ନୂଆଦିଲ୍ଲୀ :  ରାଞ୍ଚି ଅଭିମୁଖେ ଉଡ଼ାଣ କରୁଥିବା ଏକ ଏୟାର ଇଣ୍ଡିଆ ଏକ୍ସପ୍ରେସ୍‌ ବିମାନର ଦିଗ ପରିବର୍ତ୍ତନ କରାଯାଇଛି। ବିମାନଟି ଆଜି ସନ୍ଧ୍ୟା ୬ଟା ୨୦ ସମୟରେ ରାଞ୍ଚିର ବିର୍ସା ମୁଣ୍ଡା ବିମାନବନ୍ଦରରେ ଅବତରଣ କରିବାର ଥିଲା। କିନ୍ତୁ ଶେଷ ମୁହୂର୍ତ୍ତରେ ଯାନ୍ତ୍ରିକ ତ୍ରୁଟି ପାଇଁ ଦିଲ୍ଲୀକୁ ଏହି ବିମାନର ଦିଗ ପରିବର୍ତ୍ତନ କରାଯାଇଥିଲା।  ଏୟାର ଇଣ୍ଡିଆ ଏକ୍ସପ୍ରେସ୍‌ ମୁଖପାତ୍ର ମଧ୍ୟ ଏନେଇ ସ୍ପଷ୍ଟୀକରଣ ଦେଇ କହିଛନ୍ତି ଯେ ଯାନ୍ତ୍ରିକ ତ୍ରୁଟି ସନ୍ଦେହ କରି ଏକ ବିମାନର ଦିଗ ପରିବର୍ତ୍ତନ କରାଯାଇଛି। ତେବେ ୩୬ ଘଣ୍ଟା ମଧ୍ୟରେ ଏହା ପଞ୍ଚମ ଘଟଣା।  ଏହା ପୂର୍ବରୁ ଏୟାର ଇଣ୍ଡିଆର ଏକ ବିମାନ ଆଜି ହଂକଂରୁ ଦିଲ୍ଲୀକୁ ଉଡ଼ାଣ କରୁଥିବାବେଳେ ଯାନ୍ତ୍ରିକ ତ୍ରୁଟି ଥିବା ସନ୍ଦେହ କରି ବିମାନର ପାଇଲଟ୍‌ ବିମାନକୁ ହଂକଂ ଫେରାଇ ନେଇଥିଲେ।   
ରବିବାର ବ୍ରିଟିସ ଏଫ୍‌-୩୧ ଯୁଦ୍ଧ ବିମାନ କେରଳରେ ଜରୁରୀ ଅବତରଣ କରିଥିଲା। ବିମାନରେ କମ୍‌ ଇନ୍ଧନ ଥିବା କାରଣରୁ କେରଳରେ ବିମାନର ଜରୁରୀ ଅବତରଣ କରାଯାଇଥିଲା। ଫ୍ରାଙ୍କଫର୍ଟରୁ ହାଇଦ୍ରାବାଦ ଅଭିମୁଖେ ଉଡ଼ାଣ କରୁଥିବା ଏକ ଲୁଫ୍‌ଥାନ୍‌ସା ବିମାନକୁ ମଝି ଆକାଶରେ ବୋମା ଧମକ ମିଳିବାପରେ ଏହା ଫେରି ଯାଇଥିଲା।  ସେହିପରି ୨୫୦ ହଜ୍‌ ଯାତ୍ରୀଙ୍କୁ ଧରି ଯାତ୍ରା କରୁଥିବା ଏକ ସାଉଦି ଏୟାରଲାଇନ୍ସ ବିମାନ ରବିବାର ସକାଳେ ଲକ୍ଷ୍ନୌର ଚୌଧୁରୀ ଚରଣ ସିଂହ ଅନ୍ତର୍ଜାତୀୟ ବିମାନବନ୍ଦରରେ ଅବତରଣ କରିବାପରେ ଏଥିରେ ଯାନ୍ତ୍ରିକ ତ୍ରୁଟି ଦେଖାଯାଇଥିଲା। ଏସ୍‌ଭି ୩୧୧୩ ବିମାନ ଶନିବାର ରାତି ୧୦ଟା ୪୫ରେ ଜେଦାରୁ ଲକ୍ଷ୍ନୌ ଅଭିମୁଖେ ଉଡ଼ାଣ କରିଥିଲା। ଏହା ରବିବାର ସକାଳ ପ୍ରାୟ ୬ଟା ୩୦ ସମୟରେ ଲ‌କ୍ଷ୍ନୌରେ ଅବତରଣ କରିଥିଲା।  ତେବେ ବିମାନ ଅବତରଣ କରିବା ସମୟ‌ରେ ବିମାନର ବାମ ଚକରୁ ଧୂଆଁ ବାହାରୁଥିବାର ଦେଖି ଆତଙ୍କ ଖେଳି ଯାଇଥିଲା। ପାଇଲଟ୍‌ ତୁରନ୍ତ ଏଟିସିକୁ ଖବର ଦେଇଥିଲେ। ଏହାପରେ ବିମାନକୁ ଟାକ୍ସିୱେକୁ ନିଆଯାଇଥିଲା ଏବଂ ସମସ୍ତ ଯାତ୍ରୀଙ୍କୁ ସୁରକ୍ଷିତ ଭାବେ ବିମାନରୁ ବାହାର କରାଯାଇଥିଲା।