ଭୋପାଳ: ମଧ୍ୟପ୍ରଦେଶର ନବଗଠିତ ମନ୍ତ୍ରିମଣ୍ଡଳ ଆଜି ଅପରାହ୍‌ଣରେ ଶପଥ ନେଇଛନ୍ତି। ଏଥିରେ ବିଜେପିର ଚର୍ଚ୍ଚିତ କୈଳାସ ବିଜୟବର୍ଗିୟଙ୍କ ସମେତ ୨୭ଜଣ ବିଧାୟକ ପଦ ଓ ଗୋପନୀୟତାର ଶପଥ ଗ୍ରହଣ କରିଛନ୍ତି। ଆଜି ଅପରାହ୍‌ଣ ସାଢ଼େ ୩ଟାରେ ମଧ୍ୟପ୍ରଦେଶ ରାଜଭବନ ଠାରେ ୨୮ଜଣିଆ ନୂତନ ମନ୍ତ୍ରିମଣ୍ଡଳର ଶପଥ ଗ୍ରହଣ ଉତ୍ସବ ଅନୁଷ୍ଠିତ ହୋଇଯାଇଛି। ଏହି ମନ୍ତ୍ରିମଣ୍ଡଳରେ, ପ୍ରଦ୍ୟୁମ୍ନ ସିଂହ ତୋମାର, ପ୍ରହଲ୍ଲାଦ ସିଂହ ପଟେଲ୍‌, କୈଳାସ ବିଜୟବରର୍ଗୀୟ, ବିଶ୍ବାସ ସାରଙ୍ଗଙ୍କ ସମେତ ୧୮ଜଣ କ୍ୟାବିନେଟ୍‌ ମନ୍ତ୍ରୀ ଭାବେ ଶପଥ ନେଇଥିବା ବେଳେ ୬ଜଣ ରାଜ୍ୟ ମନ୍ତ୍ରୀ (ସ୍ବତନ୍ତ୍ର) ଓ ୪ ଜଣ ରାଜ୍ୟମନ୍ତ୍ରୀ ଭାବେ ଶପଥ ନେଇଛନ୍ତି। ସୂଚନାଯୋଗ୍ୟ, ଡିସେମ୍ବର ୧୩ ତାରିଖରେ ମୋହନ ଯାଦବ ନୂତନ ମୁଖ୍ୟମନ୍ତ୍ରୀ ଓ ତାଙ୍କ ସହ ଡେପୁଟି ମୁଖ୍ୟମନ୍ତ୍ରୀ ଭାବେ ରାଜେନ୍ଦ୍ର ଶୁକ୍ଲ ଓ ଜଗଦୀଶ ଦେବଭଡା ଶପଥ ନେଇଥିଲେ। ନିକଟରେ ଅତୀତ ବିଧାନସଭା ନିର୍ବାଚନରେ ମଧ୍ୟପ୍ରଦେଶର ୨୩୦ଟି ବିଧାୟକ ଆସନରୁ ୧୬୩ରେ ବିଜେପି ଜିତିଥିଲା। ସମୀକରଣ ଅନୁସାରେ ମନ୍ତ୍ରିମଣ୍ଡଳରେ ୩୫ଜଣ ମନ୍ତ୍ରୀ ରହିପାରିବେ, ବର୍ତମାନ ଉପମୁଖ୍ୟମନ୍ତ୍ରୀଙ୍କୁ ମିଶାଇ ୩୦ଜଣ ମନ୍ତ୍ରୀ ଶପଥ ନେଇଛନ୍ତି। ଏଥିରେ ଆଉ ୫ଜଣଙ୍କୁ ସାମିଲ କରାଯାଇପାରିବ।