ଲୋକସଭାରେ ବିନା ଆଲୋଚନାରେ ଗୃହୀତ ହେଲା ବ୍ୟୟମଂଜୁରି ବିଲ୍
ସାଂସଦମାନେ ଉଠାଇପାରିଲେନି ରାଜ୍ୟ ସ୍ବାର୍ଥ ସମ୍ବନ୍ଧିତ ଦାବି
ନୂଆଦିଲ୍ଲୀ: ଲୋକସଭାରେ ହଙ୍ଗାମା, ସ୍ଲୋଗାନବାଜି ଓ ହୋହଲ୍ଲା ଲଗାତାର ଜାରିରହିବା ପରେ ଗତକାଲି ବିନା ବିତର୍କ ଓ ଆଲୋଚନାରେ ବ୍ୟୟମଂଜୁରି ବିଲ୍ ପାରିତ ହୋଇଥିଲା। ଆଜି ଅନୁରୂପ ଭାବେ ଅର୍ଥ ବିଲ୍ ଗୃହୀତ ହୋଇଛି। ବିନା ଆଲୋଚନାରେ ୨୦୨୩-୨୪ ବଜେଟକୁ ଅନୁମୋଦନ କରିବା ସବୁଠାରୁ ପରିତାପର ବିଷୟ ବୋଲି କହିଛନ୍ତି ବିଜେଡି ସାଂସଦ ଚନ୍ଦ୍ରଶେଖର ସାହୁ। ‘ସମ୍ବାଦ’ ପ୍ରତିନିଧିଙ୍କ ସହ ଆଲୋଚନା ବେଳେ ଶ୍ରୀ ସାହୁ କହିଛନ୍ତି, ଚଳିତ ବଜେଟ ଅଧିବେଶନର ଦ୍ବିତୀୟ ପର୍ଯ୍ୟାୟରେ ମନ୍ତ୍ରାଳୟୱାରି ଆଲୋଚନା ବେଳେ ରେଳ ଓ ଗ୍ରାମୀଣ ବିକାଶ ପ୍ରସଙ୍ଗ ବିତର୍କରେ ଭାଗ ନେବା ପାଇଁ ଦଳପକ୍ଷରୁ ନିର୍ଦ୍ଦେଶ ରହିଥିଲା। ଆଲୋଚନା ହୋଇଥିଲେ ରାଜ୍ୟକୁ ରେଳ ଅବହେଳା ନେଇ ସେ କେନ୍ଦ୍ର ସରକାରଙ୍କ ଦୃଷ୍ଟି ଆକର୍ଷଣ କରିଥାନ୍ତେ। ଲଗାତାର ସଦନ କାର୍ଯ୍ୟରେ ବାଧା ସୃଷ୍ଟି ହେବା ଓ ବିନା ଆଲୋଚନାରେ ବିଲଗୁଡ଼ିକୁ ପାରିତ କରାଯିବା ବିଶେଷଭାବେ ତାଙ୍କୁ ବ୍ୟଥିତ କରିଛି ବୋଲି ଶ୍ରୀ ସାହୁ କହିଛନ୍ତି।
Sambad is now on WhatsApp
Join and get latest news updates delivered to you via WhatsApp
ଅନ୍ୟ ପକ୍ଷରେ ଦେଶର ମଙ୍ଗଳ ଓ ଜନହିତକୁ ସରକାର ଦୃଷ୍ଟିରେ ରଖି ବିନା ବିତର୍କରେ ବ୍ୟୟମଂଜୁରି ବିଲ୍ ଅର୍ଥ ବିଲକୁ ପାରିତ କରିବା ଛଡା ଅନ୍ୟ କୌଣସି ବିକଳ୍ପ ନଥିଲା ବୋଲି କହିଛନ୍ତି ବିଜେପି ସାଂସଦ ବସନ୍ତ କୁମାର ପଣ୍ଡା। କଂଗ୍ରେସ ଓ ଅନ୍ୟ ବିରୋଧୀ ଦଳମାନଙ୍କ ଦ୍ବାରା କ୍ରମାଗତ ହଙ୍ଗାମା ଯୋଗୁଁ ସଦନରେ ଅଚଳାବସ୍ଥା ସୃଷ୍ଟି ହୋଇଥିଲା। ସଂସଦରେ ଅଚଳାବସ୍ଥା ଜାରି ରହିବା ଯୋଗୁଁ ସେ ତାଙ୍କ ସଂସଦୀୟ କ୍ଷେତ୍ରର ସମସ୍ୟାକୁ ଉପସ୍ଥାପନ କରିପାରିନଥିବାରୁ ଅତ୍ୟନ୍ତ ଦୁଃଖୀ ଓ ମର୍ମାହତ ବୋଲି ଶ୍ରୀ ପଣ୍ଡା କହିଛନ୍ତି। ଉଭୟ ଗୃହରେ ଅଚଳାବସ୍ଥା ଜାରି ରହିଥିବାରୁ ଆବଶ୍ୟକୀୟ ବିଲ୍ଗୁଡିକୁ ବିନା ଆଲୋଚନାରେ ପାରିତ କରିବା ପାଇଁ ସରକାରଙ୍କ ଯୋଜନା ରହିଛି। ସରକାରଙ୍କ ଏଭଳି ପ୍ରକ୍ରିୟାକୁ ନାପସନ୍ଦ କରାଯାଇଛି।