ବସୁନ୍ଧରା ବିଜେପି ପ୍ରତି ବିଦ୍ରୋହୀ ମନୋଭାବ ପ୍ରଦର୍ଶନ କରୁଥିବା ନେଇ ଚର୍ଚ୍ଚା: କାହିଁକି କଲେନି ପ୍ରଚାର ?

ଜୟପୁର: ରାଜସ୍ଥାନର ପୂର୍ବତନ ମୁଖ୍ୟମନ୍ତ୍ରୀ ତଥା ବରିଷ୍ଠ ବିଜେପି ନେତା ବସୁନ୍ଧରା ରାଜେଙ୍କୁ ଚଳିତ ଲୋକସଭା ନିର୍ବାଚନ ସମୟରେ ଦେଖିବାକୁ ମିଳି ନ ଥିଲା। ଆସନ୍ତାକାଲି ଅର୍ଥାତ୍ ସୋମବାର ଦିନ ପଞ୍ଚମ ପର୍ଯ୍ୟାୟ ନିର୍ବାଚନ ଅନୁଷ୍ଠିତ ହେବ କିନ୍ତୁ ସେ ତାଙ୍କ ପୁଅ ଦୁଷ୍ୟନ୍ତ ସିଂଙ୍କ ବ୍ୟତୀତ ଦଳର କୌଣସି ନିର୍ବାଚନ ପ୍ରଚାରରେ ଭାଗ ନେଇଥିବାର ଦେଖାଯାଇ ନାହିଁ। ରାଜନୈତିକ ବିଶେଷଜ୍ଞମାନେ ଏହାକୁ ରାଜେଙ୍କ ବିଦ୍ରୋହୀ ମନୋଭାବ ବୋଲି କହିଛନ୍ତି।

ଏବେ ଏହାକୁ ନେଇ ଚର୍ଚ୍ଚା ଆରମ୍ଭ ହୋଇଛି। ବସୁନ୍ଧରା ରାଜେଙ୍କୁ ବିଜେପିର ଜଣେ ଫାୟାରବ୍ରାଣ୍ଡ ନେତା ଭାବେ ଦେଖାଯାଉଛି। ବିଜେପି ନିର୍ବାଚନ ପ୍ରଚାରରେ ବସୁନ୍ଧରା ରାଜେଙ୍କ ଅନୁପସ୍ଥିତି ନେଇ ଅନେକ ପ୍ରଶ୍ନ ଉଠିଛି।

ରାଜସ୍ଥାନରେ ମୁଖ୍ୟମନ୍ତ୍ରୀଙ୍କ ନାମ ଚୂଡ଼ାନ୍ତ ହେବା ପରଠାରୁ ବିଜେପି ନେତୃତ୍ୱ ସହ ରାଜେଙ୍କ ଅସନ୍ତୋଷ ଜାରି ରହିଛି। ରାଜସ୍ଥାନରେ ବିଧାନସଭା ନିର୍ବାଚନରେ ​​ବହୁ ସଂଖ୍ୟାରେ ବିଜୟୀ ହୋଇଥିବା ବିଜେପି ଭଜନ ଲାଲଙ୍କୁ ମୁଖ୍ୟମନ୍ତ୍ରୀ କରିବାକୁ ନିଷ୍ପତ୍ତି ନେଇଥିଲା। ଯେତେବେଳେ କି ବସୁନ୍ଧରା ରାଜେ ନିଜେ ମଧ୍ୟ ସିଏମ୍ ପଦ ପାଇଁ ପ୍ରତିଦ୍ୱନ୍ଦ୍ୱୀ ଥିଲେ। ଦୁଷ୍ୟନ୍ତ ସିଂ ଝାଲାୱାର ଆସନରୁ ପ୍ରତିଦ୍ୱନ୍ଦ୍ୱିତା କରୁଛନ୍ତି ଏବଂ ଏହି ଆସନର ସେ ସିଟିଂ ସାଂସଦ ମଧ୍ୟ ଅଛନ୍ତି। ରାଜେ କେବଳ ତାଙ୍କ ପୁଅଙ୍କ ସମର୍ଥନରେ ପ୍ରଚାର କରିଛନ୍ତି।