ନୂଆଦିଲ୍ଲୀ: ନିକଟରେ ପାକିସ୍ତାନ ବିରୋଧରେ ଭାରତର ଅପରେସନ୍‌ ସିନ୍ଦୂରର ଯଥାର୍ଥତା ପ୍ରତିପାଦନ ପାଇଁ ୫ ରାଷ୍ଟ୍ରୀୟ ଅଭିଯାନରୁ ଫେରିଥିବା କଂଗ୍ରେସ ସାଂସଦ ଶଶୀ ଥରୁର ପୁଣି ଥରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ପ୍ରଶଂସା କରିଛନ୍ତି। ‘ଦ ହିନ୍ଦୁ’ରେ ଏକ ସ୍ତମ୍ଭରେ ଥରୁର ପ୍ରଧାନମନ୍ତ୍ରୀ ମୋଦୀ ତାଙ୍କ ଶକ୍ତି, ଗତିଶୀଳତା ଓ ଇଚ୍ଛାଶକ୍ତି ଯୋଗୁଁ ଭାରତ ପାଇଁ ଏକ ସମ୍ପଦ ବୋଲି କହିଛନ୍ତି। ପୂର୍ବରୁ ମୋଦୀ ଓ ତାଙ୍କ କାର୍ଯ୍ୟକୁ ପ୍ରଶଂସା କରିବାକୁ ନେଇ ଥରୁର ନିଜ ଦଳରୁ ସମାଲୋଚନାର ଶିକାର ହୋଇଥିଲେ। କଂଗ୍ରେସର କେରଳ ସାଂସଦ ଏହି ସ୍ତମ୍ଭରେ ଲେଖିଛନ୍ତି, ଏହି ଅଭିଯାନର ଏକ ଅଂଶ ଭାବରେ ସେ ଶିଖିଥିଲେ ଯେ ଏକତାର ଶକ୍ତି, ସ୍ପଷ୍ଟ ଯୋଗାଯୋଗର ଫଳପ୍ରଦତା, ସଫ୍ଟ ପାୱାରର ରଣନୈତିକ ମୂଲ୍ୟ ଓ ସାର୍ବଜନୀନ କୂଟନୀତି ଭାରତକୁ ଏକ ଜଟିଳ ଅନ୍ତର୍ଜାତୀୟ ଦୃଶ୍ୟପଟକୁ ଚଳାଇବାରେ ମାର୍ଗଦର୍ଶନ କରିବ।
ପ୍ରଯୁକ୍ତି, ବାଣିଜ୍ୟ ଓ ପରମ୍ପରା- ଏହି ତିନୋଟି ‘ଟି’ (ଟେକ୍ନୋଲୋଜି, ଟ୍ରେଡ୍‌ ଓ ଟ୍ରାଡିସନ) ଭାରତର ଭବିଷ୍ୟତ ବିଶ୍ୱ ରଣନୀତିକୁ ଆଗକୁ ବଢ଼ାଇବା ଉଚିତ କାରଣ ଦେଶ ଅଧିକ ନ୍ୟାୟପୂର୍ଣ୍ଣ, ସୁରକ୍ଷିତ ଓ ସମୃଦ୍ଧ ବିଶ୍ୱ ପାଇଁ ପ୍ରୟାସ ଜାରି ରଖିଛି। ଅପରେସନ୍‌ ସିନ୍ଦୂର ପରେ ପାକିସ୍ତାନରେ ମୃତାହତଙ୍କ ପ୍ରତି ସମବେଦନା ଜଣାଇବା ନେଇ ଥରୁର କଲମ୍ବିଆର ଆଭିମୁଖ୍ୟକୁ ସମାଲୋଚନା କରିଥିଲେ। ପରେ ଲାଟିନ ଆମେରିକୀୟ ରାଷ୍ଟ୍ର ନିଜର ବୟାନକୁ ପ୍ରତ୍ୟାହାର କରି ନେଇଥିଲା କାରଣ ଥରୁର ଦର୍ଶାଇଥିଲେ ଯେ ଆତଙ୍କବାଦୀ ଓ ନିଜ ଦେଶକୁ ରକ୍ଷା କରୁଥିବା ଲୋକଙ୍କ ମଧ୍ୟରେ କୌଣସି ନୈତିକ ସମାନତା ନାହିଁ। ଥରୁର ଲେଖିଛନ୍ତି ଯେ ଆତଙ୍କବାଦ ସହ ପାକିସ୍ତାନର ନିରନ୍ତର ସମ୍ପର୍କକୁ ବିଶ୍ୱ ସ୍ତରରେ ପହଞ୍ଚାଇବାର ଆବଶ୍ୟକତା ଥିଲା, ଯାହା ଅପରେସନ୍‌ ସିନ୍ଦୂର ଆଉଟ୍‌ରିଚ୍ କାର୍ଯ୍ୟକ୍ରମ ଦ୍ବାରା ସଫଳ ହୋଇଛି। ବିଶେଷ କରି ୟୁପିଏ ଶାସନ କାଳରେ ହୋଇଥିବା ସର୍ଜିକାଲ ଷ୍ଟ୍ରାଇକ୍‌କୁ ପ୍ରତ୍ୟାଖ୍ୟାନ କରିବା ସହ ପରିସ୍ଥିତିର ମୁକାବିଲା ପାଇଁ ମୋଦୀ ସରକାରଙ୍କୁ ପ୍ରଶଂସା କରିବା ପରେ ଥରୁରଙ୍କ ମନ୍ତବ୍ୟକୁ ତାଙ୍କ କଂଗ୍ରେସ ସହକର୍ମୀମାନେ ତୀବ୍ର ସମାଲୋଚନା କରିଥିଲେ। ଅପରେସନ୍‌ ସିନ୍ଦୂର ଗ୍ଲୋବାଲ ଆଉଟରିଚ୍ ଶେଷ କରିବା ପରେ ଥରୁର ଜୁନ୍ ୧୧ରେ ପ୍ରଧାନମନ୍ତ୍ରୀ ମୋଦୀଙ୍କୁ ତାଙ୍କ ବାସଭବନରେ ଭେଟିଥିଲେ।