କାବୁଲରୁ ୧୫୦ ଭାରତୀୟଙ୍କ ଉଦ୍ଧାରର ରୋମାଞ୍ଚକର କାହାଣୀ : ଭାରତୀୟଙ୍କୁ ସୁରକ୍ଷା ଦେଇଥିଲା ତାଲିବାନ
ନୂଆଦିଲ୍ଲୀ : କାବୁଲ ସ୍ଥିତ ଭାରତୀୟ ଦୂତାବାସରେ ଥିବା ଭାରତୀୟ କର୍ମଚାରୀ ଓ ଯବାନମାନଙ୍କୁ ଭାରତ ସରକାର ସୁରକ୍ଷିତ ଭାରତ ଫେରାଇ ଆଣିଛନ୍ତି । ଭାରତ ସରକାର ଦୁଇଟି ମିଲିଟାରୀ ବିମାନରେ ପ୍ରାୟ ୨୦୦ ଭାରତୀୟ କର୍ମଚାରୀଙ୍କୁ ଭାରତ ନେଇଆସିଛନ୍ତି । କିନ୍ତୁ ଆଫଗାନିସ୍ତାନରେ ଚାଲିଥିବା ତାଲିବାନ ଆତଙ୍କ ମଧ୍ୟରେ ଏହି ଭାରତୀୟମାନଙ୍କୁ ଭାରତ ଫେରାଇ ଆଣିବା ଏକ ଚଳଚ୍ଚିତ୍ରର କାହାଣୀଠାରୁ କିଛି କମ୍ ରୋମାଞ୍ଚକର ନ ଥିଲା ।
Sambad is now on WhatsApp
Join and get latest news updates delivered to you via WhatsApp
କାବୁଲରେ ଅବସ୍ଥାପିତ ଥିବା ଭାରତୀୟ ରାଷ୍ଟ୍ରଦୂତ ରୁଦ୍ରେନ୍ଦ୍ର ଟଣ୍ଡନଙ୍କ ସୂଚନା ଅନୁସାରେ ସୋମବାରଦିନ ୪୦ ଜଣ ଭାରତୀୟଙ୍କୁ ସଫଳତାର ସହ ଭାରତ ଅଣାଯାଇଥିଲା । ଦ୍ବିତୀୟ ଦିନ ଅର୍ଥାତ ମଙ୍ଗଳବାରଦିନ ୧୫୦ ଜଣ ଭାରତୀୟ କର୍ମଚାରୀଙ୍କୁ ଅଣାଯିବାର ଥିଲା । ସେମାନଙ୍କ ମଧ୍ୟରେ ନିଜେ ଟଣ୍ଡନ ମଧ୍ୟ ଥିଲେ । ଭାରତୀୟ ଦୂତାବାସରୁ କାବୁଲ ହମିଦ କାର୍ଜାଇ ଅନ୍ତର୍ଜାତୀୟ ଏୟାରପୋର୍ଟ ପ୍ରାୟ ୫ କିଲୋମିଟର ଦୂର । ୧୫୦ ଜଣ ଭାରତୀୟଙ୍କୁ ସେଠାକୁ ନେବା ଲାଗି ମଧ୍ୟ ରାତ୍ରିରେ ପ୍ରାୟ ଦୁଇ ଡଜନ ଗାଡ଼ିର ବ୍ୟବସ୍ଥା କରାଯାଇଥିଲା । କିନ୍ତୁ କିଛି ବାଟ ଗଲା ପରେ ତାଲିବାନ ପକ୍ଷରୁ ଗାଡ଼ିଗୁଡ଼ିକୁ ଅଟକା ଯାଇଥିଲା । ସେମାନେ ଭାରତୀୟ ଲୋକମାନଙ୍କୁ ଛାଡ଼ିବାକୁ ମନାକରିଦେଇଥିଲେ ଓ ଦୂତାବାସକୁ ଫେରିଯିବାକୁ ବାଧ୍ୟ କରିଥିଲେ । ଏହା ଜାଣିବା ପରେ ଭାରତ ସରକାର ଗୋପନରେ ତାଲିବାନ ସହ ଆଲୋଚନା କରିଥିଲେ । ଏହା ପରେ ହିଁ ସେମାନେ ଭାରତୀୟ ଦଳକୁ ଛାଡ଼ିବାକୁ ରାଜି ହୋଇଥିଲେ । କେବଳ ଏତିକି ନୁହେଁ ଭାରତୀୟ ଦଳକୁ ସୁରକ୍ଷିତ ଏୟାରପୋର୍ଟରେ ପହଞ୍ଚାଇବାକୁ ତାଲିବାନ ପକ୍ଷରୁ କେତେକ ବନ୍ଧୁକଧାରୀ ସୁରକ୍ଷା କର୍ମୀଙ୍କୁ ପଠାଇଥିଲେ । ଭାରତୀୟ ଗାଡ଼ିଗୁଡ଼ିକ ଏୟାରପୋର୍ଟରେ ପହଞ୍ଚିବା ପର୍ଯ୍ୟନ୍ତ ସେମାନେ ସୁରକ୍ଷା ଦେଇଚାଲିଥିଲେ । ଏପରିକି ବାଟରେ ପ୍ରବଳ ଜନଗହଳିକୁ ହଟାଇବାକୁ ତାଲିବାନ ପକ୍ଷରୁ ଗୁଳିଚାଳନା କରାଯାଇଥିଲା । ଭାରତୀୟ ଦଳ ଏୟାରପୋର୍ଟରେ ପହଞ୍ଚିବା ପରେ ତାଲିବାନର ଯୋଦ୍ଧାମାନେ ଫେରିଯାଇଥିଲେ ।