ଡିଜିଏମ୍ଓସ୍ତରୀୟ ଆଲୋଚନା ହେବ ନାହିଁ; ଅସ୍ତ୍ରବିରତି ଚୁକ୍ତିର ନିର୍ଦ୍ଦିଷ୍ଟ ଅବଧି ନାହିଁ: ଭାରତୀୟ ସେନା

ନୂଆଦିଲ୍ଲୀ: ଭାରତ-ପାକିସ୍ତାନ ଅସ୍ତ୍ରବିରତି ଆଜି ଶେଷ ହୋଇଥିବା ବେଳେ ଏହାକୁ ନେଇ ତତ୍କାଳ  ସାମରିକ ଅପରେସନ୍ ମହାନିର୍ଦେଶକ (ଡିଜିଏମ୍‌ଓ)ସ୍ତରୀୟ ଆଲୋଚନା ହେବନାହିଁ ବୋଲି ଜଣାପଡ଼ିଛି। ଭାରତ-ପାକ୍‌ ଅସ୍ତ୍ରବିରତି ସଂକ୍ରାନ୍ତ ଆଲୋଚନା ନେଇ  କଳ୍ପନାଜଳ୍ପନା ଚାଲିଥିବା ବେଳେ ଭାରତୀୟ ସେନା ଏକ ସ୍ପଷ୍ଟୀକରଣ ଜାରି କରି କହିଛି ଯେ ଆଜି କୌଣସି ଡିଜିଏମ୍‌ଓ-ସ୍ତରୀୟ ଆଲୋଚନା ହେବାର କାର୍ଯ୍ୟକ୍ରମ ନାହିଁ।

ସୂଚନାଯୋଗ୍ୟ, ଚାରି ଦିନ ଧରି ସୀମାପାର ଡ୍ରୋନ୍ ଓ କ୍ଷେପଣାସ୍ତ୍ର ଆକ୍ରମଣ ପରେ ସଂଘର୍ଷର ଅନ୍ତ ଘଟାଇବା ପାଇଁ ଭାରତ ଓ ପାକିସ୍ତାନ ମଧ୍ୟରେ ଦୁଇ ଥର ବୁଝାମଣା ହୋଇଥିଲା।  ତେବେ ଏହି ବୁଝାମଣା କେବଳ ୧୮ ତାରିଖ  ପର୍ଯ୍ୟନ୍ତ  ବୋଲି ପାକ୍‌ ବିଦେଶ ମନ୍ତ୍ରୀ ନିକଟରେ କହିଥିଲେ। ଆଜି ଏହି ଅବଧି ଶେଷ ହୋଇଥିବା ବେଳେ ଅସ୍ତ୍ରବିରତିକୁ ନେଇ ସେନା ସ୍ପଷ୍ଟ କରିଛି ଯେ, ମେ ୧୨ରେ ଡିଜିଏମ୍ଓ-ସ୍ତରୀୟ ଆଲୋଚନା ହୋଇଥିଲା ଏବଂ ଶତ୍ରୁତା ବନ୍ଦ କରିବା ପାଇଁ ହୋଇଥିବା ଚୁକ୍ତିର ‘କୌଣସି ଅବଧି ନାହିଁ’।

ଏକ ସପ୍ତାହ ଧରି ଚାଲିଥିବା ତୀବ୍ର ସଂଘର୍ଷ ପରେ ମେ ୧୦ ତାରିଖରେ ଉଭୟ ପକ୍ଷ ପୂର୍ଣ୍ଣ ଅସ୍ତ୍ରବିରତି ପାଇଁ ରାଜି ହେବାର ଦୁଇ ଦିନ ପରେ ଉଭୟ ଦେଶର ଡିଜିଏମ୍‌ଓଙ୍କ ମଧ୍ୟରେ ପାଖାପାଖି ୪୫ ମିନିଟ୍‌ର କଥାବାର୍ତ୍ତା ହୋଇଥିଲା। ପାକିସ୍ତାନର ଡିଜିଏମ୍‌ଓ ମେଜର ଜେନେରାଲ କାଶିଫ ଅବଦୁଲ୍ଲା ଏବଂ ତାଙ୍କ ଭାରତୀୟ ପ୍ରତିପକ୍ଷ ଲେଫ୍ଟନାଣ୍ଟ ଜେନେରାଲ ରାଜୀବ ଘାଇ ହଟ୍‌ଲାଇନ୍‌ରେ କଥା ହୋଇଥିଲେ। ଭାରତୀୟ ସେନାର ଏକ ବିବୃତି ଅନୁଯାୟୀ, ଉଭୟ ପକ୍ଷ  ଗୁଳି ଚଳାଇବାରୁ ଦୂରେଇ ରହିବା ସମେତ ଆକ୍ରମଣାତ୍ମକ ଓ ପ୍ରତିକୂଳ କାର୍ଯ୍ୟରୁ ଦୂରେଇ ରହିବା ପାଇଁ  ପ୍ରତିବଦ୍ଧତା ଦୋହରାଇଛନ୍ତି।  ସୈନ୍ୟ ମୁତୟନ ହ୍ରାସ କରିବା ପାଇଁ  ମଧ୍ୟ ସହମତି ହୋଇଥିବା ଭାରତୀୟ ସେନା କହିଛି।