ଆଫଗାନ ସେନା ଉପରେ ଆକ୍ରମଣ ଜାରି ରହିବ : ତାଲିବାନ
କାବୁଲ : ଯୁଦ୍ଧ ବିଧ୍ୱସ୍ତ ଆଫଗାନିସ୍ତାନରେ ଶାନ୍ତି ପ୍ରତିଷ୍ଠା ପାଇଁ ଗତ ଶନିବାରଦିନ ହୋଇଥିବା ଚୁକ୍ତି ବିଫଳ ହେବା ଆଶଙ୍କା ଦେଖାଦେଇଛି । ତାଲିବାନ ଓ ଆଫଗାନିସ୍ତାନ ସରକାରଙ୍କ ମଧ୍ୟରେ ବିବାଦ ବଢିଚାଲିଥିବାରୁ ଉଭୟ ପକ୍ଷ ଏହି ସର୍ତ୍ତମାନିବା ନେଇ ଆଶଙ୍କା ଦେଖାଦେଇଛି ।
ସୋମବାରଦିନ ତାଲିବାନ ପକ୍ଷରୁ କୁହାଯାଇଛି ଯେ କେବଳ ବିଦେଶୀ ସୈନିକମାନଙ୍କ ଉପରେ କୌଣସି ଆକ୍ରମଣ ହେବ ନାହିଁ, କିନ୍ତୁ ସରକାରୀ ଆଫଗାନ ସୈନ୍ୟମାନଙ୍କ ଉପରେ ଆକ୍ରମଣ ଜାରି ରହିବ । ବନ୍ଦୀ ଥିବା ତାଲିବାନ ଲୋକମାନଙ୍କୁ ଛାଡ଼଼ିବାକୁ ଆଫଗାନ ସରକାର ଘୋଷଣା କରିବାର ଦିନକ ପରେ ତାଲିବାନ ନିଜର ଅଭିମୁଖ୍ୟ ସ୍ପଷ୍ଟ କରିଛି ।
Sambad is now on WhatsApp
Join and get latest news updates delivered to you via WhatsApp
ଗତ ଶନିବାରଦିନ କାତାରର ଦୋହାଠାରେ ସ୍ୱାକ୍ଷରିତ ଏହି ଚୁକ୍ତି ଅନୁସାରେ ଆସନ୍ତା ୧୪ ମାସ ମଧ୍ୟରେ ଆମେରିକା ଆଫଗାନିସ୍ତାନରୁ ନିଜର ସମସ୍ତ ସୈନ୍ୟ ଅପସାରଣ କରିବ । ପ୍ରଥମ ପର୍ଯ୍ୟାୟରେ ଆସନ୍ତା ୧୩୫ ଦିନ (ସାଢେ ୪ ମାସ) ମଧ୍ୟରେ ଆମେରିକା ନିଜର ପ୍ରାୟ ୮୬୦୦ ସୈନ୍ୟଙ୍କୁ ଅପସାରଣ କରିବ । ତେବେ ଏହି ସୈନ୍ୟ ଅପସାରଣ ତାଲିବାନର ଆଚରଣ ଉପରେ ନିର୍ଭର କରିବ । ଯଦି ଶାନ୍ତି ରକ୍ଷା ପାଇଁ ତାଲିବାନ ଦେଇଥିବା ପ୍ରତିଶ୍ରୁତି ପୂରଣ ନକରେ ତେବେ ସୈନ୍ୟ ଅପସାରଣ ସଂପର୍କରେ ପୁନର୍ବିଚାର କରାଯିବ । ଅନ୍ୟପକ୍ଷରେ ଏହି ଚୁକ୍ତି ମାଧ୍ୟମରେ ନିଆଯାଇଥିବା ନିଷ୍ପତ୍ତି ଅନୁସାରେ ଆମେରିକା ସେନା ପକ୍ଷରୁ ବନ୍ଦୀ କରାଯାଇଥିବା ପ୍ରାୟ ୫ ହଜାର ଲୋକଙ୍କୁ ମୁକ୍ତ କରାଯିବ ।