ଯୋଗୀରାଜଙ୍କ ନିର୍ମିତ ମୂର୍ତ୍ତି ଗର୍ଭଗୃହରେ ସ୍ଥାପିତ ହେବ

ଅଯୋଧ୍ୟା: ଅଯୋଧ୍ୟାରେ ପ୍ରଭୁ ଶ୍ରୀରାମଙ୍କ ଜନ୍ମଭୂମିରେ ନିର୍ମିତ ଭବ୍ୟ ମନ୍ଦିର ଆଗାମୀ ୨୨ ତାରିଖରେ ଉଦ୍‌ଘାଟନ ହେବାକୁ ଯାଉଛି। ମନ୍ଦିରର ଗର୍ଭଗୃହରେ ପ୍ରତିଷ୍ଠା ହେବାକୁ ଥିବା ଭଗବାନ ରାମଲାଲାଙ୍କ ମୂର୍ତ୍ତି ମଧ୍ୟ ଚୂଡ଼ାନ୍ତ ହୋଇଛି। କର୍ଣ୍ଣାଟକର ପ୍ରସିଦ୍ଧ ମୂର୍ତ୍ତିଶିଳ୍ପୀ ଅରୁଣ ଯୋଗୀରାଜଙ୍କ ଦ୍ୱାରା ନିର୍ମିତ ‘ରାମଲାଲା’ ମୂର୍ତ୍ତି ହିଁ ଗର୍ଭଗୃହରେ ସ୍ଥାପନ କରାଯିବ।

କେନ୍ଦ୍ରମନ୍ତ୍ରୀ ପ୍ରହ୍ଲାଦ ଯୋଶୀ ନିଜ ସୋସିଆଲ ମିଡିଆ ହ୍ୟାଣ୍ଡେଲରେ କହିଛନ୍ତି, ହନୁମାନଙ୍କ ଭୂମିର ଜଣେ ପ୍ରସିଦ୍ଧ ମୂର୍ତ୍ତି ନିର୍ମାତାଙ୍କ କୃତିକୁ ଜାନୁଆରି ୨୨ରେ ଗୌରବମୟ ସ୍ଥାନ ମିଳିବାକୁ ଯାଉଛି। କର୍ଣ୍ଣାଟକରେ ଏକ ଭବ୍ୟ ହନୁମାନ ମନ୍ଦିର ଅଛି ଏବଂ ଏହା ହନୁମାନଙ୍କ ଜନ୍ମସ୍ଥାନ ବୋଲି ବିବେଚନା କରାଯାଏ। ଯୋଶୀ ରାମମନ୍ଦିର ପାଇଁ ରାଜ୍ୟର ଜଣେ କାରିଗରଙ୍କ ଦ୍ୱାରା ଆକୃତିପ୍ରାପ୍ତ ମୂର୍ତ୍ତି ଚୟନକୁ ‘ରାମ-ହନୁମାନଙ୍କ ଅତୁଟ ସମ୍ପର୍କର ଏକ ଉଦାହରଣ’ ବୋଲି ବର୍ଣ୍ଣନା କରିଛନ୍ତି। ପୁଅର ମୂର୍ତ୍ତି ଚୟନ ହୋଇଥିବାରୁ ଯୋଗୀରାଜ ଅରୁଣଙ୍କ ମାଆ ଆନନ୍ଦ ପ୍ରକାଶ କରିଛନ୍ତି।

ଅଯୋଧ୍ୟାରେ ରାମଲାଲାଙ୍କ ଅଭିଷେକ ପାଇଁ ବୈଦିକ ରୀତିନୀତିର ମୁଖ୍ୟ ସମାରୋହ ଏକ ସପ୍ତାହ ପୂର୍ବରୁ ଜାନୁଆରି ୧୬ତାରିଖରୁ ଆରମ୍ଭ ହେବ। ବାରାଣସୀର ପୁରୋହିତ ଲକ୍ଷ୍ମୀକାନ୍ତ ଦୀକ୍ଷିତ ଜାନୁଆରି ୨୨ରେ ମନ୍ଦିର ପ୍ରତିଷ୍ଠା ଓ ମୂର୍ତ୍ତି ସ୍ଥାପନର ମୁଖ୍ୟ ରୀତିନୀତି ସମ୍ପାଦନ କରିବେ। ଜାନୁଆରି ୧୪ରୁ ୨୨ ପର୍ଯ୍ୟନ୍ତ ଅଯୋଧ୍ୟାରେ ଅମୃତ ମହୋତ୍ସବ ପାଳିତ ହେବ। ୧୦୦୮ ହୁଣ୍ଡି ମହାଯଜ୍ଞ ହେବ ଯେଉଁଥିରେ ହଜାର ହଜାର ଶ୍ରଦ୍ଧାଳୁଙ୍କୁ ଖାଇବାକୁ ଦିଆଯିବ। ଅଯୋଧ୍ୟାରେ ହଜାର ହଜାର ଶ୍ରଦ୍ଧାଳୁଙ୍କ ରହିବା ପାଇଁ ଅନେକ ଟେଣ୍ଟ ସିଟି ନିର୍ମାଣ କରାଯାଉଛି। ଶ୍ରୀରାମ ଜନ୍ମଭୂମି ଟ୍ରଷ୍ଟ ଅନୁଯାୟୀ, ୧୦ରୁ ୧୫ ହଜାର ଲୋକଙ୍କ ପାଇଁ ବ୍ୟବସ୍ଥା କରାଯିବ।