ଗୁରୁଗ୍ରାମ: ଗୁରୁଗ୍ରାମରେ ଆଜି ଏକ ଅଭାବନୀୟ ଘଟଣାକ୍ରମରେ ଜଣେ ୨୫ ବର୍ଷୀୟା ରାଜ୍ୟସ୍ତରୀୟ ଟେନିସ ଖେଳାଳି ରାଧିକା ଯାଦବଙ୍କୁ ତାଙ୍କ ବାପା ଗୁଳିକରି ହତ୍ୟା କରିଛନ୍ତି। ଗୁରୁଗ୍ରାମ ସେକ୍ଟର ୫୭ ସ୍ଥିତ ନିଜ ବାସଭବନର ପ୍ରଥମ ମହଲାରେ ଆଜି ପୂର୍ବାହ୍ନ ପ୍ରାୟ ୧୦.୩୦ ସମୟରେ ରାଧିକାଙ୍କ ବାପା ତାଙ୍କୁ ଅତି ନିକଟରୁ ଗୁଳିକରି ହତ୍ୟା କରିଛନ୍ତି। ପ୍ରାଥମିକ ସୂଚନାନୁଯାୟୀ ରାଧିକାଙ୍କ ବାପା ତାଙ୍କ ଉପରକୁ ଲଗାତାର ୩ ରାଉଣ୍ଡ୍ ଗୁଳି ଚଳାଇଥିଲେ। ଯୁବ ଖେଳାଳିଙ୍କୁ ଏହାପରେ ଗୁରୁତର ଅବସ୍ଥାରେ ନିକଟସ୍ଥ ଘରୋଇ ହସ୍ପିଟାଲ୍ ନିଆଯାଇଥିଲା।
ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଯାଇଛି। ସେକ୍ଟର ୫୬ ପୁଲିସ ଷ୍ଟେସନ ଇନ୍ଚାର୍ଜ କହିଛନ୍ତି, ଆମେ ହସ୍ପିଟାଲରୁ ଖବର ପାଇଲୁ ଯେ ଜଣେ ୨୫ ବର୍ଷୀୟା ଯୁବତୀଙ୍କ ମୃତ୍ୟୁ ହୋଇଛି ଏବଂ ତାଙ୍କ ଶରୀରରେ ୩ଟି ଗୁଳି ବାଜିଛି। ଆମେ ଏହାପରେ ଯୁବତୀଙ୍କ କାକାଙ୍କୁ ଭେଟିଲୁ। କିନ୍ତୁ ସେ କିଛି କହିଲେ ନାହିଁ। ଏହାପରେ ଆମେ ଘଟଣାସ୍ଥଳରେ ପହଞ୍ଚିବା ପରେ ଜାଣିଲୁ ଯେ ଯୁବତୀଙ୍କ ବାପା ତାଙ୍କୁ ଗୁଳି କରିଛନ୍ତି। ମିଳିଥିବା ସୂଚନାନୁଯାୟୀ ଖେଳାଳିଙ୍କ ବାପା ତାଙ୍କ ରିଲ୍ସ ନିଶା ପାଇଁ ଭୀଷଣ ଅସନ୍ତୁଷ୍ଟ ଥିଲେ। ତେବେ ଝିଅ ରିଲ୍ ବନାଇବା ଜାରି ରଖିବାରୁ ସେ କ୍ରୋଧରେ ଏଭଳି କାଣ୍ଡ ଘଟାଇଥିବା କୁହାଯାଉଛି। ରାଧିକା ଯାଦବ ହେଉଛନ୍ତି ଜଣେ ରାଜ୍ୟସ୍ତରୀୟ ଟେନିସ ଖେଳାଳି ଏବଂ ସେ ଅନେକ ମେଡାଲ ଜିତିଛନ୍ତି। ସେ ଏକ ଟେନିସ ଏକାଡେମି ପରିଚାଳନା କରୁଛନ୍ତି ଏବଂ ସେ ଖେଳାଳିମାନଙ୍କୁ କୋଚିଂ ପ୍ରଦାନ କରୁଛନ୍ତି। ଟେନିସ ଖେଳାଳିଙ୍କ ବାପାଙ୍କୁ ପୁଲିସ ଗିରଫ କରିଛି। ଅପରାଧରେ ବ୍ୟବହାର ହୋଇଥିବା ରିଭଲ୍ଭର ମଧ୍ୟ ଜବତ ହୋଇଛି।