୩ ଘଣ୍ଟା ପୂର୍ବରୁ ଜନ୍ମ ହୋଇଥିବା ନବଜାତକୁ ଗୁଳି କଲେ ଆତଙ୍କବାଦୀ, ତଥାପି ବଞ୍ଚିଗଲା ଜୀବନ
କାବୁଲ: ଆତଙ୍କବାଦୀଙ୍କ ବର୍ବରତାର ଅନେକ କାହାଣୀ ଆପଣ ଶୁଣିଥିବେ, କିନ୍ତୁ ଆଜି ଆମେ ଆପଣଙ୍କୁ ଏମିତି ଏକ ଘଟଣା କହିବୁ ଯାହାକି ଚିକିତ୍ସା ବିଜ୍ଞାନର ଚମତ୍କାରିତାକୁ ପ୍ରମାଣିତ କରିବ | ୩ ଘଣ୍ଟା ପୂର୍ବରୁ ଜନ୍ମହୋଇଥିବା ଏକ ନବଜାତକୁ ଆତଙ୍କବାଦୀ ଗୁଳିମାଡ କରିଥିଲେ ବି ଡାକ୍ତରଙ୍କ ଅକ୍ଲାନ୍ତ ପରିଶ୍ରମ ଯୋଗୁଁ ଶିଶୁଟିର ଜୀବନ ବଞ୍ଚିଯାଇଛି | ରିପୋର୍ଟ ଅନୁଯାୟୀ, କିଛି ଆତଙ୍କବାଦୀ ଆଫଗାନିସ୍ତାନର କାବୁଲର ମାତୃତ୍ୱ ଚିକିତ୍ସାଳୟ ଉପରେ ଆକ୍ରମଣ କରିଥିଲେ। ଏହି ଆକ୍ରମଣରେ ସମୁଦାୟ ୨୪ ଜଣଙ୍କର ମୃତ୍ୟୁ ହୋଇଥିଲା । ଏଥିରେ ପିଲାମାନଙ୍କର ମା, ନର୍ସ ଏବଂ ଦୁଇ ନବଜାତ ଶିଶୁଙ୍କର ମୃତ୍ୟୁ ହୋଇଥିବାବେଳେ ଏକ ନବଜାତ ଶିଶୁକୁ ଦୁଇଟି ଗୁଳି ବାଜିବା ପରେ ମଧ୍ୟ ସେ ବର୍ତ୍ତିଯାଇଛି | ତେବେ ଦୁଃଖର ବିଷୟ ଯେ ନବଜାତର ମାଙ୍କର କିନ୍ତୁ ଆତଙ୍କବାଦୀଙ୍କ ଗୁଳିମାଡରେ ମୃତ୍ୟୁ ହୋଇଯାଇଛି |
Sambad is now on WhatsApp
Join and get latest news updates delivered to you via WhatsApp
ଆଇଏସଆଇଏସର ତିନି ଜଣ ଆତଙ୍କବାଦୀ ଡାକ୍ତରଖାନା ଉପରେ ଆକ୍ରମଣ କରିଥିଲେ। ଆତଙ୍କବାଦୀମାନେ କାବୁଲର ମାତୃତ୍ୱ ଡାକ୍ତରଖାନାରେ ପ୍ରବେଶ କରିବା ମାତ୍ରେ ବୋମା ଓ ଗୁଳି ଚଳାଇବା ଆରମ୍ଭ କରିଥିଲେ। ଆତଙ୍କୀମାନେ ପୁଲିସ ଫୋର୍ସର ୟୁନିଫର୍ମ ପିନ୍ଧି ଆଖିବୁଜା ଗୁଳି ଚଳାଇଥିଲେ | ୩ ଘଣ୍ଟା ପୂର୍ବରୁ ଜନ୍ମ ହୋଇଥିବା ଏକ ନବଜାତ ଶିଶୁ କନ୍ୟାର ଗୋଡ଼ରେ ଦୁଇଟି ଗୁଳି ବାଜିଥିଲା । ଏହା ପରେ ନବଜାତ ଶିଶୁକୁ କାବୁଲର ଇନ୍ଦିରା ଗାନ୍ଧୀ ଶିଶୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା |
ଡାକ୍ତରମାନେ ନବଜାତର ଅପରେସନ୍ କରିଥିଲେ। ଦୁଇଟି ଗୁଳି ବାଜିବା ଯୋଗୁଁ ଶିଶୁର ଡାହାଣ ଗୋଡରେ ଗୁରୁତର ଆଘାତ ଲାଗିଥିଲା । ଏହି ଆକ୍ରମଣରେ ଝିଅର ମା ନାଜିଆଙ୍କର ମୃତ୍ୟୁ ଘଟିଥିଲା, ଏହା ପରେ ନବଜାତଙ୍କ ବାପା ତାହାର ନାମ ନାଜିଆ ରଖିଛନ୍ତି | ଡାକ୍ତରମାନେ କହିଛନ୍ତି ଯେ ଅପରେସନ ସଫଳ ହୋଇଛି ଓ କିଛିଦିନ ପରେ ନବଜାତ ସୁସ୍ଥ ହୋଇଯିବ | ଏହା ସହ ସେମାନେ କହିଛନ୍ତି ଯେ ମାତ୍ର ୩ ଘଣ୍ଟା ପୂର୍ବରୁ ଜନ୍ମ ହୋଇଥିବା ଝିଅକୁ ଗୁଳି କରିବା ମାନବିକତାର ସମସ୍ତ ସୀମା ଅତିକ୍ରମ କରିଛି । ଏହି ଆକ୍ରମଣରେ ୨୪ ଜଣଙ୍କର ମୃତ୍ୟୁ ଘଟିଥିବା ବେଳେ ୧୫ ଜଣ ଆହତ ହୋଇଛନ୍ତି। ପରେ ସମସ୍ତ ଆତଙ୍କବାଦୀଙ୍କୁ ସୁରକ୍ଷାକର୍ମୀ ନିପାତ କରିଛନ୍ତି |