ଆତ୍ମଘାତୀ ବୋମାଧାରୀ ମନ୍ଦିର, ଘର ଉଡ଼ାଇବାକୁ ଯୋଜନା କରିଥିଲା: ଏନ୍ଆଇଏ
ତାମିଲନାଡ଼ୁରେ ଚାଞ୍ଚଲ୍ୟ
କୋଏମ୍ବାଟୁର: ଗତ ରବିବାର କୋଏମ୍ବାଟୁରର ଏକ ମନ୍ଦିର ସାମନାରେ କାର୍ ବିସ୍ଫୋରଣରେ ମୃତ୍ୟୁବରଣ କରିଥିବା ୨୯ ବର୍ଷୀୟ ଇଂଜିନିୟର ସ୍ନାତକ ମୁବିନ ଜଣେ ଆତ୍ମଘାତୀ ଆକ୍ରମଣକାରୀ ଥିଲା। ତଦନ୍ତକାରୀ ଏଜେନ୍ସି ଏନ୍ଆଇଏର କହିବା ଅନୁସାରେ ଏହି ବୋମାକୁ ସମ୍ଭାଳିବାରେ ଅନୁଭବହୀନତା ଯୋଗୁ ମନ୍ଦିର ଓ ଆଖପାଖ ଇଲାକାରେ କୌଣସି ବଡ଼ କ୍ଷତି ହୋଇ ନାହିଁ। ଜଣେ ପ୍ରତ୍ୟକ୍ଷଦର୍ଶୀ ପୁଲିସକୁ କହିଛି ଯେ, ଦିୱାଲି ପୂର୍ବ ସନ୍ଧ୍ୟା ପରେ ଭୋର ୪ଟାରେ କୋଟ୍ଟେମେଡ଼ୁରେ ସଂଗମେଶ୍ବର ମନ୍ଦିର ସାମନାରେ ଏକ କାର ଅଟକିଥିଲା ଓ ସେଥିରେ ବିସ୍ଫୋରଣ ହୋଇଥିଲା।
Sambad is now on WhatsApp
Join and get latest news updates delivered to you via WhatsApp
ପୁଲିସର କହିବା ଅନୁସାରେ ଯଦି ବିସ୍ଫୋରକ ସହ କାର ଭିତରେ ଥିବା ଦୁଇଟି ଏଲ୍ପିଜି ସିଲିଣ୍ଡର ମଧ୍ୟରୁ ଗୋଟିଏ ବି ଫାଟିଥାନ୍ତା ତେବେ ବିସ୍ଫୋରଣ ଅଧିକ ଭୟାନକ ହୋଇଥାନ୍ତା ଏବଂ ପାଖଆଖ ଘର ଓ ମନ୍ଦିର ବି ଜଳିଯାଇଥାନ୍ତା। ମୁବିନ ଆଇଏସ୍ଆଇଏସ୍ର କଟ୍ଟରପନ୍ଥୀ ବିଚାରଧାରା ଦ୍ବାରା ପ୍ରଭାବିତ ହୋଇଥିଲା। ଏହି ମାମଲାରେ ଏ ପର୍ଯ୍ୟନ୍ତ ଛଅଜଣଙ୍କୁ ଗିରଫ କରାଯାଇଛି। ସମସ୍ତେ ଆଇଏସ୍ଆଇଏସ୍ ଆତଙ୍କବାଦୀ ସଂଗଠନ ଦ୍ବାରା ପ୍ରଭାବିତ ଓ ପରିଚାଳିତ ହେଉଥିଲେ। ସେମାନଙ୍କୁ ପଚରାଉଚରାରୁ ଜଣାପଡ଼ିଛି ଯେ ମୁବିନ ଜଣେ ଆତ୍ମଘାତୀ ବିସ୍ଫୋରଣକାରୀ ଥିଲା। ସେ ଭାବିଥିଲା ତା’ର ଆତ୍ମଘାତୀ ବିସ୍ଫୋରଣ ଦ୍ବାରା ୫୦ରୁ ୧୦୦ ମିଟର ଦୂରରେ ଥିବା ମନ୍ଦିର ଓ ଘରଗୁଡ଼ିକ କ୍ଷତିଗ୍ରସ୍ତ ହେବ।