ତେହରାନ: ମଧ୍ୟପ୍ରାଚ୍ୟର ଦୁଇ ବୃହତ୍ତମ ଶତ୍ରୁ ଦେଶ ଇରାନ ଓ ଇସ୍ରାଏଲ ଏବେ ପରସ୍ପର ବିରୋଧରେ ରଣହୁଂକାର ଦେଉଛନ୍ତି। ଆଜି ଇସ୍ରାଏଲର ତୃତୀୟ ପର୍ଯ୍ୟାୟ ଆକ୍ରମଣ  ଇରାନରେ ବ୍ୟାପକ କ୍ଷୟକ୍ଷତି ଘଟାଇଥିବା ବେଳେ ତେଲ ଅଭିଭ୍‌ ଉପରେ ଇରାନ ହାଇପରସୋନିକ୍‌ କ୍ଷେପଣାସ୍ତ୍ର ମାଡ଼ କରି ଏକ ପରମାଣୁ ପ୍ରତିଷ୍ଠାନକୁ ଟାର୍ଗେଟ୍‌ କରିଥିବା ଜଣାପଡ଼ିଛି । ଏହି ସଂଘର୍ଷ ମଧ୍ୟପ୍ରାଚ୍ୟକୁ ଖୁବ୍‌ଶୀଘ୍ର ଏକ ବଡ଼ ଯୁଦ୍ଧ ଆଡ଼କୁ ଟାଣିନେବ ବୋଲି ଆଶଙ୍କା କରାଯାଉଛି। ଇସ୍ରାଏଲର ନୂଆ ଆକ୍ରମଣରେ ଇରାନର ଦୁଇ ଜଣ ଉଚ୍ଚପଦସ୍ଥ ଜେନେରାଲ ନିହତ ହୋଇଥିବା ଇରାନ ନିଶ୍ଚିତ କରିଛି। ଶନିବାର ସକାଳେ ତେଲ ଅବିବରେ ଇରାନର କ୍ଷେପଣାସ୍ତ୍ର ଓ ରକେଟ୍ ମାଡ଼ ହୋଇଥିବା ବେଳେ ଜେରୁଜେଲମ୍ ଓ ଇସ୍ରାଏଲର ଅନ୍ୟାନ୍ୟ ସ୍ଥାନରେ ବି‌େସ୍ଫାରଣ ହୋଇଥିଲା। ଇସ୍ରାଏଲ ଇରାନ ବିରୋଧରେ ସବୁଠାରୁ ବଡ଼ ଆକ୍ରମଣ ଆରମ୍ଭ କରିବା, ପରମାଣୁ କେନ୍ଦ୍ରଗୁଡ଼ିକୁ ଟାର୍ଗେଟ କରିବା, ଶୀର୍ଷ ସାମରିକ କମାଣ୍ଡରମାନଙ୍କୁ ହତ୍ୟା କରିବା ଏବଂ ଗୁରୁତ୍ୱପୂର୍ଣ୍ଣ ଭିତ୍ତିଭୂମି ନଷ୍ଟ କରିବାର ଗୋଟିଏ ଦିନ ପରେ ଏହି ନୂଆ ଏୟାର୍‌ ଷ୍ଟ୍ରାଇକ୍ ଆରମ୍ଭ ହୋଇଛି। ଇତିମଧ୍ୟରେ ଇସ୍ରାଏଲ ସେନା ତେହେରାନ ଉପରେ ତୃତୀୟ ପର୍ଯ୍ୟାୟ ଏୟାର୍ ଷ୍ଟ୍ରାଇକ୍ ଆରମ୍ଭ କରିଥିବା ବେଳେ ସହରର ବିଭିନ୍ନ ସ୍ଥାନରେ ବିସ୍ଫୋରଣ ହୋଇଥିବା ସୂଚନା ମିଳିଛି।

Advertisment

ସଶସ୍ତ୍ର ବାହିନୀର ଜେନେରାଲ ଷ୍ଟାଫ୍‌ଙ୍କ ଗୁଇନ୍ଦା ବିଭାଗର ଉପମୁଖ୍ୟ ଜେନେରାଲ ଘୋଲାମରେଜା ମେହେରାବି ଓ ଡେପୁଟି ଚିଫ୍ ଅଫ୍ ଅପରେସନ ଜେନେରାଲ ମେହେଦି ରବ୍ବାନୀ ନିହତ ହୋଇଛନ୍ତି। ନିକଟରେ ଇସ୍ରାଏଲର ଆକ୍ରମଣ ପରେ ଇରାନ ଏହାର ଫୋର୍ଡୋ ପରମାଣୁ କେନ୍ଦ୍ରର ସୀମିତ କ୍ଷୟକ୍ଷତି ହୋଇଥିବା ନିଶ୍ଚିତ କରିଛି। କୌଣସି ବ୍ୟାପକ କ୍ଷୟକ୍ଷତି ହୋଇନାହିଁ କିମ୍ବା କୌଣସି ପ୍ରଦୂଷଣ ଆଶଙ୍କା ନାହିଁ ବୋଲି ରାଜ୍ୟ ଆଣବିକ ଶକ୍ତି ଏଜେନ୍ସିର ମୁଖପାତ୍ର ବେହରୁଜ୍ କମଲଭାଣ୍ଡି କହିଛନ୍ତି। ‘ଅପରେସନ୍ ଟ୍ରୁ ପ୍ରମିଜ୍’ ନାମକ ଇରାନର ଆକ୍ରମଣରେ ଇସ୍ରାଏଲର ୩ ଜଣଙ୍କ ମୃତ୍ୟୁ ଘଟିଥିବା ବେଳେ ପ୍ରାୟ ୬୪ ଜଣ ଆହତ ହୋଇଛନ୍ତି। ଶୁକ୍ରବାରଠାରୁ ଆରମ୍ଭ ହୋଇ ଶନିବାର ପର୍ଯ୍ୟନ୍ତ ଚାଲିଥିବା ଇସ୍ରାଏଲର ‘ଅପରେସନ୍ ରାଇଜିଂ ଲାୟନ୍’ରେ ଇରାନରେ ଅତି କମ୍‌ରେ ୧୩୦ ଜଣଙ୍କ ମୃତ୍ୟୁ ଘଟିଥିବା ବେଳେ ୩୨୦ରୁ ଅଧିକ ଆହତ ହୋଇଛନ୍ତି।

