ନୂଆଦିଲ୍ଲୀ: ପ୍ରଫେଟ ମହମ୍ମଦଙ୍କ ବିରୋଧରେ ଦୁଇ ବିଜେପି କର୍ମକର୍ତ୍ତାଙ୍କ ଆପତ୍ତିଜନକ ମନ୍ତବ୍ୟକୁ ନେଇ ଇସଲାମିକ୍ ଦେଶ ଏବଂ ବିଶେଷ କରି ଉପସାଗରୀୟ ରାଷ୍ଟ୍ରମାନଙ୍କ ମଧ୍ୟରେ ଅସନ୍ତୋଷ ବ୍ୟାପିବାରେ ଲାଗିଛି। ଏଭଳି ଟିପ୍ପଣୀର ନିନ୍ଦା କରିବା ସହିତ କାର୍ଯ୍ୟାନୁଷ୍ଠାନ ଲାଗି ସେମାନେ ଭାରତ ସରକାର ଉପରେ ଚାପ ପକାଇବା ଆରମ୍ଭ କରିଦେଇଛନ୍ତି। ପ୍ରଫେଟ ମହମ୍ମଦ ବିରୋଧୀ ଏହି ମନ୍ତବ୍ୟକୁ ନେଇ ଏବେ ତାଲିବାନ ମଧ୍ୟ ଭାରତ ସରକାରଙ୍କୁ ଉପଦେଶ ଦେବା ଆରମ୍ଭ କରିଦେଇଛି। ଆଫଗାନିସ୍ତାନରେ ମହିଳାମାନଙ୍କୁ ନିଜର ଅଧିକାରରୁ ବଞ୍ଚିତ କରୁଥିବା ଏବଂ ଅନେକ ଲୋକଙ୍କ ଜୀବନ ନେଇସାରିଥିବା ତାଲିବାନ ଏବେ ଭାରତ ସରକାରଙ୍କୁ ଉପଦେଶ ଦେବା ଖବର ଚର୍ଚ୍ଚାରେ ରହିଛି।
Sambad is now on WhatsApp
Join and get latest news updates delivered to you via WhatsApp
ଦୁଇ ବିଜେପି କର୍ମକର୍ତ୍ତାଙ୍କ ଆପତ୍ତିଜନକ ମନ୍ତବ୍ୟକୁ ନିନ୍ଦା କରି ତାଲିବାନର ମୁଖପାତ୍ର ଜାବିହୁଲ୍ଲା ମୁଜାହିଦ୍ କହିଛନ୍ତି ଯେ ଆମେ ଭାରତ ସରକାରଙ୍କୁ ଅନୁରୋଧ କରୁଛୁ ଯେ ଭାରତ ସରକାର ଧର୍ମାନ୍ଧମାନଙ୍କୁ ଇସଲାମ ଭଳି ପବିତ୍ର ଧର୍ମର ଅପମାନିତ କରିବାକୁ ଏବଂ ମୁସଲମାନମାନଙ୍କ ଭାବନାକୁ ଉତ୍ତେଜିତ କରିବାକୁ ଦିଅନ୍ତୁ ନାହିଁ। ଆମେ ଏହାକୁ କଡ଼ା ଶବ୍ଦରେ ନିନ୍ଦା କରୁଛୁ।
ତେବେ କେବଳ ତାଲିବାନ ନୁହନ୍ତି ଇରାକ୍, ଇରାନ, କୁଏତ, କତର, ଓମାନ, ସାଉଦି ଆରବ, ୟୁଏଇ, ଜର୍ଡାନ, ଆଫଗାନିସ୍ତାନ, ମାଳଦୀପ, ବାହରିନ୍, ଲିବ୍ୟା ଏବଂ ଇଣ୍ଡୋନେସିଆ ଭଳି ଦେଶ ଦୁଇ ବିଜେପି କର୍ମକର୍ତ୍ତାଙ୍କ ଆପତ୍ତିଜନକ ମନ୍ତବ୍ୟକୁ ନେଇ ଭାରତ ସରକାରଙ୍କୁ ସମାଲୋଚନା କରିଛନ୍ତି।
ଅନ୍ୟପକ୍ଷରେ ନିଜର ଏଭଳି ମନ୍ତବ୍ୟ ପାଇଁ ଦୁଇ ବିଜେପି କର୍ମକର୍ତ୍ତାଙ୍କୁ ନିଲମ୍ବିତ କରାଯାଇଥିଲେ ବି ବିବାଦ ଥମିବାର ନାଁ ନେଉନାହିଁ।