ପୋପ୍‌ଙ୍କ ପରଲୋକ

ଭାଟିକାନ ସିଟି: ଖ୍ରୀଷ୍ଟ ଧର୍ମର ଶୀର୍ଷ ଧର୍ମଗୁରୁ ପୋପ୍‌ ଫ୍ରାନ୍‌ସିସ୍‌ (୮୮)ଙ୍କର ଆଜି ପରଲୋକ ହୋଇଯାଇଛି। ଭାଟିକାନ୍‌ ପକ୍ଷରୁ ଏକ ଟେଲିଗ୍ରାମ ଚ୍ୟାନେଲ୍‌ରେ ପୋପ୍‌ ଫ୍ରାନ୍‌ସିସ୍‌ଙ୍କ ମୃତ୍ୟୁ ଖବରକୁ କାର୍ଡିନାଲ କେଭିନ୍ ଫାରେଲ୍‌ ଘୋଷଣା କରିଛନ୍ତି। ସେ ଲେଖିଛନ୍ତି-‘‘ପ୍ରିୟ ଭାଇ ଓ ଭଉଣୀମାନେ, ଗଭୀର ଦୁଃଖର ସହିତ ଆମର ପବିତ୍ର ପିତା ଫ୍ରାନ୍‌ସିସ୍‌ଙ୍କର ମୃତ୍ୟୁ ଖବର ମୁଁ ଘୋଷଣା କରୁଛି।’’  ଆଜି ସକାଳ ୭ଟା ୩୫ ମିନିଟରେ ରୋମର ବିଶପ୍‌ ଫ୍ରାନ୍‌ସିସ୍‌ ପିତାଙ୍କ ଗୃହକୁ ପ୍ରତ୍ୟାବର୍ତ୍ତନ କରିଛନ୍ତି। ତାଙ୍କର ସମଗ୍ର ଜୀବନ ପ୍ରଭୁ ଓ ଚର୍ଚ୍ଚ‌ର ସେବା ପ୍ରତି ଉତ୍ସର୍ଗୀକୃତ ଥିଲା ବୋଲି କାଡିନାଲ ଫାରେଲ୍‌ କହିଛନ୍ତି। ନିମୋନିଆରେ ଆକ୍ରାନ୍ତ ହୋଇ ସେ ହସ୍ପିଟାଲରେ ୩୮ ଦିନ ଧରି ଚିକିତ୍ସିତ ହୋଇଥିଲେ। 
ମାର୍ଚ୍ଚ ୨୩ ତାରିଖରେ ସେ ଡାକ୍ତରଖାନାରୁ ଡିସଚାର୍ଜ ହୋଇଥିଲେ।  

