ପୋର୍ଟ ବ୍ଲେୟାର ବିମାନବନ୍ଦରର ସିଲିଂ ଭୁଶୁଡ଼ିଲା

ନୂଆଦିଲ୍ଲୀ: ଆଣ୍ଡାମାନ-ନିକୋବର ଦ୍ବୀପପୁଞ୍ଜର ପୋର୍ଟ ବ୍ଲେୟାରସ୍ଥିତ ବୀର ସାବରକର ଅନ୍ତର୍ଜାତୀୟ ବିମାନବନ୍ଦରର ନୂତନ ଇଣ୍ଟିଗ୍ରେଟେଡ୍ ଟର୍ମିନାଲ ବିଲ୍‌ଡିଂକୁ ଅଳ୍ପଦିନ ତଳେ ଜୁଲାଇ ୧୮ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଉଦ୍‌ଘାଟନ କରିଥିବା ବେଳେ ଏହାର ସିଲିଂର କିଛି ଅଂଶ ପ୍ରବଳ ପବନରେ ଖସିପଡ଼ିଛି। ଏହାର ଫଟୋ ଓ ଭିଡ଼ିଓ ଅନ୍‌ଲାଇନ ବୁଲିବା ପରେ ବିରୋଧୀ ଦଳଗୁଡ଼ିକ ପକ୍ଷରୁ ଏହାକୁ ସମାଲୋଚନା କରାଯାଇଛି। କଂଗ୍ରେସ ନେତା ଜୟରାମ ରମେଶ ଟ୍ବିଟ୍ କରିଛନ୍ତି, ‘ନବଭାରତ’ର ଏହି ଦୁର୍ଭାଗ୍ୟଜନକ ରାଜ୍ୟ ଘଟଣା ପାଇଁ ଟିକସଦାତାଙ୍କୁ ମୂଲ୍ୟ ଦେବାକୁ ପଡ଼ୁଛି। ସେ ପ୍ରଧାନମନ୍ତ୍ରୀ ମୋଦୀଙ୍କୁ କଟାକ୍ଷ କରି କହିଛନ୍ତି ଯେ, ପ୍ରଧାନମନ୍ତ୍ରୀ ଆଜିକାଲି ଯେକୌଣସି ଜିନିଷ ଉଦ୍‌ଘାଟନ କରିବା ପାଇଁ ତତ୍ପର- ତାହା ଅସମ୍ପୂର୍ଣ୍ଣ କାମ ହୋଇଥାଉ ବା ନିମ୍ନମାନର କାମ ହୋଇଥାଉ ପଛେ (ରାଜପଥ, ବିମାନବନ୍ଦର, ପୋଲ, ରେଳଗାଡ଼ି ଇତ୍ୟାଦି)। ଏଥିପାଇଁ ଟିକସଦାତାଙ୍କୁ ମୂଲ୍ୟ ଦେବାକୁ ପଡ଼ୁଛି।

ରମେଶଙ୍କ ଟ୍ବିଟ୍‌ର ଉତ୍ତରରେ ବେସାମରିକ ବିମାନ ଚଳାଚଳ ମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଧିଆ, ଯେକି ଶାମୁକା-ଆକୃତିର ସଂରଚନାର ଉଦ୍‌ଘାଟନ ସମୟରେ ଉପସ୍ଥିତ ଥିଲେ, ସ୍ପଷ୍ଟୀକରଣ ଦେଇ କହିଛନ୍ତି, ସିସିଟିଭି କ୍ୟାମେରା ଲଗାଇବା ପାଇଁ ଫଲ୍‌ସ ସିଲିଂକୁ ଜାଣିଶୁଣି ଢିଲା ଛଡ଼ାଯାଇଥିଲା। ତେବେ ଯେଉଁ କ୍ଷତି ହୋଇଛି, ତାହା ଟର୍ମିନାଲ ବିଲ୍‌ଡିଂ ବାହାରେ ଟିକେଟ୍ କାଉଣ୍ଟର ନିକଟରେ ହୋଇଛି। ଘଣ୍ଟା ପ୍ରତି ପ୍ରାୟ ୧୦୦ କିମି ବେଗରେ ପବନ ବହିବାରୁ ପ୍ୟାନେଲ ଝୁଲୁଥିବା ଭିଡ଼ିଓରେ ଦେଖାଯାଉଛି। କାମ ସମ୍ପୂର୍ଣ୍ଣ କରାଯିବା ପରେ ଫଲ୍‌ସ ସିଲିଂକୁ ପୁନଃସ୍ଥାପିତ କରାଯାଇଛି। ସେ ରମେଶଙ୍କୁ ପରାମର୍ଶ ଦେଇ ଟ୍ବିଟ୍ କରିଛନ୍ତି, ଆପଣ ପ୍ରଥମେ ସ୍ପଷ୍ଟୀକରଣ ମାଗିବା ଉଚିତ। ତାହା ନ କରି ସିଧାସଳଖ ଆକ୍ରମଣ କରିବା ଠିକ୍ ହେଉନି।