ସଂସଦରେ ପାରିତ ହେଲା ଦିଲ୍ଲୀ ବିଲ୍‌: ସପକ୍ଷରେ ୧୩୧, ବିପକ୍ଷରେ ୧୦୨ ଭୋଟ୍‌

ନୂଆଦିଲ୍ଲୀ: ବିରୋଧୀଙ୍କ ବିତର୍କ ଏବଂ ବିରୋଧ ମଧ୍ୟରେ ବିବାଦୀୟ ଦିଲ୍ଲୀ ସର୍ଭିସ ସଂଶୋଧନ ବିଲ୍‌ ଆଜି ରାଜ୍ୟସଭାରେ ଗୃହୀତ ହୋଇଛି। ବିଲ୍‌ ସପକ୍ଷରେ ୧୩୧ ଏବଂ ବିପକ୍ଷରେ ୧୦୨ଟି ଭୋଟ୍‌ ମିଳିଛି। ଏହା ପୂର୍ବରୁ ଗତ ଗୁରୁବାର ଦିନ ଲୋକସଭାରେ ଏହି ବିଲ୍‌ ଗୃହୀତ ହୋଇଥିଲା। କେନ୍ଦ୍ର ଗୃହ ମନ୍ତ୍ରୀ ଅମିତ ଶାହ ଆଜି ରାଜ୍ୟସଭାରେ ଦିଲ୍ଲୀ ସେବା ନିଯୁକ୍ତି ବିଲ୍‌ ଆଗତ କରିଥିଲେ। ସେ ବିଲ୍‌ ସପକ୍ଷରେ ଯୁକ୍ତି ବାଢ଼ି କହିଥିଲେ , ଦିଲ୍ଲୀ ସର୍ଭିସ ବିଲ୍‌ ସୁପ୍ରିମକୋର୍ଟଙ୍କ ରାୟର ଉଲ୍ଲଂଘନ କରିନାହିଁ। କଂଗ୍ରେସ ଶାସନ ସମୟରେ ଦିଲ୍ଲୀ ସରକାରଙ୍କ ନିକଟରେ ଯେଉଁ କ୍ଷମତା ଥିଲା ବିଲ୍‌ ସେହି ସମାନ କ୍ଷମତା ସରକାରଙ୍କୁ ପ୍ରଦାନ କରିଛି। ଶାହ କହିଛନ୍ତି, କଂଗ୍ରେସ କ୍ଷମତାରେ ଥିବାବେଳେ ଏହି ବିଲ୍‌କୁ ସମର୍ଥନ କରିଥିଲା। କିନ୍ତୁ ଏବେ ଏହି ଦଳ ଆପ୍‌କୁ ସନ୍ତୁଷ୍ଟ କରିବାପାଇଁ ବିଲ୍‌କୁ ବିରୋଧ କରିଛି। ଏବେ ସେମାନେ ଆପ୍‌ର କୋଳରେ ବସିଛନ୍ତି ବୋଲି ଶାହ କହିଛନ୍ତି। ଦିଲ୍ଲୀରେ ବରିଷ୍ଠ ଅଫିସରଙ୍କ ନିଯୁକ୍ତି ଏବଂ ବଦଳି କ୍ଷେତ୍ରରେ ନିୟନ୍ତ୍ରଣ ପାଇଁ କେନ୍ଦ୍ର ସରକାର ଆଣିଥିବା ଅଧ୍ୟାଦେଶକୁ ଆଇନରେ ପରିଣତ କରିବାପାଇଁ ଉକ୍ତ ବିଲ୍‌ ଅଣାଯାଇଛି। ଆପ୍‌ ସାଂସଦ ରାଘବ ଚଢ଼ା କହିଛନ୍ତି, ଏହି ବିଲ୍‌ ହେଉଛି ଏକ ରାଜନୈତିକ ଜାଲିଆତି ଏବଂ ଏକ ସାମ୍ବିଧାନିକ ପାପ। ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଦିଲ୍ଲୀ ସେବା ନିଯୁକ୍ତି ବିଲ୍‌କୁ ‘କଳା ବିଲ୍‌ ’ କହିଛନ୍ତି।

ଉଲ୍ଲେଖଯୋଗ୍ୟ ଯେ ସଂସଦ ମୌସୁମୀ ଅଧିବେଶନର ଚୂଡ଼ାନ୍ତ ସପ୍ତାହର ପ୍ରଥମ ଦିନ‌ କାର୍ଯ୍ୟ ଆଜି ପ୍ରବଳ ବିତର୍କ ମଧ୍ୟରେ ଆରମ୍ଭ ହୋଇଥିଲା। କିନ୍ତୁ ଉଭୟ ଗୃହରେ ଆଜି ପ୍ରବଳ ହୋହଲ୍ଲା ଏବଂ ହଟ୍ଟଗୋଳ ହେଖିବାକୁ ମିଳିଥିଲା। ଆଜି ଦିନରେ ରାଜ୍ୟସଭା ପ୍ରଥମେ ଅପରାହ୍ନ ୨ଟା ପର୍ଯ୍ୟନ୍ତ ମୁଲତବୀ ରହିଥିଲା। ରାଜସ୍ଥାନରେ ୧୪ ବର୍ଷୀୟା ନାବାଳିଳାକୁ ଗଣଦୁଷ୍କର୍ମ ପ୍ରସଙ୍ଗରେ ଗୃହରେ ଆଲୋଚନା ପାଇଁ ଶାସକ ଦଳର ସଦସ୍ୟମାନେ ଦାବି କରିବାପରେ ବିରୋଧୀ ସଦସ୍ୟ ପ୍ରବଳ ହୋହଲ୍ଲା କରିଥିଲେ। ସେମାନେ ମଣିପୁର ପ୍ରସଙ୍ଗରେ ଆଲୋଚନା ଦାବି କରିଥିଲେ। ଫଳରେ ଗୃହକୁ ଅପରାହ୍ନ ୨ଟା ପର୍ଯ୍ୟନ୍ତ ମୁଲତବୀ ରଖାଯାଇଥିଲା।

