ମଣିପୁରର ୬ଟି ଥାନା ଅଞ୍ଚଳରେ ପୁଣି ଲାଗିଲା ଆଫସ୍ପା

ନୂଆଦିଲ୍ଲୀ  ମଣିପୁରରେ ହୋଇଥିବା ହିଂସାକୁ ଦୃଷ୍ଟିରେ ରଖି କେନ୍ଦ୍ର ସରକାର ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ନେଇଛନ୍ତି । ହିଂସା ପ୍ରଭାବିତ ଜିରିବାମ୍ ସମେତ ମଣିପୁରର ୬ଟି ଥାନା ଅଞ୍ଚଳରେ କେନ୍ଦ୍ର ସରକାର ସଶସ୍ତ୍ର ବାହିନୀ (ସ୍ବତନ୍ତ୍ର କ୍ଷମତା) ଆଇନ (ଆଫସ୍ପା) ପୁନଃ ଲାଗୁ କରିଛନ୍ତି। ଏହା ଅଧୀନରେ ସୁରକ୍ଷା ବାହିନୀର ଅଭିଯାନର ସୁବିଧା ପାଇଁ ଏକ ଅଞ୍ଚଳକୁ 'ଅଶାନ୍ତ' ଘୋଷଣା କରାଯାଏ। ଗୃହ ମନ୍ତ୍ରଣାଳୟ ଏକ ନିର୍ଦ୍ଦେଶନାମା ଜାରି କରି କହିଛି ଯେ ଚାଲିଥିବା ଜାତିଗତ ହିଂସା ଯୋଗୁଁ କ୍ରମାଗତ ଅସ୍ଥିର ପରିସ୍ଥିତି ଯୋଗୁଁ ଏହି ନିଷ୍ପତ୍ତି ନିଆଯାଇଛି। ଇମ୍ଫାଲ ପଶ୍ଚିମ ଜିଲ୍ଲାର ସେକ୍ମାଇ ଓ ଲାମସାଙ୍ଗ, ଇମ୍ଫାଲ ପୂର୍ବ ଜିଲ୍ଲାର ଲାମ୍ଫେଲ, ଜିରିବାମ ଜିଲ୍ଲାର ଜିରିବାମ, କାଙ୍ଗପୋକ୍ପିର ଲେମାଖୋଙ୍ଗ ଏବଂ ବିଷ୍ଣୁପୁରର ମୋଇରାଙ୍ଗ ଆଦି ଥାନା ଅଞ୍ଚଳରେ ଆଫସ୍ପା ପୁନଃ ଲାଗୁ କରାଯାଇଛି। ଅକ୍ଟୋବର ପହିଲାରେ ୧୯ଟି ଥାନା ଅଞ୍ଚଳକୁ ବାଦ୍ ଦେଇ ସମଗ୍ର ରାଜ୍ୟରେ ଆଫସ୍ପା ଲାଗୁ କରିବାକୁ ମଣିପୁର ସରକାର ନିଷ୍ପତ୍ତି ନେବା ପରେ ଏହି ନୂଆ ଆଦେଶ ଆସିଛି।

ସୋମବାର ଦିନ ମଣିପୁରର ଜିରିବାମ ଜିଲ୍ଲାରୁ ଛଦ୍ମପୋଷାକ ପିନ୍ଧି ଥିବା ସଶସ୍ତ୍ର ଆତଙ୍କବାଦୀମାନେ ଏକ ପୁଲିସ ଷ୍ଟେସନ ଏବଂ ନିକଟସ୍ଥ ସିଆରପିଏଫ କ୍ୟାମ୍ପ ଉପରକୁ ଆଖିବୁଜା ଗୁଳି ଚଳାଇଥିଲେ, ଯେଉଁଥିରେ ସୁରକ୍ଷା କର୍ମୀଙ୍କ ସହ ୧୧ ଜଣ ସନ୍ଦିଗ୍ଧ ଆତଙ୍କବାଦୀ ନିହତ ହୋଇଥିଲେ।