ମାଦ୍ରିଦ୍: ସ୍ପେନ ଦେଶରେ ଜିନିଷର ଦାମ୍ ବଢିବା ସହ ବେରୋଜଗାରୀ ହୁହୁ ହୋଇ ବଢିବାରେ ଲାଗିଛି । ଏହା ସହିତ ଯୁବଗୋଷ୍ଠୀଙ୍କ ସଂଖ୍ୟା ମଧ୍ୟ ବଢିବାରେ ଲାଗିଛି ଯେଉଁମାନେ ଚାକିରି କରିବା ସହିତ ନିଜ ମାତା ପିତାଙ୍କ ସହିତ ରହୁଛନ୍ତି । ଯୁବଗୋଷ୍ଠୀ ନିଜ ମାତା ପିତାଙ୍କ ସହିତ ରହିବାର କାରଣ ହେଉଛି ସେମାନେ ମହଙ୍ଗା ଘରଭଡା ଦେବାକୁ ଅସମର୍ଥ ଅଟନ୍ତି । ଏହାକୁ ନେଇ ସ୍ପେନ ସରକାର ଚିନ୍ତିତ ହୋଇ ପଡିଛନ୍ତି କାରଣ ଏପରି ସେମାନେ ମାତା ପିତାଙ୍କ ସହିତ ଗୋଟିଏ ଘରେ ରହିବା ଦ୍ଵାରା ନିଜେ ପରିବାର ବସେଇବା ବିଷୟରେ ଭାବି ପାରୁନାହାନ୍ତି ।
Sambad is now on WhatsApp
Join and get latest news updates delivered to you via WhatsApp
ସ୍ପେନର ଆବାସ ମନ୍ତ୍ରୀ ରାକେଲ ସାଞ୍ଚେଜ୍ କହିଛନ୍ତି, ଦେଶରେ ଯେଉଁ ମାନଙ୍କର ବାର୍ଷିକ ଆୟ ୨୪,୩୧୮ ୟୁରୋ (୨୦ ଲକ୍ଷ ୫୦ ହଜାର ଟଙ୍କା) ସେମାନେ ଆଗାମୀ ୨ ବର୍ଷ ପାଇଁ ଯେକୌଣସି ଆପାର୍ଟମେଣ୍ଟର ଭଡା ଦେବା ପାଇଁ ପ୍ରତିମାସରେ ୨୦ ହଜାର ଟଙ୍କାର ସବସିଡି ନେଇ ପାରିବେ । ସାଞ୍ଚେଜ୍ ପୁଣି କହିଛନ୍ତି, ଆପାର୍ଟମେଣ୍ଟର ଭଡା ଦେଇ ନପାରି ଯେପରି ଯୁବଗୋଷ୍ଠୀଙ୍କର ଭବିଷ୍ୟତ ନଷ୍ଟ ନହୁଏ ସେଥିପାଇଁ ସବସିଡି ଦିଆଯିବାକୁ ସ୍ଥିର କରା ହୋଇଛି ।
ତେବେ ସ୍ପେନର ସବୁଠାରୁ ବଡ ରିଅଲ ଇଷ୍ଟେଟ ଓ୍ଵେବସାଇଟ ଆଇଡିୟଲିଷ୍ଟାର ପ୍ରବକ୍ତା ଫ୍ରାନସିସ୍କୋ ଇନାରେଟା କହିଛନ୍ତି,ସରକାରଙ୍କ ଏହି ପଦକ୍ଷେପ ଯୋଗୁଁ କୌଣସି ଫାଇଦା ହେବ ନାହିଁ । କାରଣ, ସରକାର ଭଡା ପାଇଁ ଅର୍ଥ ଦେଲେ ଛୋଟ ଆପାର୍ଟମେଣ୍ଟ ଗୁଡିକର ଚାହିଦା ବଢିବ ଓ ଏହା ଦ୍ଵାରା ଆପାର୍ଟମେଣ୍ଟର ଭଡା ବଢିବାର ସମ୍ଭାବନା ଅଛି।
୨୦୨୦ ର ପରିସଂଖ୍ୟାନ ଅନୁଯାୟୀ ୨୫ରୁ ୨୯ ବର୍ଷର ୫୫ ପ୍ରତିଶତରୁ ଅଧିକ ଯୁବଗୋଷ୍ଠୀ ମାତାପିତାଙ୍କ ସହିତ ଏକାଠି ରହୁଛନ୍ତି । ୨୦୧୩ ମସିହା ତୁଳନାରେ ଏପରି ଯୁବଗୋଷ୍ଠୀଙ୍କ ସଂଖ୍ୟା ୬.୫ ପ୍ରତିଶତ ବଢିଛି । ସ୍ପେନରେ ବଢୁଥିବା ବେରୋଜଗାରୀ ସହିତ ଏହାର ସିଧା ସମ୍ବନ୍ଧ ରହିଛି । ସ୍ପେନରେ ୨୫ ବର୍ଷରୁ କମ ୨୯ ପ୍ରତିଶତ ଯୁବଗୋଷ୍ଠୀ ଏପରି ଅଛନ୍ତି ଯେଉଁମାନେ ବେରୋଜଗାର ଅଛନ୍ତି । ତେଣୁ ସ୍ପେନ ସରକାର କମ୍ ଆୟ କରୁଥିବା ବର୍ଗ ପାଇଁ କୋଭିଡ୍ ପାଣ୍ଠିରୁ ୧ ଆରବ ୟୁରୋ(୮୪୪୦ କୋଟ୍ ଟଙ୍କା) ଖର୍ଚ୍ଚ କରିବାକୁ ଘୋଷଣା କରିଛନ୍ତି ।