ଜମ୍ମୁ କାଶ୍ମୀରରେ ଆତଙ୍କବାଦୀଙ୍କ ଗୁଳିମାଡ: ମୃତ୍ୟୁ ସଂଖ୍ୟା ୪

ଶ୍ରୀନଗର: ଜମ୍ମୁ କାଶ୍ମୀରର ରାଜୌରୀ ଜିଲ୍ଲା ଅନ୍ତର୍ଗତ ଧାଙ୍ଗ୍ରି ଗ୍ରାମରେ ଆଜି ଆତଙ୍କବାଦୀଙ୍କ ଆକ୍ରମଣରେ ୪ ଜଣ ସ୍ଥାନୀୟ ବାସିନ୍ଦାଙ୍କ ମୃତ୍ୟୁ ହୋଇଛି ଏବଂ ୭ ଜଣ ଗୁରୁତର ଆହତ ହୋଇଛନ୍ତି। ରା‌ଜୌରି ଜିଲ୍ଲାର ଅପର୍‌ ଧାଙ୍ଗ୍ରି ଅଞ୍ଚଳର ଉଚ୍ଚ ମାଧ୍ୟମିକ ସ୍କୁଲ୍‌ ନିକଟରେ ଆଜି ରାତି ୭ଟା ୧୫ରେ ଆତଙ୍କବାଦୀମାନେ ହିନ୍ଦୁ ପରିବାରଗୁଡ଼ିକୁ ଟାର୍ଗେଟ୍‌ କରି ଆଖିବୁଜା ଗୁଳିମାଡ଼ କରିଥିଲେ। ୪ଟି ହିନ୍ଦୁ ପରିବାରର ମୋଟ୍‌ ୧୩ ଜଣ ଗୁଳିମାଡ଼ରେ ଆହତ ହୋଇଥିଲେ। ସମସ୍ତଙ୍କୁ ସ୍ଥାନୀୟ ସରକାରୀ ମେଡିକାଲ କଲେଜରେ ଭର୍ତ୍ତି କରାଯାଇଥିଲା। ତେବେ ପ୍ରାଥମିକ ଚିକିତ୍ସା ପରେ କେତେକଙ୍କୁ ଛାଡି ଦିଆଯାଇଛି।

ତେବେ ଘଟଣାସ୍ଥଳରେ ପ୍ରଥମେ ୨ଜଣଙ୍କୁ ମୃତ୍ୟୁ ହୋଇଥିଲା। ପରେ ମେଡିକାଲରେ ଆଉଜଣଙ୍କ ଜୀବନ ଯାଇଥିଲା। ଏବେ ରାତି ୨ଟା ସୁଦ୍ଧା ଆଉ ଜଣଙ୍କ ମୃତ୍ୟୁ ହୋଇଛି। ତେବେ ଉକ୍ତ ଆକ୍ରମଣରେ ମୋଟ ୪ ଜଣଙ୍କ ମୃତ୍ୟୁ ଘଟିଥିବା ଜଣାପଡିଛି। ଆହତଙ୍କ ମଧ୍ୟରେ ଅନେକ ମହିଳା ଓ ଶିଶୁ ଅଛନ୍ତି। ସେମାନଙ୍କୁ ରୋଜୗରୀ ଜିଏମ୍‌ସିରେ ଚିକିତ୍ସା କରାଯାଉଛି । ଆହତଙ୍କ ୭ ଜଣଙ୍କ ମଧ୍ୟରୁ ୪ ଜଣଙ୍କ ଅବସ୍ଥା ସଙ୍କଟାପନ୍ନ ରହିଥିବା ଡାକ୍ତରଖାନା ସୂତ୍ରରୁ ଜଣାପଡ଼ିଛି। ଏହି ଆକ୍ରମଣ ପରେ ସମ୍ପୃକ୍ତ ଅଞ୍ଚଳକୁ ସୁରକ୍ଷା ବାହିନୀ ଘେରାବନ୍ଦୀ କରି ସର୍ଚ୍ଚ ଅପରେସନ୍‌ ଜାରି ରଖିଛନ୍ତି।