ନୂଆଦିଲ୍ଲୀ: ଭାରତୀୟ ଜନତା ପାର୍ଟି (ବିଜେପି) ବିଷୟରେ ଗୁରୁତ୍ୱପୂର୍ଣ୍ଣ ଖବର ନେଇ ଚର୍ଚ୍ଚା ଆରମ୍ଭ ହୋଇଛି। ରାଷ୍ଟ୍ରୀୟ ଅଧକ୍ଷ ଜେପି ନଡ୍ଡା ତାଙ୍କ ପଦରୁ ଇସ୍ତଫା ଦେବା ନେଇ ଆଲୋଚନା ହେଉଛି। ତାଙ୍କ ସ୍ଥାନରେ ମଧ୍ୟପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନ ଭାର ସମ୍ଭାଳିବା ପାଇଁ ଦିଲ୍ଲୀ ଡକାଯାଇପାରେ ବୋଲି କୁହାଯାଉଛି। ଶିବରାଜ ସିଂ ବିଦିଶା ଲୋକସଭା ଆସନରେ କଂଗ୍ରେସର ଭାନୁ ପ୍ରତାପ ଶର୍ମାଙ୍କୁ ପରାସ୍ତ କରିଛନ୍ତି।
![Sambad Whatsapp](https://cdn-icons-png.flaticon.com/512/2504/2504957.png)
Sambad is now on WhatsApp
Join and get latest news updates delivered to you via WhatsApp
୨୦୨୪ଲୋକସଭା ନିର୍ବାଚନ ପ୍ରଚାର ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶିବରାଜ ସିଂଙ୍କ ପାଇଁ ଏକ ପ୍ରମୁଖ ଭୂମିକା ବିଷୟରେ ସୂଚନା ଦେଇଥିଲେ ଏବଂ ତାଙ୍କର ଅତୀତର ସହଯୋଗକୁ ମନେ ପକାଇ ଦିଲ୍ଲୀରେ ତାଙ୍କ ସହ କାମ କରିବାକୁ ଇଚ୍ଛା ପ୍ରକାଶ କରିଥିଲେ। ଶିବରାଜ ସିଂ ଉଭୟ ଶାସନ ତଥା ଦଳ ସଂଗଠନରେ ଅଭିଜ୍ଞ, ସେ ମଧ୍ୟପ୍ରଦେଶର ମୁଖ୍ୟମନ୍ତ୍ରୀ ଭାବରେ ଦୀର୍ଘତମ କାର୍ଯ୍ୟକାଳର ରେକର୍ଡ ରଖିଛନ୍ତି। ୨୦୨୩ ବିଧାନସଭା ନିର୍ବାଚନରେ ବିଜେପିର ସଫଳତାରେ ତାଙ୍କର ଲାଡ୍ଲି ବେହନା ଯୋଜନା ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲା। ଆରଏସଏସ ସହିତ ଶିବରାଜ ସିଂଙ୍କର ଗଭୀର ସମ୍ପର୍କ ରହିଛି, ସେ ୧୯୭୨ ମସିହାରେ ୧୩ ବର୍ଷ ବୟସରେ ସଂଗଠନରେ ଯୋଗ ଦେଇଥିଲେ।
ସେ ଅଧିକାଂଶ ସମୟ ଅଖିଲ ଭାରତୀୟ ବିଦ୍ୟା ପରିଷଦ (ଏବିଭିପି) ସହ ବିତାଇଥିଲେ ଏବଂ ଭାରତୀୟ ଜନତା ଯୁବ ମୋର୍ଚ୍ଚାର ଜାତୀୟ ସଭାପତି ଭାବରେ ମଧ୍ୟ କାର୍ଯ୍ୟ କରିଥିଲେ। ଜୁନ୍ ୩୦ ରେ ଜେପି ନଡ୍ଡାଙ୍କ କାର୍ଯ୍ୟକାଳ ଶେଷ ହେବା ପରେ ବିଜେପି ଖୁବ୍ ଶୀଘ୍ର ଏହାର ନୂତନ ଜାତୀୟ ଅଧ୍ୟକ୍ଷଙ୍କ ନାମ ଘୋଷଣା କରିବ ବୋଲି ଆଶା କରାଯାଉଛି। ଲୋକସଭା ନିର୍ବାଚନରେ ଦଳର ପ୍ରଦର୍ଶନ ପରେ କର୍ମୀଙ୍କ ମନୋବଳ ବୃଦ୍ଧି କରିବାକୁ ଏହି ପଦକ୍ଷେପ ନିଆଯାଇଛି।
ତେବେ ନଡ୍ଡାଙ୍କୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ୩.୦ କ୍ୟାବିନେଟ୍ରେ ସାମିଲ କରିବା ନେଇ କଳ୍ପନାଜଳ୍ପନା ପ୍ରକାଶ ପାଇଛି। ପୂର୍ବରୁ ଦଳର ରାଷ୍ଟ୍ରୀୟ ଅଧ୍ୟକ୍ଷ ପଦରୁ ଇସ୍ତଫା ପ୍ରଦାନ କରି ଅମିତ ଶାହ ମୋଦୀଙ୍କ ୨.୦ କ୍ୟାବିନେଟରେ ଗୃହମନ୍ତ୍ରୀ ହୋଇଥିଲେ। ଏବେ ନଡ୍ଡା ମଧ୍ୟ ସମାନ ଧାରାରେ କ୍ୟାବିନେଟ୍ରେ ସାମିଲ ହୋଇ ପାରନ୍ତି ବୋଲି ରାଜନୈତିକ ମହଲରେ ଚର୍ଚ୍ଚା ହେଉଛି।