ନୂଆଦିଲ୍ଲୀ: ଗଲୱାନ ଘାଟିରେ ଭାରତ ଏବଂ ଚୀନ୍ ସୈନ୍ୟଙ୍କ ଭିତରେ ଘଟିଥିବା ହିଂସାତ୍ମକ ଲଢେଇରେ ଭାରତ ତାର ୨୦ ସୁପୁତ୍ରଙ୍କୁ ହରାଇଥିଲା, ଯେଉଁଥିରେ ଥିଲେ ସହିଦ୍ ସନ୍ତୋଷ ବାବୁ । ଦେଶ ପାଇଁ ସେ ନିଜ ଜୀବନକୁ ବାଜି ଲଗାଇ ଥିବା ବେଳେ ଆଜି ତାଙ୍କର ଦେଶପ୍ରେମକୁ ଭିନ୍ନ ଢଙ୍ଗରେ ସମ୍ମାନ ଜଣାଇଛନ୍ତି ତେଲେଙ୍ଗାନା ସରକାର | ସହିଦ ହୋଇଥିବା କର୍ଣ୍ଣେଲ ସନ୍ତୋଷ ବାବୁଙ୍କ ପତ୍ନୀ ସନ୍ତୋଷୀଙ୍କୁ ତେଲେଙ୍ଗାନା ସରକାର ଉପଜିଲ୍ଲାପାଳ ପଦରେ ନିଯୁକ୍ତ କରିଛନ୍ତି। ମୁଖ୍ୟମନ୍ତ୍ରୀ କେ ଚନ୍ଦ୍ରଶେଖର ରାଓ ବୁଧବାର ସନ୍ତୋଷୀଙ୍କୁ ଏ ନେଇ ଏକ ସରକାରୀ ନିଯୁକ୍ତି ପତ୍ର ପ୍ରଦାନ କରିଥିବା ଜଣା ପଡିଛି । କେବଳ ହାଇଦ୍ରାବାଦ କିମ୍ବା ନିକଟବର୍ତ୍ତୀ ଅଞ୍ଚଳରେ ସହିଦଙ୍କ ପତ୍ନୀ ନିଯୁକ୍ତ କରିବାକୁ ମୁଖ୍ୟମନ୍ତ୍ରୀ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ବର୍ତ୍ତମାନ କର୍ଣ୍ଣେଲ ସନ୍ତୋଷ ବାବୁଙ୍କ ପତ୍ନୀ ସନ୍ତୋଷୀ ତାଙ୍କର ୮ ବର୍ଷର ଝିଅ ଏବଂ ୩ ବର୍ଷର ପୁଅ ସହିତ ଦିଲ୍ଲୀରେ ରହୁଛନ୍ତି । ସନ୍ତୋଷଙ୍କ ମା’ ହାଇଦ୍ରାବାଦରେ ରହୁଥିବାରୁ ହାଇଦ୍ରାବାଦ କିମ୍ବା ନିକଟବର୍ତ୍ତୀ ଅଞ୍ଚଳରେ ସହିଦଙ୍କ ପତ୍ନୀଙ୍କୁ ନିଯୁକ୍ତ କରିବାକୁ ମୁଖ୍ୟମନ୍ତ୍ରୀ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଥିବା ଜଣାପଡିଛି। ଏହାପୂର୍ବରୁ ତେଲେଙ୍ଗାନା ସରକାର କର୍ଣ୍ଣେଲ ସନ୍ତୋଷ ବାବୁଙ୍କ ପରିବାରକୁ ୫ କୋଟି ଟଙ୍କା ସହାୟତା ରାଶି ଘୋଷଣା କରିଥିଲେ।