ନୂଆଦିଲ୍ଲୀ: ରୁଷ ରାଜଧାନୀ ମସ୍କୋର ରେଡ୍ ସ୍କୋୟାରରେ ଶକ୍ତି ପ୍ରଦର୍ଶନ କଲା କ୍ରେମଲିନ । ୟୁକ୍ରେନ ସହ ଯୁଦ୍ଧ ମଧ୍ୟରେ ରୁଷିଆ ସୋମବାର ୭୭ତମ ବିଜୟ ଦିବସ ପାଳନ କରିଛି । ରୁଷ ସେନା ପାୱାରଫୁଲ ଏୟାର ସୋ ଓ ପରେଡ କରି ପୁଣି ଥରେ ପୂରା ବିଶ୍ୱ ନିକଟରେ ନିଜର ଶକ୍ତି ଦେଖାଇଛି । ବିଜୟ ଦିବସରେ ରୁଷ ସେନାର ଥର୍ମାନ୍ୟୁକ୍ଲିୟର ମିସାଇଲ, ୧୩୦ଟି ଅସ୍ତ୍ରଶସ୍ତ୍ର ସଜ୍ଜିତ ଯୁଦ୍ଧଯାନ, ୩୪ଟି ଟ୍ୟାଙ୍କ, ଟି-୯୦ ପରଭ୍ୟୁ ଯୁଦ୍ଧ ଟ୍ୟାଙ୍କ, ଅତ୍ୟାଧୁନିକ ଏସ ୪୦୦ ମିସାଇଲ ଡିଫେନ୍ସ ସିଷ୍ଟମ ପରେଡରେ ସାମିଲ ହୋଇଥିଲେ।
Sambad is now on WhatsApp
Join and get latest news updates delivered to you via WhatsApp
ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ ବିଜୟ ଦିବସ ସମାରୋହରେ ଯୋଗ ଦେଇ ସେନାକୁ ସମ୍ବୋଧିତ କରିଛନ୍ତି । ଏଥିସହ ସେନା କମାଣ୍ଡରଙ୍କୁ ଭେଟି ସେମାନଙ୍କ ମନୋବଳ ବଢ଼ାଇଛନ୍ତି । ଏହି ସମୟରେ ପୁଟିନ ୟୁକ୍ରେନ ସହ ଚାଲିଥିବା ଯୁଦ୍ଧକୁ ନେଇ ମଧ୍ୟ ନିଜର ବୟାନ ରଖିଛନ୍ତି । ୟୁକ୍ରେନ ବିରୋଧରେ ରୁଷିଆର ସେନା କାର୍ଯ୍ୟାନୁଷ୍ଠାନ ଏକ ଉଚିତ ପଦକ୍ଷେପ ବୋଲି କହିଛନ୍ତି ରୁଷ ରାଷ୍ଟ୍ରପତି । ପୁଟିନ କହିଛନ୍ତି, ଏହାଦ୍ୱାରା ପାଶ୍ଚାତ୍ୟ ନୀତିକୁ ଠିକ ସମୟରେ ଉଚିତ ଜବାବ ଦିଆଯିବା ସମ୍ଭବପର ହୋଇଛି ।
ବିଜୟ ଦିବସ ସମାରୋହରେ ଯୋଗ ଦେଇ ପୁଟିନ ଏକଥା ବି କହିଛନ୍ତି କି ରୁଷ ସେନା ନିଜ ମାତୃଭୂମିର ସୁରକ୍ଷା ପାଇଁ ଲଢୁଛି । ହିଟଲରଙ୍କ ଭଳି ୟୁକ୍ରେନକୁ ମଧ୍ୟ ରୁଷିଆ ଜବାବ ଦେବ ବୋଲି ପୁଟିନ କହିଛନ୍ତି । ଏହି ସମୟରେ ନାଟୋ ଦେଶଙ୍କୁ ରୁଷ ପାଇଁ ବିପଦର ଦେଶ ବୋଲି କହିଛନ୍ତି ପୁଟିନ । ପାଶ୍ଚାତ୍ୟଦେଶ ରୁଷ ସୀମାରେ ହତିଆର ଠୁଳ କରୁଛନ୍ତି । ତେଣୁ ଶତ୍ରୁଦେଶଙ୍କୁ ରୁଷ ମୁହଁତୋଡ ଜବାବ ଦେବ ବୋଲି ଚେତାବନୀ ଦେଇଛନ୍ତି ରୁଷ ରାଷ୍ଟ୍ରପତି। ବିଜୟ ଦିବସରେ ନାଟୋଦେଶମାନଙ୍କୁ ୟୁକ୍ରେନ୍ ଆକ୍ରମଣ ପାଇଁ ସିଧାସଳଖ ଦାୟୀ କରିଛନ୍ତି ରୁଷ ରାଷ୍ଟ୍ରପତି ପୁଟିନ । ପୁଟିନ କହିଛନ୍ତି, ରୁଷ ଉପରେ ନାଟୋ ଦେଶମାନେ ଆକ୍ରମଣ ଯୋଜନା କରୁଥିଲେ । ତେଣୁ ସମ୍ଭାବ୍ୟ ଆକ୍ରମଣକୁ ରୋକିବା ପାଇଁ ରୁଷ ଯଥା ସମୟରେ ପଦକ୍ଷେପ ନେଇଛି ।
ସୂଚନାଯୋଗ୍ୟ ଯେ, ପ୍ରତିବର୍ଷ ମେ ୯ ତାରିଖକୁ ବିଜୟ ଦିବସ ଭାବେ ରୁଷ ପାଳନ କରି ଆସୁଛି । ମେ ୯ରେ ୨ୟ ବିଶ୍ୱଯୁଦ୍ଧରେ ଜର୍ମାନୀକୁ ପରାସ୍ତ କରିଥିଲା ସୋଭିଏତ ସଂଘ । ଏହି ଦିନ ବର୍ଲିନ ସମ୍ପୂର୍ଣ୍ଣଭାବେ ସୋଭିଏତ ସେନା ନିୟନ୍ତ୍ରଣକୁ ଆସିଥିଲା । ମେ ୯ ତାରିଖରେ ୨ୟ ବିଶ୍ୱଯୁଦ୍ଧ ଓ ହିଟଲର ଶାସନର ଅନ୍ତ ହୋଇଥିଲା ।