ଅନ୍ୟପକ୍ଷେ ଆଜି ଲୋକସଭାରେ ୪ଟି ବିଲ୍‌ ଗୃହୀତ ହୋଇଛି। ଇଲେକ୍ଟ୍ରୋନିକ୍ସ ଏବଂ ଆଇଟି ମନ୍ତ୍ରୀ ଅଶ୍ବିନୀ ବୈଷ୍ଣବ ଆଜି ଲୋକସଭାରେ ଡିଜିଟାଲ୍‌ ପର୍ସନାଲ ଡାଟା‌ ପ୍ରୋଟେକ୍ସନ୍‌ ବିଲ୍‌ (ଡିପିଡିପି) ଆଗତ କରିଥିଲେ। ବିରୋଧୀଙ୍କ ପ୍ରବଳ ହୋହଲ୍ଲା ମଧ୍ୟରେ ଆଜି ଏହି ବିଲ୍‌ ଲୋକସଭାରେ ଗୃହୀତ ହୋଇଯାଇଛି। ସେହିପରି ଅନୁସନ୍ଧାନ ନେସନାଲ ରିସର୍ଚ୍ଚ ଫାଉଣ୍ଡେସନ ବିଲ୍‌-୨୦୨୩ , ଫାର୍ମାସି (ଆମେଣ୍ଡମେଣ୍ଟ୍‌) ବିଲ୍‌-୨୦୨୩ ଏବଂ ମେଡିଏସନ ବିଲ୍‌-୨୦୨୩ ମଧ୍ୟ ଲୋକସଭାରେ ଗୃହୀତ ହୋଇଛି।

ଆଜି ଅନାସ୍ଥା ପ୍ରସ୍ତାବ ଉପରେ ଆଲୋଚନା

ନୂଆଦିଲ୍ଲୀ : ସଂସଦରେ ଆସନ୍ତାକାଲି ଅନାସ୍ଥା ପ୍ରସ୍ତାବ ଉପରେ ଆଲୋଚନା ହେବ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବିରୋଧରେ ଏହା ଦ୍ବିତୀୟ ଅନାସ୍ଥା। କଂଗ୍ରେସ ନେତା ରାହୁଲ ଗାନ୍ଧି ତାଙ୍କ ସଂସଦ ସଦସ୍ୟତା ଫେରି ପାଇଥିବାରୁ ସେ ଅନାସ୍ଥା ପ୍ରସ୍ତାବ ଆଲୋଚନାରେ ଭାଗ ନେବେ। ତେବେ ମଣିପୁର ହିଂସା ପ୍ରସଙ୍ଗରେ ରାହୁଲ ଗାନ୍ଧି କ’ଣ କହୁଛନ୍ତି ତା’ ଉପରେ ସମସ୍ତଙ୍କର ନଜର ରହିଛି। ଆସନ୍ତାକାଲି ଏବଂ ବୁଧବାର ୨ ଦିନ ଅନାସ୍ଥା ପ୍ରସ୍ତାବ ଉପରେ ଗୃହରେ ଆଲୋଚନା ହେବ ଏବଂ ଗୁରୁବାର ଦିନ ମୋଦୀ ଜବାବ ରଖିବେ। ଉଲ୍ଲେଖଯୋଗ୍ୟ ଯେ ଇଣ୍ଡିଆ ମେଣ୍ଟର ସଦସ୍ୟଙ୍କ ଦ୍ବାରା ଅଣାଯାଇଥିବା ଅନାସ୍ଥାକୁ ଗତ ସପ୍ତାହରେ ଲୋକସଭା ବାଚସ୍ପତି ଓମ୍‌ ବିର୍ଲା ଗ୍ରହଣ କରିଥିଲେ। ବିରୋଧୀଙ୍କ ନିକଟରେ ସଂଖ୍ୟା ନଥିଲେ ବି ସେମାନେ ମଣିପୁର ପ୍ରସଙ୍ଗରେ ଆଲୋଚନା ମାଧ୍ୟମରେ ସରକାରଙ୍କୁ ହରାଇବେ ବୋଲି ଦୃଢ଼ୋକ୍ତି ବାଢ଼ିଛନ୍ତି।