ଶିବାଜୀଙ୍କୁ ନେଇ ବିବାଦୀୟ ମନ୍ତବ୍ୟ: ମହାରାଷ୍ଟ୍ର ରାଜ୍ୟପାଳଙ୍କ ବଦଳି ଦାବି କଲେ ଟିମ୍‌ ସିନ୍ଦେ ବିଧାୟକ ଗୋଷ୍ଠୀ

ମୁମ୍ବାଇ: ଛତ୍ରପତି ଶିବାଜୀ ମହାରାଜଙ୍କ ସଂପର୍କରେ ଟିପ୍ପଣି ଦେଇ ବିବାଦରେ ଛନ୍ଦି ହୋଇଯାଇଛନ୍ତି ମହାରାଷ୍ଟ୍ର ରାଜ୍ୟପାଳ। ମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କ ଗୋଷ୍ଠୀର ଶିବସେନା ବିଧାୟକ ସଞ୍ଜୟ ଗାଇକଓ୍ଵାଡ ସୋମବାର ଦାବୀ କରିଛନ୍ତି ଯେ ନିକଟରେ ଛତ୍ରପତି ଶିବାଜୀ ମହାରାଜଙ୍କ ସଂପର୍କରେ ଦେଇଥିବା ମନ୍ତବ୍ୟ ପାଇଁ ମହାରାଷ୍ଟ୍ର ରାଜ୍ୟପାଳ ଭଗତ ସିଂ କୋଶିଆରୀଙ୍କୁ ରାଜ୍ୟରୁ ଅନ୍ୟତ୍ର ସ୍ଥାନାନ୍ତର କରାଯାଉ।

ବୁଲଧାନା ବିଧାନସଭା ନିର୍ବାଚନମଣ୍ଡଳୀର ପ୍ରତିନିଧିତ୍ୱ କରୁଥିବା ଗାଇକଓ୍ଵାଡ ଦାବୀ କରିଛନ୍ତି ଯେ କୋଶିଆରୀ ମରାଠା ସାମ୍ରାଜ୍ୟର ପ୍ରତିଷ୍ଠାତାଙ୍କ ବିଷୟରେ ବିଭ୍ରାନ୍ତିକର ବିବୃତ୍ତି ଦେଇଛନ୍ତି ଏବଂ ଅତୀତରେ ମଧ୍ୟ ଏହିପରି ବିବୃତ୍ତି ଦେଇ ବିବାଦ ସୃଷ୍ଟି କରିଥିଲେ। ରାଜ୍ୟପାଳ ବୁଝିବା ଉଚିତ ଯେ ଛତ୍ରପତି ଶିବାଜୀ ମହାରାଜଙ୍କ ଆଦର୍ଶ କେବେ ପୁରୁଣା ହୁଏ ନାହିଁ ଏବଂ ତାଙ୍କୁ ଦୁନିଆର ଅନ୍ୟ କୌଣସି ମହାନ ବ୍ୟକ୍ତିଙ୍କ ସହ ତୁଳନା କରାଯାଇପାରିବ ନାହିଁ। କେନ୍ଦ୍ରରେ ଶାସନ କ୍ଷମତାରେ ଥିବା ବିଜେପି ନେତାମାନଙ୍କୁ ମୁଁ ଅନୁରୋଧ କରୁଛି ଯେ ଜଣେ ବ୍ୟକ୍ତି ଯିଏ ରାଜ୍ୟର ଇତିହାସ ସଂପର୍କରେ ଜାଣନ୍ତି ନାହିଁ ଏବଂ ରାଜ୍ୟପାଳ କିପରି କାର୍ଯ୍ୟ କରନ୍ତି ତାହା ଜାଣି ନାହାଁନ୍ତି, ତାଙ୍କୁ ଏଠାରୁ ଅନ୍ୟତ୍ର ସ୍ଥାନାନ୍ତର କରାଯାଉ।

ଗାଇକଓ୍ଵାଡ଼ ହେଉଛନ୍ତି ସିନ୍ଦେଙ୍କ ନେତୃତ୍ୱରେ ଦଳର ବାଲାସାହେବାଞ୍ଚି ଶିବସେନା ଗୋଷ୍ଠୀର ବିଧାୟକ ଯିଏ ଭାରତୀୟ ଜନତା ପାର୍ଟି (ବିଜେପି) ସହ ମିଳିତ ଭାବରେ ସରକାରଙ୍କୁ ପରିଚାଳନା କରୁଛନ୍ତି।

ଉଲ୍ଲେଖଯୋଗ୍ୟ, ମହାରାଷ୍ଟ୍ର ରାଜ୍ୟପାଳ ଭଗତ ସିଂ କୋଶିଆରି ଶନିବାର ଦିନ କହିଥିଲେ ଯେ ଛତ୍ରପତି ଶିବାଜୀ ମହାରାଜ ପୁରୁଣା ଦିନର ଏକ ଆଦର୍ଶ ଥିଲେ ଏବଂ ରାଜ୍ୟର ସାଂପ୍ରତିକ ଆଦର୍ଶଙ୍କ ବିଷୟରେ ଆଲୋଚନା କରୁଥିବା ବେଳେ ସେ ବାବାସାହେବ ଆମ୍ବେଦକର ଏବଂ କେନ୍ଦ୍ର ମନ୍ତ୍ରୀ ନୀତୀନ ଗଡକରୀଙ୍କ ନାମ ଉଲ୍ଲେଖ କରିଥିଲେ ଏବଂ ଏନସିପି ଏବଂ ଉଦ୍ଧବ ଠାକରେଙ୍କ ନେତୃତ୍ୱାଧୀନ ଶିବସେନା ଗୋଷ୍ଠୀକୁ ସମାଲୋଚନା କରିଥିଲେ।

ଔରଙ୍ଗାବାଦରେ ଆୟୋଜିତ ଏକ କାର୍ଯ୍ୟକ୍ରମରେ ବରିଷ୍ଠ ବିଜେପି ନେତା ଗଡକରୀ ଏବଂ ଏନସିପି ସଭାପତି ଶରଦ ପାୱାରଙ୍କୁ ଡି.ଲିଟ୍‌ ଡିଗ୍ରି ପ୍ରଦାନ କରିବା ପରେ ରାଜ୍ୟପାଳ ଏହି ମନ୍ତବ୍ୟ ଦେଇଥିଲେ।

ସମ୍ବନ୍ଧିତ ଖବର