ତାଲିବାନ ନିଜର ବାୟୁସେନା ଗଠନ କରିବ
କାବୁଲ: ପ୍ରାୟ ତିନିମାସ ତଳେ ଆଫଗାନିସ୍ତାନ ଅଧିକାର କରିଥିବା ତାଲିବାନ ନିଜର ଏକ ବାୟୁସେନା ଗଠନ କରିବାକୁ ଇଚ୍ଛା ପ୍ରକାଶ କରିଛି। ତାଲିବାନ ପଦାଧିକାରୀ କହିଛନ୍ତି ଯେ ସେମାନେ ପୂର୍ବ ଆଫଗାନ ସରକାରଙ୍କ ବାୟୁସେନାକୁ ପୁନରୁଜ୍ଜୀବିତ କରିବାକୁ ଚାହାନ୍ତି। ଯେଉଁ ପେସାଦାରମାନେ ପୂର୍ବ ସରକାରରେ ବାୟୁସେନାରେ ଚାକିରି କରିଥିଲେ ସେମାନଙ୍କୁ ଫେରାଇ ଆଣିବା ଓ ପୁନର୍ନିଯୁକ୍ତି ଦେବାର ବ୍ୟବସ୍ଥା କରାଯିବ। ‘ଆମର ବାୟୁସେନା ଦରକାର ଏବଂ ଆମେ ଯେକୌଣସି ପ୍ରକାରେ ଏହା ହାସଲ କରିବୁ’ ବୋଲି ତାଲିବାନ ଆଭ୍ୟନ୍ତରୀଣ ବ୍ୟାପାର ମନ୍ତ୍ରୀ କାରୀ ସଇଦ ଖୋଷ୍ଟି କହିଛନ୍ତି। ଆଉ ଜଣେ ତାଲିବାନ ଅଧିକାରୀ କହିଛନ୍ତି ଯେ, ଏକ ପୂର୍ଣ୍ଣାଙ୍ଗ ବାୟୁସେନା ଖୁବ୍ ଶୀଘ୍ର ଗଠନ ହେବାକୁ ଯାଉଛି, ଏଥିରେ ସନ୍ଦେହ ନାହିଁ।
Sambad is now on WhatsApp
Join and get latest news updates delivered to you via WhatsApp
ତାଲିବାନମାନେ କାବୁଲ ଦଖଲ କରିବା ପୂର୍ବରୁ ଆଫଗାନ ବାୟୁସେନାରେ ୨୦୦ରୁ ଅଧିକ ବିମାନ ଥିଲା। ଆମେରିକା ସୈନ୍ୟମାନେ କାବୁଲ ଛାଡ଼ି ଯିବା ପୂର୍ବରୁ ସେଗୁଡ଼ିକୁ ଖରାପ କରିଦେଇ ଯାଇଥିଲେ। ତାଲିବାନଙ୍କ ମଧ୍ୟରେ ଦକ୍ଷ ଇଂଜିନିୟର ଓ ବୈମାନିକ ନ ଥିବାରୁ ସେମାନେ ସେଗୁଡ଼ିକ ସଜାଡ଼ିପାରୁ ନାହାନ୍ତି କି ବ୍ୟବହାର କରିପାରୁ ନାହାନ୍ତି।