ଜମ୍ମୁ-କଶ୍ମୀର ସରକାର ଉନ୍ନୟନ ପ୍ରକଳ୍ପ ପାଇଁ ଦୁବାଇ ସହ ଏମ୍‌ଓୟୁ ସ୍ବାକ୍ଷର କଲେ

ଶ୍ରୀନଗର: ନିକଟରେ ଆତଙ୍କବାଦୀଙ୍କ ଦ୍ବାରା ସଂଘଟିତ ଅଣକଶ୍ମୀରୀଙ୍କ ଟାର୍ଗେଟେଡ୍ କିଲିଂ ଓ ହିଂସାକାଣ୍ଡ ଦ୍ବାରା ନିରୁତ୍ସାହିତ ନ ହୋଇ ଜମ୍ମୁ-କଶ୍ମୀର ସରକାର ରାଜ୍ୟର ବିଭିନ୍ନ ଉନ୍ନୟନମୂଳକ ପ୍ରକଳ୍ପ ପାଇଁ ଦୁବାଇ ସରକାରଙ୍କ ସହ ବୁଝାମଣାପତ୍ର (ଏମ୍‌ଓୟୁ) ସ୍ବାକ୍ଷର କରିଛନ୍ତି। ପ୍ରାପ୍ତ ରିପୋର୍ଟ ଅନୁସାରେ କେନ୍ଦ୍ରଶାସିତ ଅଞ୍ଚଳରେ ରିୟଲ ଇଷ୍ଟେଟ୍ ବିକାଶ, ଇଣ୍ଡଷ୍ଟ୍ରିଆଲ ପାର୍କ, ଆଇଟି ଟାୱାର, ବହୁମୁଖୀ ଟାୱାର, ଯୋଗାଣ ଓ ପରିବହନ ବ୍ୟବସ୍ଥା, ମେଡିକାଲ କଲେଜ, ସୁପର ସ୍ପେଶାଲିଟି ହସ୍ପିଟାଲ ଓ ଆହୁରି କେତେକ ପ୍ରକଳ୍ପ ପାଇଁ ଏହି ବୁଝାମଣାପତ୍ର ସ୍ବାକ୍ଷରିତ ହୋଇଛି ବୋଲି ସୋମବାର ଉପରାଜ୍ୟପାଳ ମନୋଜ ସିହ୍ନା କହିଛନ୍ତି। କେନ୍ଦ୍ର ଶିଳ୍ପ ଓ ବାଣିଜ୍ୟ ମନ୍ତ୍ରୀ ପୀୟୂଷ ଗୋୟଲ ମଧ୍ୟ ଉକ୍ତ ଅବସରରେ ରାଜଭବନରେ ଉପସ୍ଥିତ ଥିଲେ।

ମନ୍ତ୍ରୀ ଗୋୟଲ ସାମ୍ବାଦିକମାନଙ୍କୁ କହିଛନ୍ତି ଯେ, ସେ ନିକଟରେ ଦୁବାଇ ଗସ୍ତ କରିଥିବା ଅବସରରେ କିଙ୍ଗ ସୁଲତାନ ଅହମଦ ଭାରତ ଗସ୍ତରେ ଆସିବା ଏବଂ ବିଶେଷତଃ ଜମ୍ମୁ-କଶ୍ମୀରରେ ରିୟଲ ଇଷ୍ଟେଟ ବ୍ୟବସାୟରେ ପୁଞ୍ଜିନିବେଶ କରିବାକୁ ଇଚ୍ଛା ପ୍ରକାଶ କରିଥିଲେ। ଏହି ପ୍ରସ୍ତାବରେ ସେ ସମ୍ମତି ପ୍ରକାଶ କରିବା ସହ ଅହମଦଙ୍କୁ ଭାରତ ଆମନ୍ତ୍ରଣ କରିଥିଲେ। ଏ ଏମ୍‌ଓୟୁଗୁଡ଼ିକ ହେଉଛି ତା’ରି ଏକ ଫଳ। ବର୍ତ୍ତମାନ ଦୁବାଇରୁ ଲୋକ ଜମ୍ମୁ-କଶ୍ମୀର ଆସିବେ ଏବଂ କେନ୍ଦ୍ରଶାସିତ ଅଞ୍ଚଳରେ ପର୍ଯ୍ୟଟନ ଓ ରିୟଲ ଇଷ୍ଟେଟ୍ ବ୍ୟବସାୟରେ ବୃଦ୍ଧି ଘଟିବ ବୋଲି ଗୋୟଲ କହିଥିଲେ।

ସମ୍ବନ୍ଧିତ ଖବର