ଥାଇ ରାଜକୁମାରୀ ୩ ସପ୍ତାହ ହେଲା ବେହୋସ

ବ୍ୟାଙ୍କକ : ଥାଇଲାଣ୍ଡର ରାଜକୁମାରୀ ବଜ୍ରକୀଟ୍ୟାଭା ଛାତିରେ ଯନ୍ତ୍ରଣା ହେତୁ ତଳେ ପଡ଼ିଯିବା ପରେ ତିନି ସପ୍ତାହରୁ ଅଧିକ କାଳ ହେଲା ସଂଜ୍ଞାହୀନା ଅବସ୍ଥାରେ ଅଛନ୍ତି। ୪୪ ବର୍ଷୀୟା ରାଜକୁମାରୀ ଯେ କି ରାଜସିଂହାସନର ସମ୍ଭାବ୍ୟା ଉତ୍ତରାଧିକାରିଣୀ, ତାଙ୍କର ଏପରି ସ୍ବାସ୍ଥ୍ୟାବସ୍ଥା ବିଷୟରେ ରାଜମହଲରୁ ସୂଚନା ଦିଆଯାଇଛି।

ରାଜକୁମାରୀ ବଜ୍ରକୀଟ୍ୟାଭା ହେଉଛନ୍ତି ଥାଇଲାଣ୍ଡର ରାଜା ମହାବଜ୍ରଲୋଙ୍ଗକର୍ଣ୍ଣଙ୍କ ଜ୍ୟେଷ୍ଠ ସନ୍ତାନ। ଦେଶର ସମ୍ବିଧାନ ଅନୁସାରେ ଜେଷ୍ଠ ସନ୍ତାନ ହିଁ ସିଂହାସନର ଉତ୍ତାଧିକାରୀ ହୋଇଥାନ୍ତି। ଡିସେମ୍ବର ୧୫ ତାରିଖରେ ସେ ମାଇକୋପ୍ଲାଜ୍‌ମା ସଂକ୍ରମଣ ୯ଏକ ପ୍ରକାର ଜୀବାଣୁ ସଂକ୍ରମଣ) ହେତୁ ପ୍ରଦାହଜନିତ ହାର୍ଟ ଆରିଦ୍‌ମିଆ (ହୃଦ୍‌ରୋଗ ବିଶେଷ ଯେଉଁଥିରେ ହୃଦୟର ମାଂସପେଶୀ ଅସ୍ବାଭାବିକ ଭାବେ ସଂକୁଚିତ ଓ ପ୍ରସାରିତ ହୁଏ) ରୋଗରେ ବେହୋସ୍ ହୋଇଯାଇଥିଲେ। ଏବେ ଡାକ୍ତରମାନେ ଆଣ୍ଟିବାୟୋଟିକ୍ସ ଇତ୍ୟାଦି ଔଷଧ ଦେଇ ତାଙ୍କର ଚିକିତ୍ସା କରୁଛନ୍ତି ଏବଂ କୃତ୍ରିମ ଯନ୍ତ୍ରପାତି ସାହାଯ୍ୟରେ ତାଙ୍କର ହୃଦୟ, ବୃକ୍କ ଓ ଫୁସ୍‌ଫୁସ୍‌କୁ ସଚଳ ରଖିଛନ୍ତି। ତଥାପି ଏବେ ସୁଦ୍ଧା ସେ ବେହୋସ୍ ଅଛନ୍ତି।