ଶିକ୍ଷକ ପରିବାରକୁ ଗୁଳିକରି ହତ୍ୟା ମାମଲା: ମାସକ ପୂର୍ବରୁ ହତ୍ୟା ଯୋଜନା କରିଥିଲା

ଆମେଥି:  ଉତ୍ତରପ୍ରଦେଶର ଆମେଥିରେ ଜଣେ ଶିକ୍ଷକ, ତାଙ୍କ ପତ୍ନୀ ଓ ୨  ଶିଶୁକନ୍ୟାଙ୍କୁ ଗୁରୁବାର ହତ୍ୟା କରାଯାଇଛି। ଏହି ବର୍ବର ହତ୍ୟାକାଣ୍ଡ ଘଟାଇଥିବା ମୁଖ୍ୟ ଅଭିଯୁକ୍ତ ଚନ୍ଦନ ବର୍ମାକୁ ଆଜି ପୁଲିସ ଗିରଫ କରିଛି। ଚନ୍ଦନକୁ ଜେରା ଚାଲିଥିବା ବେଳେ ତା’ର ଫୋନ୍‌ରୁ ସେପ୍ଟେମ୍ବର ୧୨ ତାରିଖର ଏକ ହ୍ବାଟ୍ସଆପ୍‌ ଷ୍ଟାଟସ୍‌ର ସ୍କ୍ରିନସଟ୍‌ ମିଳିଛି। ଏହି ସ୍କ୍ରିନସଟ୍‌ରେ ଲେଖାଯାଇଛି, ୫ ଜଣ ମରିବାକୁ ଯାଉଛନ୍ତି, ମୁଁ ଖୁବ୍‌ଶୀଘ୍ର ଏହା ଦେଖାଇବି।  ପୁଲିସ ଅନୁଯାୟୀ, ଚନ୍ଦନ ବର୍ମାର ସ୍କ୍ରିନସଟ୍‌ ଏବଂ ପରବର୍ତ୍ତୀ ତଦନ୍ତରୁ ଜଣାପଡ଼ିଛି ଯେ ଚନ୍ଦନ ବର୍ମା ଶିକ୍ଷକ ଏବଂ ତାଙ୍କ ପରିବାର ସଦସ୍ୟଙ୍କୁ ହତ୍ୟା କରିବା ପରେ ନିଜେ ଆତ୍ମହତ୍ୟା କରିବା ଯୋଜନା କରିଥିଲା।

ଗୁଳିମାଡ଼ରେ ପ୍ରାଣ ହରାଇଥିବା ଶିକ୍ଷକ ହେଉଛନ୍ତି ସୁନୀଲ କୁମାର, ତାଙ୍କ ପତ୍ନୀ ପୁନମ ଭାରତୀ ଏବଂ ୨ ଝିଅ।  ୨ ଝିଅଙ୍କ ବୟସ ଯଥାକ୍ରମେ ୧ ଏବଂ ୬।  ଆମେଥି ସ୍ଥିତ ଭବାନୀ ନଗର ବାସଭବନରେ ସେମାନଙ୍କୁ ହତ୍ୟା କରାଯାଇଛି। ଭାରତୀ ଗତ ୨ ମାସ ତଳେ ଚନ୍ଦନ ବର୍ମା ବିରୋଧରେ ପୁଲିସରେ ଅଭିଯୋଗ କରିଥିଲେ।  ଭାରତୀ ଚନ୍ଦନ ବର୍ମା ବିରୋଧରେ ରୁଜୁ କରିଥିବା ଏତଲାରେ ଦର୍ଶାଇଥିଲେ ଯେ ଅଗଷ୍ଟ ୧୮ ତାରିଖରେ ସେ ରାଏବରେଲିରେ ଏକ ହସ୍ପିଟାଲ୍‌ ଯାଇଥିଲେ। ସେ ସମୟରେ ବର୍ମା ତାଙ୍କ ସହ ଦୁର୍ବ୍ୟବହାର କରିଥିଲେ। ସେ ଏହାର ବିରୋଧ କରିବାରୁ ଚନ୍ଦନ ବର୍ମା ତାଙ୍କୁ ଏବଂ ତାଙ୍କ ସ୍ବାମୀଙ୍କୁ ଚାପୁଡ଼ା ମାରିଥିଲା।  ସେ ମଧ୍ୟ ଭାରତୀଙ୍କୁ ଧମକ ଦେଇ କହିଥିଲା ଯେ ଯଦି ସେ ଉକ୍ତ ଘଟଣା ସଂକ୍ରାନ୍ତରେ ପୁଲିସରେ ଜଣାନ୍ତି ତେବେ ତାକୁ ହତ୍ୟା କରାଯିବ।  ଭାରତୀ ତାଙ୍କ ଏତଲା‌ରେ ମଧ୍ୟ ଏକଥା ଉଲ୍ଲେଖ କରିଥିଲେ।