ଗୋଆରେ ଆଇଏଫ୍‌ଏଫ୍‌ଆଇ ଚଳଚ୍ଚିତ୍ର ବଜାରର ସପ୍ତଦଶ ସଂସ୍କରଣ ଉଦ୍‌ଘାଟିତ

ଗୋଆ: କେନ୍ଦ୍ର ସୂଚନା ଓ ପ୍ରସାରଣ, ଯୁବ ବ୍ୟାପାର ଏବଂ କ୍ରୀଡ଼ା ମନ୍ତ୍ରୀ ଅନୁରାଗ ସିଂହ ଠାକୁର ଆଜି ଗୋଆର ମେରିୟଟ୍ ରିସୋର୍ଟଠାରେ ଦକ୍ଷିଣ ଏସିଆର ସର୍ବବୃହତ୍ ଚଳଚ୍ଚିତ୍ର ବଜାରକୁ ଉଦ୍‌ଘାଟନ କରିଛନ୍ତି। ଏହି ଅବସରରେ ସେ କହିଛନ୍ତି, ଏହି ଚଳଚ୍ଚିତ୍ର ବଜାର ବିଶ୍ୱର କୋଣଅନୁକୋଣରୁ ଚଳଚ୍ଚିତ୍ର ନିର୍ମାତା, ପ୍ରଯୋଜକ ଓ କାହାଣୀକାରଙ୍କ ପାଇଁ ଏକ ସମାଗମସ୍ଥଳୀ। ଏହା ସୃଜନଶୀଳତା ଓ ବ୍ୟବସାୟ, ଧାରଣା ଓ ପ୍ରେରଣାର ଏକ ମିଶ୍ରଣ ବୋଲି ସେ କହିଛନ୍ତି। ଠାକୁର କହିଥିଲେ ଯେ ବାର୍ଷିକ ୨୦% ଅଭିବୃଦ୍ଧି ହାର ସହିତ ଭାରତୀୟ ଗଣମାଧ୍ୟମ ଏବଂ ମନୋରଞ୍ଜନ ଶିଳ୍ପ ବିଶ୍ୱର ପଞ୍ଚମ ବୃହତ୍ତମ ଏବଂ ସର୍ବାଧିକ ବିଶ୍ୱବିଦିତ ଶିଳ୍ପ ଭାବରେ ପ୍ରଶଂସିତ। ଏହାର ୧୭ଶ ବର୍ଷରେ ଫିଲ୍ମ ବଜାର ଆଇଏଫ୍ଏଫ୍ଆଇର ଏକ ଅପରିହାର୍ଯ୍ୟ ମୂଳଦୁଆ ପାଲଟିଛି। ଦେଶର ସୀମା ଅତିକ୍ରମ କରି ଏସିଆର ଅନ୍ୟତମ ବୃହତ୍ତମ ଚଳଚ୍ଚିତ୍ର ବଜାରରେ ପରିଣତ ହୋଇଛି।

