କର୍ମଚାରୀଙ୍କୁ ମାଗଣା କରୋନା ଟିକା ଦେବେ ଏହି ୩ଟି ଆଇଟି କମ୍ପାନି

ନୂଆଦିଲ୍ଲୀ: କରୋନା ମହାମାରୀ ମଧ୍ୟରେ ନିଜ କର୍ମଚାରୀ ଏବଂ ସେମାନଙ୍କ ପରିବାରକୁ କରୋନା ଟିକା ଦେବାର ଦାୟିତ୍ବ ହାତକୁ ନେଇଛନ୍ତି ୩ଟି ଆଇଟି କମ୍ପାନି। ନିଜ କର୍ମଚାରୀଙ୍କୁ କରୋନା ମୁକ୍ତ ରଖିବା ପାଇଁ ଟିସିଏସ, ଇନଫୋସିସ ଏବଂ ଆସେନଚର ପକ୍ଷରୁ ମାଗଣା କରୋନା ଟିକା ଦିଆଯିବ ବୋଲି ଜଣାପଡ଼ିଛି। କର୍ମଚାରୀଙ୍କ ସହ ସେମାନଙ୍କ ପରିବାର ସଦସ୍ୟ ମଧ୍ୟ ଏହାର ଲାଭ ଉଠାଇ ପାରିବେ।

କୋଭିଡ-୧୯ ମହାମାରୀ ଆରମ୍ଭରୁ, ଆମେ ଆମର ସମସ୍ତ ସହଯୋଗୀ ତଥା ସେମାନଙ୍କ ପରିବାରର ଯତ୍ନ ନେବା ସହ ଚିକିତ୍ସା ଉପରେ ଧ୍ୟାନ ଦେଇଛୁ। ଏଥିରେ କୋଭିଡ ପରୀକ୍ଷା ଏବଂ ଚିକିତ୍ସା ଅନ୍ତର୍ଭୁକ୍ତ। ଭାରତର ବିଭିନ୍ନ ସ୍ଥାନରେ ମାଗଣା ସଙ୍ଗରୋଧ କେନ୍ଦ୍ର, ମାଗଣା ପରୀକ୍ଷା ଶିବିର ସ୍ଥାପନ, କରୋନା ପରୀକ୍ଷା ସହ ଡାକ୍ତରଖାନାଗୁଡ଼ିକରେ ପ୍ରାଥମିକ ଚିକିତ୍ସା ବ୍ୟବସ୍ଥା କରାଇଥଲୁ। ସଂକ୍ରମଣ ବଢ଼ୁଥିବା ସମୟରେ ଆମେ ଯେମିତି ଆମ କର୍ମଚାରୀଙ୍କ ଯତ୍ନ ନେଇଥଲୁ, ଟିକାକରଣ ପର୍ଯ୍ୟାୟରେ ମଧ୍ୟ ଏହା ଜାରି ରହିବ ବୋଲି ଟିସିଏସ୍ ମୁଖପାତ୍ର କହିଛନ୍ତି।

ସେହିଭଳି ଇନଫୋସିସର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ପ୍ରବୀଣ ରାଓ କହିଛନ୍ତି ଯେ, ଆମ କର୍ମଚାରୀ ଏବଂ ସେମାନଙ୍କ ପରିବାରକୁ ଭାରତ ସରକାର ଦେଇଥିବା ନିର୍ଦ୍ଦେଶାବଳୀ ଅନୁଯାୟୀ ଏବଂ ଅନୁମୋଦିତ ପ୍ରକ୍ରିୟା ଏବଂ ସମୟସୀମା ଅନୁଯାୟୀ ଟିକା ଦେବା ପାଇଁ ଇନଫୋସିସ୍ ସ୍ବାସ୍ଥ୍ୟ ସେବା ପ୍ରଦାନକାରୀ ସଂସ୍ଥା ସହ ସହଭାଗିତା ନେଇ ଚେଷ୍ଟା ଆରମ୍ଭ କରିଛି। ସ୍ୱାସ୍ଥ୍ୟ ଏବଂ ସୁସ୍ଥତା ଉପରେ ଆମର ଧ୍ୟାନର ଏକ ଅଂଶ ଭାବରେ ଇନଫୋସିସ୍, କର୍ମଚାରୀ ଏବଂ ସେମାନଙ୍କ ପରିବାର ପାଇଁ ଟିକାକରଣ ଖର୍ଚ୍ଚ ବହନ କରିବ।

ଅନ୍ୟପକ୍ଷରେ ଆସେନଚରର ଚେୟାରମ୍ୟାନ୍ ତଥା ବରିଷ୍ଠ ପରିଚାଳନା ନିର୍ଦ୍ଦେଶକ ରେଖା ଏମ୍ ମେନନ୍ କହିଛନ୍ତି ଯେ, କର୍ମଚାରୀଙ୍କ ସ୍ୱାସ୍ଥ୍ୟ ଏବଂ କଲ୍ୟାଣ ଅପେକ୍ଷା ଆମ ପାଇଁ କିଛି ଗୁରୁତ୍ୱପୂର୍ଣ୍ଣ ନୁହେଁ। ଭାରତରେ ଆସେନଚରରେ ଆମେ ଆନ୍ତର୍ଜାତୀୟ ସ୍ୱାସ୍ଥ୍ୟ ସଂଗଠନ ଏବଂ ସ୍ଥାନୀୟ ସ୍ୱାସ୍ଥ୍ୟ କର୍ତ୍ତୃପକ୍ଷଙ୍କ ସମେତ ବାହ୍ୟ ବିଶେଷଜ୍ଞ ଏବଂ ଗୋଷ୍ଠୀର ମାର୍ଗଦର୍ଶନ ଉପରେ ନଜର ରଖିବା ଏବଂ ବିଚାର କରିବା ଜାରି ରଖିଛୁ।