ପୂର୍ବ ସ୍ଥିତିକୁ ଫେରିଲା ଏଲ୍ଏସି, ୩ ବିବାଦୀୟ ଅଂଚଳରୁ ଚୀନ୍ ସେନା ହଟିଲା
ନୂଆଦିଲ୍ଲୀ: ସୀମାରେ ଉତ୍ତେଜନା ହ୍ରାସ ପାଇଁ ଭାରତ ଓ ଚୀନ୍ ମଧ୍ୟରେ ସଂଘଟିତ କୂଟନୈତିକ ଓ କମାଣ୍ଡରସ୍ତରୀୟ ଆଲୋଚନାର ଅଂଶସ୍ବରୂପ ବୁଧବାର ଚୀନୀ ସେନା ଲଦାଖର ଗଲୱାନ, ପେଙ୍ଗଙ୍ଗ୍ ଏବଂ ଉଷ୍ମ ପ୍ରସ୍ରବଣ ନିକଟ ସମସ୍ତ ପାଟ୍ରୋଲିଂ ପଏଣ୍ଟ୍ ଇଲାକାରୁ ଦୁଇ କିମି ପଛକୁ ହଟିଛି ଏବଂ ସେଠାରେ ସେନା ପ୍ରତ୍ୟାହାର ପ୍ରକ୍ରିୟା ଶେଷ ହୋଇଛି। ତେବେ ଏହା ସତ୍ତ୍ବେ ଆଗାମୀ ଦୁଇ ଦିନ ପର୍ଯ୍ୟନ୍ତ ସ୍ଥିତି ଉପରେ କଡ଼ା ନଜର ରଖାଯିବ ବୋଲି ଭାରତୀୟ ସେନାର ବରିଷ୍ଠ ଅଧିକାରୀମାନେ କହିଛନ୍ତି। ଆସନ୍ତାକାଲି ସୁଦ୍ଧା ଗୋଗ୍ରା ଅଞ୍ଚଳରେ ଏହି ପ୍ରକ୍ରିୟା ସଂପନ୍ନ ହେବ ଏବଂ ଚୀନୀ ସେନାକୁ ସମଗ୍ର ଗୋଗ୍ରା ଅଞ୍ଚଳରୁ ମଧ୍ୟ ଅନୁରୂପ ଭାବେ ୨ କିମି ପଛକୁ ହଟିବାକୁ ପଡ଼ିବ ବୋଲି ଜଣାପଡ଼ିଛି।
Sambad is now on WhatsApp
Join and get latest news updates delivered to you via WhatsApp
ଏବେ ଏଲ୍ଏସିର ବିବାଦୀୟ ଅଂଚଳରେ ସ୍ଥିତି ସଂପୂର୍ଣ୍ଣ ସ୍ବାଭାବିକ ହେବା ସହ ଏହା ପୂର୍ବ ସ୍ଥିତିକୁ ଫେରିଆସିଛି। ଦୁଇ ଦେଶର ସ୍ବତନ୍ତ୍ର ପ୍ରତିନିଧି ଭାବେ ଚୀନୀ ବିଦେଶ ମନ୍ତ୍ରୀ ଵାଙ୍ଗ୍ ଵାଇ ଏବଂ ଭାରତର ଜାତୀୟ ନିରାପତ୍ତା ପରାମର୍ଶଦାତା ଅଜିତ ଡୋଭାଲଙ୍କ ମଧ୍ୟରେ ଗତ ରବିବାର ସନ୍ଧ୍ୟାରେ ସୀମା ବିବାଦର ସମାଧାନ ଦିଗରେ ଗଠନମୂଳକ ଆଲୋଚନା ପରେ ଚୀନ୍ ସେନା ପକ୍ଷରୁ ଏପରି ସକାରାତ୍ମକ ପଦକ୍ଷେପ ନିଆଯାଇଛି।