ଚାଲାଣ କଟିବାରୁ ରାସ୍ତା ମଝିରେ ସ୍ତ୍ରୀ ଓ ପିଲାମାନଙ୍କ ସହ ବସିଗଲେ ଟାକ୍ସି ଚାଳକ
ନୂଆଦିଲ୍ଲୀ : ନୂଆ ମୋଟରଯାନ ଆଇନ୍ ଲାଗୁ ହେବା ପରଠାରୁ ଦେଶର ବିଭିନ୍ନ କୋଣରେ ଚାଲାଣ କଟିବାର ଦୃଶ୍ୟ ସାମ୍ନାକୁ ଆସିଥିଲା । ଭାରୀ ଜରିମାନା ଲାଗିବା ପରେ କିଏ ଗାଡ଼ି ଛାଡ଼ି ପଳାଉଥିଲା ତ କିଏ ନିଜ ଗାଡ଼ିରେ ନିଆଁ ଲଗାଇ ଦେଉଥିଲା । ଏବେ ଦ୍ୱାରକା ସେକ୍ଟର-୧ରେ ସେଭଳି ଏକ ଘଟଣା ଘଟିଛି । ଚାଲାଣ କଟିବାରୁ ଜଣେ ଟାକ୍ସି ଚାଳକ ନିଜ ପରିବାର ସହ ରାସ୍ତା ମଝିରେ ଧାରଣାରେ ବସି ପଡ଼ିଥିଲେ, ଯାହା ଦ୍ୱାରା କିଛି ସମୟ ପର୍ଯ୍ୟନ୍ତ ରାସ୍ତା ଜାମ୍ ହୋଇ ଯାଇଥିଲା ବୋଲି ଜଣାପଡ଼ିଛି । ପରିସ୍ଥିତି ଅସମ୍ଭାଳ ହେବା ପରେ ବରିଷ୍ଠ ପୁଲିସକର୍ମୀ ସେଠାରେ ପହଞ୍ଚି ସମସ୍ୟାର ସମାଧାନ କରିଥିଲେ ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଅକ୍ଟୋବର ୨ରେ ଟାକ୍ସି ଚାଳକ ମନୀଷ ନିଜ ଗାଡ଼ି ନେଇ ସିଗ୍ନାଲ ପାର୍ କରୁଥିବା ବେଳେ ଟ୍ରାଫିକ୍ ପୁଲିସ ତାଙ୍କୁ ଅଟକାଇ ତାଙ୍କର ଚାଲାଣ କାଟିଥିଲେ । ରେଡ୍ ଲାଇଟ୍ ହେବା ପରେ ସିଗ୍ନାଲ ପାର୍ କରିଥିବାରୁ ଟ୍ରାଫିକ ପୁଲିସ ତାଙ୍କର ଚାଲାଣ କାଟିଥିବା ବେଳେ ରେଡ୍ ଲାଇଟ୍ ହେବାର ୭ସେକେଣ୍ଟ ପୂର୍ବରୁ ସିଗ୍ନାଲ ପାର୍ କରିଥିବା କଥା କହିଥିଲେ ମନୀଷ। ଟ୍ରାଫିକ ପୁଲିସ କିଛି ନ ଶୁଣିବାରୁ ସେ ପୁଲିସ ଷ୍ଟେସନରେ ଅଭିଯୋଗ ଦେଇ ଘରକୁ ଫେରିଥିଲେ । କିନ୍ତୁ ପୁଲିସ କୌଣସି କାର୍ଯ୍ୟାନୁଷ୍ଠାନ ନ ନେବାରୁ ରବିବାର ସକାଳେ ନିଜ ପରିବାର ସହ ରାସ୍ତା ମଝିରେ ଆସି ବସି ଧାରଣା ଦେଇଥିଲେ ମନୀଷ । ଧିରେ ଧିରେ ରାସ୍ତା ଜାମ୍ ହେବାରୁ ପୁଲିସକର୍ମୀ ତାଙ୍କୁ ବୁଝାଇ ଉଠାଇବାକୁ ଚେଷ୍ଟା କରିଥିଲେ । କିନ୍ତ ନ୍ୟାୟ ନ ମିଳିବା ପର୍ଯ୍ୟନ୍ତ ଉଠିବି ନାହିଁ ବୋଲି କହିଥିଲେ ମନୀଷ । ପ୍ରାୟ ୧ଘଣ୍ଟା ପରେ ବରିଷ୍ଠ ପୁଲିସକର୍ମୀ ଘଟଣାସ୍ଥଳରେ ପହଞ୍ଚି ନ୍ୟାୟ ଦେବା ପାଇଁ ପ୍ରତିଶ୍ରୁତି ଦେବାରୁ ମନୀଷ ରାସ୍ତାରୁ ଉଠିବାକୁ ରାଜି ହୋଇଥିଲେ ବୋଲି ଜଣାପଡ଼ିଛି ।