ପୋପ୍ ଫ୍ରାନ୍‌ସିସ୍‌ଙ୍କ ମୃତ୍ୟୁ ଖବର ସାରା ବିଶ୍ୱକୁ ସ୍ତବ୍ଧ କରିଦେଇଛି। ମୃତ୍ୟୁର ଗୋଟିଏ ଦିନ ପୂର୍ବରୁ ପୋପ୍ ଜୀବନର ସାରକୁ ନେଇ ତାଙ୍କ ଶେଷ ଟ୍ୱିଟ୍‌ରେ ଲେଖିଥିଲେ: ‘‘ଖ୍ରୀଷ୍ଟଙ୍କ ପୁନରୁତ୍‌ଥାନ ହୋଇଛି। ଏହି ଶବ୍ଦଗୁଡ଼ିକ ଆମ ଅସ୍ତିତ୍ୱର ସମଗ୍ର ଅର୍ଥକୁ ବହନ କରିଥାଏ, କାରଣ ଆମେ ମୃତ୍ୟୁ ପାଇଁ ନୁହେଁ, ବରଂ ଜୀବନ ପାଇଁ ଜନ୍ମ ହୋଇଥିଲୁ।’’ ପୋପ୍ ଫ୍ରାନ୍‌ସିସ୍‌ଙ୍କ ସ୍ୱାସ୍ଥ୍ୟାବସ୍ଥା ଖରାପ ଥିବା ସତ୍ତ୍ୱେ ରବିବାର ହ୍ୱିଲ୍‌ଚେୟାରରେ ଶ୍ରଦ୍ଧାଳୁଙ୍କ ସାମନାକୁ ଆସିଥିଲେ। ନିଜର ଶେଷ ବାର୍ତ୍ତାରେ ସେ ସ୍ୱାଧୀନତା ଓ ଶାନ୍ତି ଉପରେ ଗୁରୁତ୍ୱାରୋପ କରିଥିଲେ। ବିଶ୍ୱ ଶାନ୍ତି ପାଇଁ ଧର୍ମ ଓ ଅଭିବ୍ୟକ୍ତିର ସ୍ୱାଧୀନତା ଜରୁରି ବୋଲି ସେ କହିଥିଲେ। ଡାକ୍ତରମାନେ ପୋପ୍ ଫ୍ରାନ୍‌ସିସ୍‌ଙ୍କୁ ବିଶ୍ରାମ ନେବାକୁ ପରାମର୍ଶ ଦେଇଥିଲେ ମଧ୍ୟ ସେ ଇଷ୍ଟର ରବିବାର ଆଶ୍ଚର୍ଯ୍ୟଜନକ ଭାବେ ସାର୍ବଜନୀନ ଦର୍ଶନ ଦେଇଥିଲେ। ସେ ସେଣ୍ଟ୍‌ ପିଟର୍ସ ଛକରେ ୩୫,୦୦୦ ଜନସମାଗମକୁ ହାତ ହଲାଇ ସ୍ବାଗତ କରିଥିଲେ।

ପୋପ୍‌ଙ୍କ ମୃତ୍ୟୁ ଖବର ପ୍ରଚାରିତ ହେବା ପରେ ସମଗ୍ର ବିଶ୍ୱର ନେତାମାନେ ଶୋକ ପ୍ରକାଶ କରିଛନ୍ତି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ତାଙ୍କ ଶୋକବାର୍ତ୍ତାରେ କହିଛନ୍ତି, ପୋପ୍‌ ଫ୍ରାନ୍‌ସିସ୍‌ ଓ ତାଙ୍କ ପ୍ରଶଂସକମାନଙ୍କୁ ଭଗବାନ ଆଶୀର୍ବାଦ କରନ୍ତୁ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଟ୍ୱିଟ୍ କରି ଲେଖିଛନ୍ତି, ମୁଁ ତାଙ୍କ ସହ ମୋର ସାକ୍ଷାତକୁ ସ୍ମରଣ କରୁଛି ଏବଂ ସର୍ବାଙ୍ଗୀନ ବିକାଶ ପାଇଁ ତାଙ୍କର ପ୍ରତିବଦ୍ଧତାରୁ ବହୁତ ପ୍ରେରଣା ପାଇଥିଲି। ଭାରତବାସୀଙ୍କ ପ୍ରତି ତାଙ୍କର ସ୍ନେହ ସର୍ବଦା ସ୍ମରଣୀୟ ରହିବ। ତାଙ୍କ ଆତ୍ମାକୁ ଅନନ୍ତ ଶାନ୍ତି ମିଳୁ। ସମାଜର ସବୁଠାରୁ ଦୁର୍ବଳ ସଦସ୍ୟଙ୍କ ପ୍ରତି ତାଙ୍କର ପ୍ରତିବଦ୍ଧତା, ନ୍ୟାୟ ଓ ସମନ୍ୱୟ ପାଇଁ ଫ୍ରାନ୍‌ସିସ୍‌ ସ୍ମରଣୀୟ ହୋଇ ରହିବେ ବୋଲି ଭାବୀ ଜର୍ମାନ ଚାନ୍ସେଲର ଫ୍ରେଡରିକ୍ ମେର୍ଜ କହିଛନ୍ତି।

