ଅହମଦାବାଦରେ ପୂରା ପରିବାର ନିଶ୍ଚିହ୍ନ: ଭଡ଼ାଘରୁ ଦମ୍ପତି ଓ ୩ ପିଲାଙ୍କ ମୃତଦେହ ଉଦ୍ଧାର

ଅହମଦାବାଦ: ଅହମଦାବାଦର ବଗୋଦରାରେ ଆଜି ଏକ ଅଭାବନୀୟ ଘଟଣାକ୍ରମରେ ଗୋଟିଏ ପରିବାରର ସମସ୍ତ ସଦସ୍ୟଙ୍କ ମୃତ୍ୟୁ ହୋଇଛି। ଜଣେ ଦମ୍ପତି ଏବଂ ୩ ପିଲାଙ୍କ ମୃତଦେହ ସେମାନଙ୍କ ଭଡ଼ାଘରୁ ମିଳିଛି। ଉକ୍ତ ଦମ୍ପତି ସେମାନଙ୍କ ୨ ଝିଅ ଏବଂ ଗୋଟିଏ ପୁଅକୁ ବିଷ ଦେବାପରେ ନିଜେ ଆତ୍ମହତ୍ୟା କରିଦେଇଛନ୍ତି ବୋଲି ସନ୍ଦେହ କରାଯାଉଛି।  ବିପୁଲ ବଘେଲ (୩୨) ଅଟୋ ରିକ୍ସା ଚଳାନ୍ତି। ସେ ପ୍ରବଳ ଋଣ ଚାପରେ ଥିଲେ। ଆର୍ଥିକ ସଙ୍କଟ ପାଇଁ ବିପୁଲ ବଘେଲ ଏବଂ ତାଙ୍କ ପତ୍ନୀ ନିଜ ପିଲାମାନଙ୍କୁ ବିଷ ଦେଇ ମାରିବାପରେ ନିଜେ ଆତ୍ମହତ୍ୟା କରିଦେଇଛନ୍ତି ବୋଲି ସନ୍ଦେହ କରାଯାଉଛି।  ପୁଲିସ ଅନୁଯାୟୀ ଆଜି ସକାଳେ ଉକ୍ତ ଦମ୍ପତି ଏବଂ ସେମାନଙ୍କ ୩ ପିଲାମାନଙ୍କର ମୃତଦେହ ମିଳିଥିଲା। ତୁରନ୍ତ ହସ୍ପିଟାଲ୍‌ ନେବାପରେ ଡାକ୍ତର ସେମାନଙ୍କୁ ମୃତ ଘୋଷଣା କରିଥିଲେ।

ବିପୁଲ, ତାଙ୍କ ପତ୍ନୀ ସୋନଲ ବଘେଲା (୨୬) ଏବଂ ୩ ପିଲା କରିନା (୧୧), ମୟୂର (୮) ଏବଂ ପ୍ରିନ୍ସି (୫)ଙ୍କ ମର ଶରୀର ବ୍ୟବଚ୍ଛେଦ ପାଇଁ ପଠାଯାଇଛି।  ଉକ୍ତ ଦମ୍ପତି କେଉଁ କାରଣ ପାଇଁ ଏଭଳି ଚରମ ପଦକ୍ଷେପ ନେଲେ ସେନେଇ ପୁଲିସ ତଦନ୍ତ ଚଳାଇଛି।  ସୂଚନାନୁଯାୟୀ ସେମାନେ ଢୋଲ୍‌କା ଅଞ୍ଚଳର କିନ୍ତୁ ବଗୋଦରାର ଏକ ଭଡ଼ା ଘରେ ରହୁଥିଲେ। ବିପୁଲ ଅଟୋରିକ୍ସା ଚଳାଉଥିଲେ। ସେ ତାଙ୍କ ପରିବାରର ଏକମାତ୍ର ରୋଜଗାରିଆ ବ୍ୟକ୍ତି।  ଜଣେ ସମ୍ପର୍କୀୟ କହିଛନ୍ତି, ବିପୁଲ ଋଣ କରି ଅଟୋ କିଣିଥିଲେ କିନ୍ତୁ ଏହାର ଇଏମ୍‌ଆଇ ସେ ଦେଇପାରୁନଥିଲେ।  ଆର୍ଥିକ ସଙ୍କଟ ପାଇଁ ସେ ପ୍ରବଳ ଚାପରେ ଥିଲେ। ଏହି କାରଣ ପାଇଁ ସେ ଆତ୍ମହତ୍ୟା କରିଥାଇପାରନ୍ତି।