କର୍ଣ୍ଣାଟକରେ ମୁଖ୍ୟମନ୍ତ୍ରୀ ପଦ ଏବେ ଖାଲି ନାହିଁ: ସିଦ୍ଦରମୈୟା‌

ବେଙ୍ଗାଲୁରୁ: କର୍ଣ୍ଣାଟକରେ ନେତୃତ୍ବ ପରିବର୍ତ୍ତନ ନେଇ କଳ୍ପନା ଜଳ୍ପନା ଜାରି ରହିଥିବାବେଳେ କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଦରମୈୟା ଆଜି ଉକ୍ତ ପ୍ରସଙ୍ଗରେ ଏକ ଟିପ୍ପଣୀ ରଖି କହିଛନ୍ତି ଯେ କର୍ଣ୍ଣାଟକରେ ଏବେ ମୁଖ୍ୟମନ୍ତ୍ରୀ ପଦ ଖାଲି ନାହିଁ। ସିଦ୍ଦରମୈୟା କହିଛନ୍ତି, ମୁଁ ୫ ବର୍ଷର କାର୍ଯ୍ୟକାଳ ଶେଷ କରିବି।  ପରବର୍ତ୍ତୀ ନିର୍ବାଚନ ମୋ ନେତୃତ୍ବରେ ହେବ।  ଜାତୀୟ ରାଜନୀତି ପାଇଁ ମୋର ଲକ୍ଷ୍ୟ ନାହିଁ। କର୍ଣ୍ଣାଟକରେ ମୁଁ ସବୁଦିନ ପାଇଁ ରହିବି ବୋଲି ସିଦ୍ଦରମୈୟା ଦୃଢ଼ୋକ୍ତି ବାଢ଼ିଛନ୍ତି। ଉଲ୍ଲେଖଯୋଗ୍ୟ, ଗତ ସପ୍ତାହରେ ସିଦ୍ଦରମୈୟା କହିଥିଲେ କଂଗ୍ରେସ ଦଳ ଏକତ୍ରିତ ଅଛି ଏବଂ କଂଗ୍ରେସ ନେତୃତ୍ବାଧୀନ ସରକାର ୫ ବର୍ଷ ପର୍ଯ୍ୟନ୍ତ କ୍ଷମତାରେ ରହିବ। ସିଦ୍ଦରମୈୟା ୫ ବର୍ଷ ପର୍ଯ୍ୟନ୍ତ ମୁଖ୍ୟମନ୍ତ୍ରୀ ରହିବେ କି ବୋଲି ଏକ ପ୍ରଶ୍ନର ଉତ୍ତର ଦେଇ ସେ କହିଛନ୍ତି, ହଁ ମୁଁ ରହିବି।

ଏଥିରେ ଏତେ ସନ୍ଦେହ କାହିଁକି? ଚଳିତ ବର୍ଷ ଶେଷ ଆଡ଼କୁ କର୍ଣ୍ଣାଟକରେ ମୁଖ୍ୟମନ୍ତ୍ରୀ ବଦଳିବେ ବୋଲି ରାଜନୈତିକ ମହଲ,  ବିଶେଷ କରି ଶାସକ କଂଗ୍ରେସ ଦଳରେ ଚର୍ଚ୍ଚା ହେଉଛି। ସିଦ୍ଦରମୈୟା ଏବଂ ଉପମୁଖ୍ୟମନ୍ତ୍ରୀ ଡିକେ ଶିବକୁମାରଙ୍କ ମଧ୍ୟରେ କ୍ଷମତା ଭାଗବଣ୍ଟା ପ୍ରସଙ୍ଗରୁ ଏହି ଚର୍ଚ୍ଚା ହେଉଥିବା କୁହାଯାଉଛି।   ଆଜି ସିଦ୍ଦରମୈୟା ଓ ଶିବକୁମାର ନେତୃତ୍ବ ପ୍ରସଙ୍ଗରେ ଆଲୋଚନା ପାଇଁ ଦିଲ୍ଲୀରେ ରାହୁଲ ଗାନ୍ଧୀଙ୍କ ସହ ପୃଥକ ବୈଠକ ପାଇଁ ପହଞ୍ଚିଥିବା ଜଣାପଡ଼ିଛି।  ରାଜ୍ୟରେ ନେତୃତ୍ବ ସଙ୍କଟ ନାହିଁ, କେବଳ ରାଜନୈତିକ ହଟଚମଟ ପାଇଁ   ବିଜେପି ମିଛ ପ୍ରସାର କରୁଛି ବୋଲି ସିଦ୍ଦରମୈୟା କହିଛନ୍ତି।