ସ୍ମାର୍ଟ ସିଟି ପ୍ରକଳ୍ପ ପାଇଁ ବ୍ୟୟ ୧୫୫୨ କୋଟି
ଭୁବନେଶ୍ବର ବିକାଶକୁ ନେଇ କେନ୍ଦ୍ର ମନ୍ତ୍ରୀଙ୍କ ବିସ୍ତୃତ ବିବରଣୀ
ନୂଆଦିଲ୍ଲୀ,: ୨୦୧୭ରୁ ଭୁବନେଶ୍ବର ବିକାଶ ପାଇଁ କେନ୍ଦ୍ର ସରକାର ନେଇଥିବା ପଦକ୍ଷେପ ସମ୍ପର୍କରେ ରାଜ୍ୟସଭାରେ ବିସ୍ତୃତ ବିବରଣୀ ରଖିଛନ୍ତି କେନ୍ଦ୍ର ଆବାସ ଓ ସହରାଞ୍ଚଳ ବ୍ୟାପାର ରାଷ୍ଟ୍ରମନ୍ତ୍ରୀ କୌଶଲ କିଶୋର। ବିଜେଡି ସାଂସଦ ସସ୍ମିତ ପାତ୍ରଙ୍କ ଅଣତାରକା ପ୍ରଶ୍ନର ଲିଖିତ ଉତ୍ତରରେ ମନ୍ତ୍ରୀ ଉତ୍ତର ରଖିଛନ୍ତି।
Sambad is now on WhatsApp
Join and get latest news updates delivered to you via WhatsApp
ମନ୍ତ୍ରୀଙ୍କ ସୂଚନାନୁସାରେ ୩୩୯.୪୪ କୋଟି ଟଙ୍କା ବ୍ୟୟରେ ଭୁବନେଶ୍ବରରେ ଅମୃତ ଯୋଜନାରେ ୪୬ଟି ପ୍ରକଳ୍ପ କାର୍ଯ୍ୟ ଶେଷ ହୋଇଛି। ସେହିଭଳି ଅମୃତ ୨.୦ ଯୋଜନାରେ ୧୭୩.୯୮ କୋଟି ଟଙ୍କା ବ୍ୟୟରେ ୩ ଜଳଯୋଗାଣ ପ୍ରକଳ୍ପ କାର୍ଯ୍ୟ ସରିଛି ଓ ୨୦ଟି ପାଇଁ ଠିକା ଦିଆଯାଇଛି।
ଭୁବନେଶ୍ବର ପାଇଁ ପ୍ରଧାନମନ୍ତ୍ରୀ ଆବାସ ଯୋଜନା (ସହରାଂଚଳ)ରେ ଆବାସ ମଞ୍ଜୁରି, ସହାୟତା ଆବଣ୍ଟନ ଓ ପାଣ୍ଠିର ଉପଯୋଗକୁ ନେଇ ମନ୍ତ୍ରୀ ଗତ ୬ ବର୍ଷର ବିବରଣୀ ଦେଇଛନ୍ତି। ଭୁବନେଶ୍ବର ସ୍ମାଟ ସିଟି ଯୋଜନାରେ ୨୬ଟି ପ୍ରକଳ୍ପ ସରିଛି। ଏଥିପାଇଁ ୧୫୫୨.୦୬ କୋଟି ଟଙ୍କା ବ୍ୟୟ ହୋଇଛି। ଅନ୍ୟ ୯ଟି ପ୍ରକଳ୍ପର କାର୍ଯ୍ୟ ଚାଲିଛି। ଏଥିପାଇଁ ୬୦୭.୭୧ କୋଟି ଟଙ୍କାର ବ୍ୟୟ ଆକଳନ କରାଯାଇଛି। ଭୁବନେଶ୍ବରକୁ ସ୍ବଚ୍ଛ ଭାରତ ମିସନ (ସହରାଞ୍ଚଳ) ଯୋଜନାରେ ଓଡିଏଫ୍ ପ୍ଲସପ୍ଲସ ଭାବେ ସାର୍ଟିଫାଏଡ୍ କରାଯାଇଛି। କଠିନ ବର୍ଜ୍ୟ ବସ୍ତୁ ପରିଚାଳନା ବ୍ୟବସ୍ଥାରେ ସମସସ୍ତ ୬୭ ୱାର୍ଡରେ ଶତ ପ୍ରତିଶତ ‘ଡୋର-ଟୁ-ଡୋର କଲେକ୍ସନ’ କରାଯାଉଛି। ଶୌଚାଳୟ ନିର୍ମାଣରେ ଇଣ୍ଡିଭିଜୁଆଲ୍ ହାଉସ୍ହୋଲ୍ଡ ଲାଟ୍ରିନ୍ ପାଇଁ ୧୩ ହଜାର ୩୯୧ ଲକ୍ଷ୍ୟ ଧାର୍ଯ୍ୟ ହୋଇଥିବା ବେଳେ ୧୨,୩୫୯ (୯୨ ପ୍ରତିଶତ) ହାସଲ ହୋଇଛି। ସ୍ବଚ୍ଛ ସର୍ଭେକ୍ଷଣରେ ଭୁବନେଶ୍ବର ରୢାଙ୍କ ୨୦୨୧ରେ ୧୪୨ ଥିବାବେଳେ ୨୦୨୨ରେ ୮୦ ରହିଥିବା କେନ୍ଦ୍ର ରାଷ୍ଟ୍ରମନ୍ତ୍ରୀ ସୂଚନା ଦେଇଛନ୍ତି।