ଭୂତାଣୁ ଥିବା କହି ଗହମ କିଣିବାକୁ ମନା କରିଥିବା ଦେଶ ଏବେ ଭାରତରୁ କିଣିବ ଚା’
ନୂଆଦିଲ୍ଲୀ: ଉତ୍ତର ଭାରତରେ ଚା’ର ମୂଲ୍ୟ ବୃଦ୍ଧି ଏବଂ ଶ୍ରୀଲଙ୍କାରେ ଚାଲିଥିବା ଅର୍ଥନୈତିକ ସଙ୍କଟ ଯୋଗୁଁ ବିଦେଶୀ କ୍ରେତା ଏବେ ଚା’ପତି କିଣିବାକୁ କୋଚି ଆଡକୁ ମୁହାଁଇଛନ୍ତି। ବର୍ତ୍ତମାନ ବିଦେଶୀ କ୍ରେତାମାନେ କୋଚିରୁ ଅଧିକ ମାତ୍ରାରେ ଚା’ପତି କିଣୁଥିବା ଜଣାପଡ଼ିଛି। ଭାରତରୁ ଚା’ପତି କିଣୁଥିବା ଦେଶ ମଧ୍ୟରେ ଇରାନ ଏବଂ ତୁର୍କୀ ଅନ୍ତର୍ଭୁକ୍ତ।
Sambad is now on WhatsApp
Join and get latest news updates delivered to you via WhatsApp
ନିକଟରେ ତୁର୍କୀ ଭାରତରୁ ପଠାଯାଇଥିବା ଗହମକୁ ଫେରାଇ ଦେଇଥିଲା। ସେଥିରେ ରୁବେଲା ଭୂତାଣୁ ଥିବା କହି ତୁର୍କୀ ଏହି ନିଷ୍ପତ୍ତି ନେଇଥିଲା। ଗହମକୁ ମନା କରିଥିବା ତୁର୍କୀ ବର୍ତ୍ତମାନ ଚା’ପତି କିଣିବା ପାଇଁ ଭାରତୀୟ ବଜାର ଆଡକୁ ମୁହାଁଇଛି। ‘ବିଜନେସ୍ ଲାଇନ୍’ର ରିପୋର୍ଟ ଅନୁଯାୟୀ, ନୀଳଗିରି ଚା’ପତିର ଏବେ ଭଲ ଚାହିଦା ଅଛି। ଏହା ସହିତ ମୂଲ୍ୟ ମଧ୍ୟ ବୃଦ୍ଧି ପାଇଛି। ଚା’ପତିର ହାରାହାରି ମୂଲ୍ୟ କିଲୋଗ୍ରାମ ପିଛା ୪ଟଙ୍କା ବୃଦ୍ଧି ପାଇ ୧୫୯ଟଙ୍କା ହୋଇଛି।
ଏହି ସମୟରେ, ଗୋଡି ଚା’ର ମୂଲ୍ୟ ୩ରୁ ୫ଟଙ୍କା ବୃଦ୍ଧି ପାଇ ୧୨୭ଟଙ୍କା ପର୍ଯ୍ୟନ୍ତ ପହଞ୍ଚିଛି। ଗତ ସପ୍ତାହ ତୁଳନାରେ ଏଥର କିଲୋଗ୍ରାମ ପିଛା ୬ ଟଙ୍କା ବୃଦ୍ଧି ଘଟିଛି। ଦକ୍ଷିଣ ଭାରତର ଏକ ଅଗ୍ରଣୀ ଚା’ ରପ୍ତାନିକାରୀ କହିଛନ୍ତି ଯେ ଇରାନ ଏବଂ ଅନ୍ୟ ପଶ୍ଚିମ ଏସୀୟ ଦେଶ ଦକ୍ଷିଣ ଭାରତୀୟ ଏବଂ ଉତ୍ତର ଭାରତୀୟ ବଜାରରୁ ଚା’ କିଣୁଛନ୍ତି। ସର୍ବୋତ୍ତମ ଗୁଣବତ୍ତା ଗୋଡି ଚା’ର ମୂଲ୍ୟ ବୃଦ୍ଧି ସେମାନଙ୍କୁ ଦକ୍ଷିଣ ଭାରତୀୟ ଚା’ ବଜାର ଆଡ଼କୁ ଆକର୍ଷିତ କରିଛି।