ମସ୍କୋ : ୟୁକ୍ରେନକୁ ଦୂରଗାମୀ ରକେଟ ସିଷ୍ଟମ ପ୍ରଦାନ କରିବାକୁ ଆମେରିକାର ଘୋଷଣା କରିବା ପରେ ସ୍ଥିତି ପୁଣି ଜଟିଳ ହୋଇଛି । ଆମେରିକାକୁ ଜବାବ ଦେଇ ରୁଷ କହିଛି ଯେ ତାହାର ନ୍ୟୁକ୍ଲିଅର ଫୋର୍ସ ବା ଆଣବିକ ବାହିନୀ ପ୍ରସ୍ତୁତ ରହିଛି ।
Sambad is now on WhatsApp
Join and get latest news updates delivered to you via WhatsApp
ରୁଷର ପ୍ରତିରକ୍ଷା ମନ୍ତ୍ରାଳୟ ପକ୍ଷରୁ କୁହାଯାଇଛି ଯେ ଏହାର ଆଣବିକ ଫୋର୍ସ ଇଭାନୋଭୋ ରାଜ୍ୟରେ ଆଣବିକ ଆକ୍ରମଣର ଅଭ୍ୟାସ କରିଛି । ୟାର୍ସ ଅନ୍ତଃମହାଦେଶୀୟ ବାଲିଷ୍ଟକ କ୍ଷେପଣାସ୍ତ୍ର ବ୍ୟବହାର କରି ଏହି ଅଭ୍ୟାସ କରାଯାଇଥିଲା ଓ ଏଥିରେ ପ୍ରାୟ ୧ ହଜାର ସୈନ୍ୟ ଓ ୧୦୦ରୁ ଅଧିକ ସାମରିକ ଯାନକୁ ନିୟୋଜିତ କରାଯାଇଥିଲା । ତେବେ ଆମେରିକାର ନାଁ ନ ନେଇ ରୁଷ ଏହି ବୟାନ ଜାରି କରିଛି ।
ରୁଷର ଜଣେ ସେନା ଅଧିକାରୀ କହିଛନ୍ତି ଯେ ଜିରକନ ହାଇପରସୋନିକ କ୍ଷେପଣାସ୍ତ୍ରର ସଫଳ ପରୀକ୍ଷଣ ଶେଷ ହୋଇଛି । ଏହି କ୍ଷେପଣାସ୍ତ୍ରକୁ ଚଳିତ ବର୍ଷ ଶେଷସୁଦ୍ଧା ନଦର୍ଣ୍ଣ ଫ୍ଲିଟର ଏକ ଜାହାଜରେ ଏହାକୁ ମୁତୟନ କରାଯିବ । ଏହି ଅମୋଘ ଅସ୍ତ୍ରକୁ କୌଣସି ବାୟୁ ପ୍ରତିରୋଧ ବ୍ୟବସ୍ଥା ଅଟକାଇ ପାରିବ ନାହିଁ ବୋଲି ରୁଷ ଦାବି କରିଛି ।
ଆଜି ଆମେରିକା ରାଷ୍ଟ୍ରପତି ଜୋ ବାଇଡେନ ଘୋଷଣା କରିଥିଲେ ଯେ ତାଙ୍କ ଦେଶ ୟୁକ୍ରେନକୁ ଦୂରଗାମୀ ରକେଟ ସିଷ୍ଟମ ପ୍ରଦାନ କରିବ । ଏହାକୁ ବ୍ୟବହାର କରି ୟୁକ୍ରେନ ରୁଷର ଆଭ୍ୟନ୍ତରୀଣ ଅଂଚଳକୁ ଏପରିକି ମସ୍କୋକୁ ଟାର୍ଗେଟ୍ କରିପାରିବ ।