ପରମାଣୁ ସ୍ଥଳ କ୍ଷତିଗ୍ରସ୍ତ, ବିକିରଣ ବିପଦ ବଢ଼ିଲା
ତେଲ୍‌ ଅଭିଭ୍‌ରେ ଲମ୍ବା ଦୂରତା କ୍ଷେପଣାସ୍ତ୍ର ମାଡ଼; ୩ ମୃତ, ୬୪ ଆହତ

ଇସ୍ରାଏଲ ତୁରନ୍ତ ତେହେରାନ ଉପରେ ଆଉ ଏକ ପର୍ଯ୍ୟାୟ ଆକ୍ରମଣ ଆରମ୍ଭ କରିଥିଲା ଏବଂ ଇରାନର ରାଜଧାନୀରେ ଅନେକ ବିସ୍ଫୋରଣର ଶବ୍ଦ ଶୁଣିବାକୁ ମିଳିଥିଲା। ଇରାନର ପ୍ରମୁଖ ନେତୃତ୍ୱ ସ୍ଥଳ ନିକଟରେ ଅବସ୍ଥିତ ମେହରାବାଦ ବିମାନବନ୍ଦରରେ ଲଢୁଆ ବିମାନ ଓ ପରିବହନ ବିମାନ ଥିବା ବାୟୁସେନା ଘାଟି ଉପରେ ଦୁଇଟି କ୍ଷେପଣାସ୍ତ୍ର ଆକ୍ରମଣ ହୋଇଥିଲା। ଘଟଣାସ୍ଥଳ ଜଳୁଥିବା ସୂଚନା ମିଳିଛି। ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ଚେତାବନୀ ଦେଇ କହିଛନ୍ତି ଯେ ଇରାନର ପରମାଣୁ କାର୍ଯ୍ୟକ୍ରମକୁ ଧ୍ୱଂସ କରିବା ପାଇଁ ଇସ୍ରାଏଲର ପ୍ରୟାସ ଏବେ ଆରମ୍ଭ ହୋଇଛି। ଇରାନର ସର୍ବୋଚ୍ଚ ନେତା ଆୟାତୋଲ୍ଲା ଅଲି ଖେମିନିଙ୍କ ଟେଲିଭିଜନ୍ ଅଭିଭାଷଣ ପରେ ଇସ୍ରାଏଲ ଉପରେ ଇରାନ କ୍ଷେପଣାସ୍ତ୍ର ଓ ଡ୍ରୋନ୍‌ ଆକ୍ରମଣ କରିଛି। 

ଆମେରିକାର ଡୋନାଲ୍ଡ ଟ୍ରମ୍ପ ପ୍ରଶାସନ କହିଛି ଯେ ସଦ୍ୟତମ ଉତ୍ତେଜନାରେ ସେମାନେ ସିଧାସଳଖ ସମ୍ପୃକ୍ତ ନୁହନ୍ତି, ଯଦିଓ ସେ ସବୁକିଛି ଜାଣନ୍ତି। ଆମେରିକା ପରମାଣୁ ଚୁକ୍ତି ସ୍ୱାକ୍ଷର କରିବାକୁ ଇରାନକୁ ଅନୁରୋଧ କରୁଥିବା ବେଳେ ଏହି ଆକ୍ରମଣ ହୋଇଛି। ଟ୍ରମ୍ପ ଇରାନକୁ ତା’ର ପରମାଣୁ କାର୍ଯ୍ୟକ୍ରମ ଉପରେ ବୁଝାମଣା କରିବାକୁ ଆହ୍ୱାନ ଦେବା ସହ ଯଦି ଏହା କରିବାରେ ବିଫଳ ହୁଏ ତେବେ ଇସ୍ରାଏଲ ଆହୁରି ଭୟାନକ ଆକ୍ରମଣ କରିବ ବୋଲି ଚେତାବନୀ ଦେଇଛନ୍ତି। ଇସ୍ରାଏଲର ଆକ୍ରମଣ ପରେ ତେହେରାନର ପରମାଣୁ କାର୍ଯ୍ୟକ୍ରମକୁ ନେଇ ଆମେରିକା ସହ ହୋଇଥିବା ଆଲୋଚନା ଅର୍ଥହୀନ ବୋଲି ଶୁକ୍ରବାର ଇରାନ କହିଛି।