଭାଙ୍ଗି ଭିତରକୁ ପଶିଥିଲେ । ସେଠାରେ ସେମାନେ ଅଫିସରେ ଥିବା ବିଭିନ୍ନ ଦସ୍ତାବିଜ ଯାଞ୍ଚ କରିବା ସହ କିଛି କାଗଜପତ୍ର ଧରି ବାହାରକୁ ଆସିଥିଲେ । ଅଫିସ ଆଗରେ ଥିବା କିଛି କାରକୁ ବି ସେମାନେ ନେଇଯାଇଥିବା ଜଣାପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ଏହାକୁ ନେଇ ଭାରତୀୟ ଅଧିକାରୀ କହିଛନ୍ତି କି, ତାଲିବାନ ଯେଉଁ ପ୍ରତିଜ୍ଞା କରିଥିଲା ଏବେ ତାହାର ବିପରୀତ ଦିଗରେ କାମ କରୁଛି । ସେ ଭାରତୀୟ ଓ ଅନ୍ୟ ଦେଶର ନାଗରିକଙ୍କର କୌଣସି କ୍ଷତି କରିବ ନାହିଁ ବୋଲି ଆଶ୍ୱସନା ଦେଇ ଏବେ ଭାରତୀୟ ଦୂତାବାସରେ ପଶି କାଗଜପତ୍ର ଓ ଗାଡ଼ି ନେଇଯିବା ଘଟଣା ଭାରତକୁ ବ୍ୟଥିତ କରିଛି ।
ସେପଟେ ତାଲିବାନର ବରିଷ୍ଠ ନେତା ମହମ୍ମଦ ଆବାସ ଆଫଗାନିସ୍ତାନରେ ଅବସ୍ଥାପିତ ଭାରତୀୟ ଅଧିକାରୀଙ୍କ ନିକଟରେ ପହଞ୍ଚି ଦୂତାବାସ ବନ୍ଦ ନକରିବାକୁ ଅନୁରୋଧ କରିଥିଲା । ତାଲିବାନୀମାନଙ୍କ ପକ୍ଷରୁ ଭାରତୀୟଙ୍କ ଉପରେ କୌଣସି ବିପଦ ନଥିବା କଥା ସେ କହିଥିଲେ । ହେଲେ ଗୁରୁବାର ଦିନ ତାଲିବାନୀମାନେ ଆଫଗାନିସ୍ତାନ ଓ ଭାରତ ମଧ୍ୟରେ ବାଣିଜ୍ୟିକ ସଂପର୍କ ଛିନ୍ନ ହେବା ପରେ ଏପରି କାଣ୍ଡ କରିଛନ୍ତି ।