ମୁଁ ଚା ବ୍ୟବସ୍ଥା କରିବା ପାଇଁ ପିଅନ ନୁହେଁ: ଏଡିଓ

ନୂଆଦିଲ୍ଲୀ: ଗତଶୁକ୍ରବାର ଉତ୍ତରପ୍ରଦେଶର ହାପୁଡ଼ରେ ଏକ ସରକାରୀ ସାମ୍ବାଦିକ ସମ୍ମିଳନୀରେ ଚା ପରଷା ଯିବାକୁ ନେଇ ହାପୁଡ଼ର ବିଜେପି ବିଧାୟକ ବିଜୟପାଲ ଆଢ଼ତି ଏବଂ ପଞ୍ଚାୟତ ସହାୟକ ଉନ୍ନୟନ ଅଧିକାରୀ (ଏଡିଓ) ବିଶନ ସକ୍ସେନାଙ୍କ ମଧ୍ୟରେ କଥା କଟାକଟି ହୋଇଥିଲା। 

ସରକାରୀ ସାମ୍ବାଦିକ ସମ୍ମିଳନୀରେ ଏଡିଓ ବିଶନ ସକ୍ସେନା ଚା ବ୍ୟବସ୍ଥା କରିବାକୁ ମନା କରି ଦେଇଥିଲେ। ଏହି ଘଟଣାକୁ କେନ୍ଦ୍ର କରି ଜିଲ୍ଲା ମାଜିଷ୍ଟ୍ରେଟ୍ ବିଶନ ସକ୍ସେନାଙ୍କୁ ଗଢ଼ମୁକ୍ତେଶ୍ୱରକୁ ବଦଳି କରିବା ସହିତ ବିଧାୟକଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଦାବି କରିଛନ୍ତି।

ଉତ୍ତରପ୍ରଦେଶ ସରକାରଙ୍କ ୮ ବର୍ଷ ପୂରଣ ଅବସରରେ ଆୟୋଜିତ ସାମ୍ବାଦିକ ସମ୍ମିଳନୀ ଶେଷ ହେବାପରେ, ବ୍ଲକ ଉନ୍ନୟନ ଅଧିକାରୀ ଶ୍ରୁତି ସିଂହ ବିଧାୟକଙ୍କୁ ଯିବା ପୂର୍ବରୁ ଚା ପାଇଁ ନିମନ୍ତ୍ରଣ କରିଥିଲେ। ଯେତେବେଳେ ଚା ବିଳମ୍ବ ହେଲା, ଆଢ଼ତିଙ୍କ ଜରୁରୀ କାମ ଥିବା କହି ଶୀଘ୍ର ଚା ଆଣିବାକୁ ଅନୁରୋଧ କରିଥିଲେ। 

ବିଡିଓ ଶ୍ରୁତି ସିଂହ ସକ୍ସେନାଙ୍କୁ ଚା ପରିବେଷଣରେ ବିଳମ୍ବର କାରଣ ବିଷୟରେ ପଚାରିଥିଲେ। ଏଥିରେ ସକ୍ସେନା ରାଗି  ଯାଇ କହିଥିଲେ, "ମୁଁ ଥରେ ଚା ପରିବେଷଣ କରିସାରିଛି। ମୁଁ ସାରା ଦିନ ଚା ପରିବେଷଣ କରିବା ଉଚିତ କି? ଯଦି ରାଷ୍ଟ୍ରପତି ଏବଂ ମୁଖ୍ୟମନ୍ତ୍ରୀ ଆସିଥାନ୍ତେ, ତେବେ ବି ମୁଁ ସେମାନଙ୍କୁ ଏତେ ଥର ଚା ପରିବେଷଣ କରି ନଥାନ୍ତି।"

ଘଟଣା ପରେ, ଡିଏମ୍ ସକ୍ସେନାଙ୍କୁ ହାପୁଡ଼ରୁ ଗଢ଼ ବ୍ଲକକୁ ବଦଳି କରିବାକୁ ନିର୍ଦ୍ଦେଶ ଦେଇଥିଲେ। ଏଥିସହିତ ବିଧାୟକ ଆଢ଼ତି କହିଛନ୍ତି, "ଏହା ଯଥେଷ୍ଟ ନୁହେଁ। ମୁଁ ଏହି ମାମଲାକୁ ମୁଖ୍ୟମନ୍ତ୍ରୀଙ୍କ ନିକଟକୁ ନେଇଯିବି। ବିଡିଓ ଏବଂ ଏଡିଓ ଉଭୟଙ୍କ ବିରୋଧ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଉଚିତ।"

ଏହି ଘଟଣାକୁ ନେଇ  ବିଶନ ସକ୍ସେନା ପ୍ରତିକ୍ରିୟା ଦେଇ ନିଜର ପକ୍ଷ ରଖି କହିଛନ୍ତି, "ମୁଁ ବିଧାୟକଙ୍କଠାରୁ ବଡ଼ ଏବଂ ମୋର ଏକ ସରକାରୀ ପଦବୀ ଅଛି - ମୁଁ ଚା ବ୍ୟବସ୍ଥା କରିବା ପାଇଁ ପିଅନ ନୁହେଁ। ଆମେ ତାଙ୍କୁ ଥରେ ଚା ପରିବେଷଣ କରିଥିଲୁ, କିନ୍ତୁ ସେ ପୁଣି ଥରେ ଚା ମାଗିଥିଲେ। ଏହା ବ୍ୟତୀତ, ବିଧାୟକ ମୋ ସହିତ ଉଚ୍ଚ  ସ୍ୱରରେ କଥା ହୋଇଥିଲେ।"