ଏହି ଅବସରରେ କେନ୍ଦ୍ରମନ୍ତ୍ରୀ କହିଛନ୍ତି ଯେ, ଚଳିତ ବର୍ଷ ଫିଲ୍ମ ବଜାର ପାଇଁ ଚଳଚ୍ଚିତ୍ର ଚୟନରେ କାଳ୍ପନିକ, ପ୍ରାମାଣିକ କ୍ଷୁଦ୍ର ଚଳଚ୍ଚିତ୍ର, ପ୍ରାମାଣିକ, ରୋମାଞ୍ଚକର ଚଳଚ୍ଚିତ୍ର ଏବଂ ଏପରିକି ଏନିମେଟେଡ୍ ଚଳଚ୍ଚିତ୍ରର ବିବିଧ ମିଶ୍ରଣ ପ୍ରତିଫଳିତ ହୋଇଛି। ସହ-ପ୍ରଯୋଜନା ବଜାର ବିଷୟରେ ମନ୍ତ୍ରୀ କହିଛନ୍ତି ଯେ ଆମେ ଗର୍ବର ସହ କୋ-ପ୍ରଡକ୍ସନ ମାର୍କେଟରେ ୭ଟି ଦେଶର ୧୨ଟି ଡକ୍ୟୁମେଣ୍ଟାରୀ ଉପସ୍ଥାପନ କରୁଛୁ, ଯେଉଁଥିରେ ୧୭ଟି ଭିନ୍ନ ଭିନ୍ନ ଭାଷାର ଜୀବନକୁ ଉଜାଗର କରାଯାଇଛି। ଫିଲ୍ମ ନିର୍ମାତାଙ୍କ ଲେନ୍ସ ମାଧ୍ୟମରେ ଏହା ବାସ୍ତବତାର ଦିଗରେ ଏକ ଯାତ୍ରା। ୫୪ତମ ଆଇଏଫ୍ଏଫ୍ଆଇରେ ଫିଲ୍ମ ବଜାରରେ ପ୍ରାମାଣିକ ଚଳଚ୍ଚିତ୍ର, ରୋମାଞ୍ଚକର ଚଳଚ୍ଚିତ୍ର, ଜଳବାୟୁ ସଙ୍କଟ, କାଳ୍ପନିକ ଆଦି ବିଭିନ୍ନ ଶୈଳୀର ୧୦ଟି ସୁପାରିସ କରାଯାଇଥିବା ଚଳଚ୍ଚିତ୍ର ପ୍ରଦର୍ଶିତ ହେବ। ଏହି ଚଳଚ୍ଚିତ୍ରଗୁଡ଼ିକ ଇଂରାଜୀ, ହିନ୍ଦୀ, ବଙ୍ଗଳା, ମାରୱାଡି, କନ୍ନଡ ଏବଂ ମାଓରି (ନ୍ୟୁଜିଲାଣ୍ଡ ଭାଷା)ରେ ରହିଛି। ଚଳିତ ବର୍ଷ ଫିଲ୍ମ ବଜାରରେ ଏକ ନୂଆ ପ୍ରସ୍ତୁତି ‘ଭିଏଫ୍‌ଏକ୍ସ ଆଣ୍ଡ ଟେକ୍ ପ୍ୟାଭିଲିୟନ୍’ ରହିଛି, ଯାହାର ଉଦ୍ଦେଶ୍ୟ ହେଉଛି ଚଳଚ୍ଚିତ୍ର ନିର୍ମାତାଙ୍କୁ ଅତ୍ୟାଧୁନିକ ଉଦ୍ଭାବନ ବିଷୟରେ ସଚେତନ କରାଇବା।

ଫିଲ୍ମ ବଜାରରେ ଭାରତ, ବାଂଲାଦେଶ, ଶ୍ରୀଲଙ୍କା, ଆମେରିକା, ବ୍ରିଟେନ, ସିଙ୍ଗାପୁର, ଜର୍ମାନୀ, ଫ୍ରାନ୍ସ, ପୋଲାଣ୍ଡ, ଲକ୍ଜେମବର୍ଗ ଏବଂ ଇସ୍ରାଏଲରୁ ସହପ୍ରଯୋଜନା ବଜାରର ଫିଚର-ଲେନ୍ଥ ପ୍ରୋଜେକ୍ଟଗୁଡିକର ଆନୁଷ୍ଠାନିକ ଚୟନ କରାଯାଇଛି। ଜାତୀୟ ଚଳଚ୍ଚିତ୍ର ଉନ୍ନୟନ ନିଗମ (ଏନ୍‌ଏଫ୍‌ଡିସି) ଦ୍ୱାରା ଆରମ୍ଭ ହୋଇଥିବା ଫିଲ୍ମ ବଜାର ଦକ୍ଷିଣ ଏସିଆର ସର୍ବବୃହତ୍ ଚଳଚ୍ଚିତ୍ର ବଜାର ରୂପରେ ବିକଶିତ ହୋଇଛି, ଯାହା ସ୍ଥାନୀୟ ଚଳଚ୍ଚିତ୍ର ନିର୍ମାତାମାନଙ୍କୁ ବିଶ୍ୱସ୍ତରୀୟ ପ୍ରଯୋଜକ ଓ ବିତରକଙ୍କ ସହ ଯୋଡ଼ିଛି।