ନୂଆ ପ୍ରଜାତିର କରୋନା ଭୁତାଣୁ ଭାରତରେ ଏ ପର୍ଯ୍ୟନ୍ତ ଚିହ୍ନଟ ହୋଇନାହିଁ : ସ୍ବାସ୍ଥ୍ୟ ମନ୍ତ୍ରାଳୟ
ନୂଆଦିଲ୍ଲୀ : କରୋନା ଭୁତାଣୁର ନୂଆ ମ୍ୟୁଟାଣ୍ଟ (ପରିବର୍ତ୍ତିତ ପ୍ରଜାତି) ଏ ଏପର୍ଯ୍ୟନ୍ତ ଭାରତରେ ଚିହ୍ନଟ ହୋଇନାହିଁ । ଲଣ୍ଡନରେ ଚିହ୍ନଟ ହୋଇଥିବା ଏହି ଭୁତାଣୁ ଦ୍ରୁତ ଗତିରେ ସଂକ୍ରମିତ ହେଉଛି । କିନ୍ତୁ ଏହା ଦ୍ବାରା ଆମ ଦେଶରେ ତିଆରି ହେଉଥିବା ଟିକା କୌଣସି ପ୍ରକାରେ ପ୍ରଭାବିତ ହେବ ନାହିଁ ବୋଲି ନିତି ଆୟୋଗ (ସ୍ବାସ୍ଥ୍ୟ) ସଦସ୍ୟ ଡ. ଭି.କେ.ପଲ କହିଛନ୍ତି ।
କେନ୍ଦ୍ର ସ୍ବାସ୍ଥ୍ୟ ମନ୍ତ୍ରାଳୟ ପକ୍ଷରୁ ଆୟୋଜିତ ସାମ୍ବାଦିକ ସମ୍ମିଳନୀରେ ସେ କହିଛନ୍ତି ଯେ ନୂଆ କରୋନା ଭୁତାଣୁ ଆସିବା ପରେ ମୃତ୍ୟୁହାର ବୃଦ୍ଧି ପାଇଥିବା ଦେଖାଯାଇନାହିଁ । ଏଣୁ ଏହାକୁ ନେଇ ସେତେଟା ଆତଙ୍କିତ ହେବାର ଆବଶ୍ୟକତା ନାହିଁ । ତେବେ ଆମକୁ ସତର୍କ ରହିବାକୁ ହେବ ।
Sambad is now on WhatsApp
Join and get latest news updates delivered to you via WhatsApp
ଏହି ଅବସରରେ କେନ୍ଦ୍ର ସ୍ବାସ୍ଥ୍ୟ ସଚିବ ରାଜେଶ ଭୁଷଣ କହିଛନ୍ତି ଯେ, ଦେଶରେ ସକ୍ରିୟ ଆକ୍ରାନ୍ତଙ୍କ ସଂଖ୍ୟା ତିନି ଲକ୍ଷ ତଳକୁ ଖସିଯାଇଛି । ସେହିପରି ସକ୍ରିୟ ଆକ୍ରାନ୍ତ ସଂଖ୍ୟା ମୋଟ ଆକ୍ରାନ୍ତ ସଂଖ୍ୟାର ୩ ପ୍ରତିଶତରୁ କମ ରହିଛି । ଗତ ୭ ସପ୍ତାହ ହେଲା ଦେଶରେ ଦୈନିକ ହାରାହାରି ନୂଆ ଆକ୍ରାନ୍ତଙ୍କ ସଂଖ୍ୟା ହ୍ରାସ ପାଇଚାଲିଛି । ଏହା ସହିତ ଆରୋଗ୍ୟ ହାର ୯୫ ପ୍ରତିଶତକୁ ଟପିଯାଇଛି । ଗତ ୨୪ ଘଣ୍ଟାରେ ଚିହ୍ନଟ ହୋଇଥିବା ନୂଆ ଆକ୍ରାନ୍ତଙ୍କ ମଧ୍ୟରୁ ୫୭ ପ୍ରତିଶତ ମଧ୍ୟପ୍ରଦେଶ ତାମିଲନାଡ଼ୁ,ଛତିଶଗଡ଼,ପଶ୍ଚିମବଙ୍ଗ,ମହାରାଷ୍ଟ୍ର ଓ କେରଳରେ ଦେଖାଯାଇଛି ବୋଲି ସେ କହିଛନ୍ତି ।