ସଂକ୍ରମଣ ଭୟରେ ପୂରା ହୋଟେଲ ବୁକ କଲେ, ୨୦ଜଣ ରକ୍ଷିତାଙ୍କୁ ନେଇ ଆତ୍ମ-ବିଚ୍ଛିନ୍ନ ହୋଇ ରହିଲେ ଥାଇଲାଣ୍ଡର ରାଜା
ନୂଆଦିଲ୍ଲୀ: ଥାଇଲାଣ୍ଡର ରାଜା ମହା ଭାଜିରାଲୋଙ୍ଗକର୍ନ ଜର୍ମାନୀର ଏକ ବିଳାସପୂର୍ଣ୍ଣ ହୋଟେଲକୁ ବୁକ କରି ସେଠାରେ ସଙ୍ଗରୋଧରେ ରହିଥିବା ଜଣା ପଡିଛି | ସଂକ୍ରମଣ ଭୟରେ ସେ ଏଭଳି କରିଥିବା ବେଳେ ପ୍ରାୟ ୨୦ଜଣ ମହିଳାଙ୍କୁ ରକ୍ଷିତା ଭାବରେ ସେଠାରେ ରଖିଥିବା ନେଇ ସୂଚନା ମିଳିଛି |
Sambad is now on WhatsApp
Join and get latest news updates delivered to you via WhatsApp
ନୋଭଲ କରୋନାଭାଇରସର ସଂକ୍ରମଣ ସମଗ୍ର ବିଶ୍ୱର ଲୋକଙ୍କୁ ନିଜ ଘର ଭିତରେ ରହିବାକୁ ବାଧ୍ୟ କରିଛି | ଦରକାର ସମୟରେ ଘର ବାହାରକୁ ବାହାରିବା ପାଇଁ ସରକାର କହୁଥିବା ବେଳେ ଯେତେ ସମ୍ଭବ ନିଜକୁ ସଙ୍ଗରୋଧ କରିବାକୁ କୁହାଯାଇଛି | ଏବେ ସଂକ୍ରମଣକୁ ଦେଖି ଥାଇଲାଣ୍ଡର ରାଜା ଜର୍ମାନୀରେ ଆତ୍ମ-ବିଚ୍ଛିନ୍ନ ହୋଇ ରହିବା ପାଇଁ ନିଷ୍ପତ୍ତି ନେଇଥିବା ବୋଲି ଜଣା ପଡିଛି। ରାଜାଙ୍କୁ ଜର୍ମାନୀର ବାଭାରିଆରରେ ଥିବା ବିଳାସପୂର୍ଣ୍ଣ ହୋଟେଲ,ଗ୍ରାଣ୍ଡ ହୋଟେଲ ସୋନେନବିଚଲରେ ରହିବାକୁ ଅନୁମତି ଦିଆଯାଇଛି । ମେଟ୍ରୋ ରିପୋର୍ଟ ଅନୁଯାୟୀ, ସେ ପୁରା ହୋଟେଲ ବୁକ୍ କରିଛନ୍ତି।
ଜର୍ମାନ ଟାବ୍ଲଏଡ୍ ବିଲଡ ଅନୁଯାୟୀ, ଥାଇ କିଙ୍ଗ ୨୦ଜଣ ରକ୍ଷିତା ଏବଂ କିଛି ଗୃହ ସହାୟିକାଙ୍କ ସହ ହୋଟେଲକୁ ରହିବାକୁ ଆସିଥିଲେ | ରିପୋର୍ଟରେ ଏହା ମଧ୍ୟ ଦର୍ଶାଯାଇଛି ଯେ, ରାଜା ପ୍ରଥମେ ନିଜ ସହ ଅଧିକ ଗୃହ ସହାୟିକା ଆଣିବା ପାଇଁ ଯୋଜନା କରୁଥିବା ବେଳେ ସେମାନେ ନୋଭଲ କରୋନାଭାଇରସ୍-ପଜିଟିଭ୍ ବୋଲି ସନ୍ଦେହ କରାଯିବାରୁ ୧୧୯ଜଣଙ୍କୁ ଘରକୁ ପଠାଇ ଦିଆଯାଇଥିଲା | ଜର୍ମାନୀରେ ରାଜାଙ୍କ ଆତ୍ମ-ବିଚ୍ଛିନ୍ନ ହେବା ଖବର ଭାଇରାଲ ହେବାପରେ ଥାଇଲାଣ୍ଡରେ ଥିବା ଲୋକମାନେ ଟ୍ୱିଟରରେ ନିଜର କ୍ରୋଧ ପ୍ରକାଶ କରିଥିଲେ। ଫଳସ୍ୱରୂପ, ‘ଆମକୁ ଜଣେ ରାଜା କାହିଁକି ଦରକାର?’ ଟ୍ୱିଟରରେ ଟ୍ରେଣ୍ଡ କରିବା ଆରମ୍ଭ ହୋଇଥିଲା | ସୂଚନା ମୁତାବକ, ଥାଇଲାଣ୍ଡର ବର୍ତ୍ତମାନର ରାଜା ମହା ଭାଜିରାଲୋଙ୍ଗକର୍ନଙ୍କର ଚାରି ପତ୍ନୀ ଥିଲେ | ସେମାନେ ହେଉଛନ୍ତି ରାଜକୁମାରୀ ସୋମସାୱାଲି (୧୯୭୭–୧୯୯୩); ୟୁଭାଦିଦା ପୋଲପ୍ରେସର (୧୯୯୪-୧୯୯୬); ଶ୍ରୀରସ୍ମି ସୁୱାଡି (୨୦୦୧–୨୦୧୪); ଏବଂ ରାଣୀ ସୁଥିଦା | ବର୍ତ୍ତମାନ ସୁଦ୍ଧା, ଥାଇଲାଣ୍ଡରେ ୧,୫୨୪ କରୋନାଭାଇରସ୍-ପଜିଟିଭ୍ ମାମଲା ଏବଂ ନଅ ଜଣଙ୍କର ମୃତ୍ୟୁ ହୋଇଥିବା ରିପୋର୍ଟ ସାମ୍ନାକୁ ଆସିଛି।