ଇସ୍ରାଏଲ ରାଷ୍ଟ୍ରପତି ଆଇଜାକ୍ ହର୍ଜୋଗ୍ ପୋପ୍ ଫ୍ରାନ୍‌ସିସ୍‌ଙ୍କୁ ‘ଗଭୀର ବିଶ୍ୱାସ, ଶାନ୍ତି ଓ ଦୟାଶୀଳତାର ବ୍ୟକ୍ତି’ ଭାବେ ସ୍ମରଣ କରିଛନ୍ତି। ଫ୍ରାନ୍‌ସିସ୍‌ଙ୍କୁ ‘ପିପୁଲ୍ସ ପୋପ୍’ ଆଖ୍ୟା ଦେଇ ୟୁରୋପୀୟ ସଂଘର ସଭାପତି ରବର୍ଟା ମେଟ୍ସୋଲା ଲେଖିଛନ୍ତି, ପୋପ୍ ଫ୍ରାନ୍‌ସିସ୍‌ଙ୍କ ବିୟୋଗରେ ୟୁରୋପ ଶୋକ ପ୍ରକାଶ କରୁଛି। ତାଙ୍କ ହସ ସାରା ବିଶ୍ୱର କୋଟି କୋଟି ଲୋକଙ୍କ ହୃଦୟକୁ ଆକର୍ଷିତ କରିଥିଲା। ଜୀବନ ପ୍ରତି ଭଲପାଇବା, ଶାନ୍ତି, ଆଶା, ସମାନତା ଓ ସାମାଜିକ ନ୍ୟାୟ ପ୍ରତି ପ୍ରତିବଦ୍ଧତା ପାଇଁ ‘ପିପୁଲ୍ସ ପୋପ୍’ ସ୍ମରଣୀୟ ହୋଇ ରହିବେ। ସେ ଶାନ୍ତିରେ ରୁହନ୍ତୁ।

ବ୍ରିଟେନ ରାଜା ଚାର୍ଲସ ତୃତୀୟ, ବିଟ୍ରେନ ପ୍ରଧାନମନ୍ତ୍ରୀ ସାର୍‌ କେୟର ଷ୍ଟାରମର୍‌, ଇଟାଲୀ ପ୍ରଧାନମନ୍ତ୍ରୀ ଜର୍ଜିଆ ମେଲୋନି, ଆମେରିକା ଉପରାଷ୍ଟ୍ରପତି ଜେଡି ଭାନ୍ସ ଆଦି ଶୋକବ୍ୟକ୍ତ କରିଛନ୍ତି। ପ୍ରଥମ ଲାଟିନ ଆମେରିକୀୟ ଭାବେ ପୋପ୍‌ ଫ୍ରାନ୍‌ସିସ୍‌ ଖ୍ରୀଷ୍ଟ ଧର୍ମର ଏଭଳି ପଦରେ ଅବସ୍ଥାପିତ ହେବାର ସୌଭାଗ୍ୟ ଲାଭ କରିଥିଲେ। ଏଥିପାଇଁ ତାଙ୍କ ନିଜ ଦେଶ ଆର୍ଜେଣ୍ଟିନାରେ ୭ ଦିନ ପାଇଁ ରାଷ୍ଟ୍ରୀୟ ଶୋକ ଘୋଷଣା କରାଯାଇଛି। ସେହିଭଳି ବ୍ରାଜିଲ ମଧ୍ୟ ୭ ଦିନିଆ ରାଷ୍ଟ୍ରୀୟ ଶୋକ ଘୋଷଣା କରିଛି। ବ୍ରିଟେନର ରାଜ ପରିବାରରେ ୟୁନିୟନ ଜ୍ୟାକ ଅର୍ଦ୍ଧନମିତ ରଖାଯାଇଛି। ଏଥିସହିତ ଭାଟିକାନରେ ବ୍ରିଟିସ ଦୂତାବାସରେ ମଧ୍ୟ ୟୁନିୟନ ଜ୍ୟାକ ଅର୍ଦ୍ଧନମିତ ରଖାଯାଇଛି। ପୋପ୍‌ ଫ୍ରାନ୍‌ସିସ୍‌ଙ୍କ ମୃତ୍ୟୁରେ ଏଫିଲ୍‌ ଟାୱାରର ଆଲୋକକୁ ଆଜି ସନ୍ଧ୍ୟାରେ ବନ୍ଦ ରଖାଯାଇଛି।