ଆଗାମୀ ଦୁଇ ସପ୍ତାହ ବଡ଼ ଦୁର୍ଦ୍ଦଶାପୂର୍ଣ୍ଣ; ଅନେକ ମୃତ୍ୟୁ ହେବ: ଡୋନାଲଡ୍ ଟ୍ରମ୍ପ୍
ୱାସିଂଟନ୍: କରୋନାଭାଇରସ୍ ସଂକ୍ରମିତଙ୍କ ସଂଖ୍ୟା ଦ୍ରୁତ ବେଗରେ ବଢୁଥିବାରୁ ଆମେରିକା ବଡ଼ ଦୁର୍ଦ୍ଦଶାଜନକ ସପ୍ତାହ ଆଡ଼କୁ ମୁହାଁଉଛି ବୋଲି ଶୁକ୍ରବାର ଦିନ ଆମେରିକାର ରାଷ୍ଟ୍ରପତି ଡୋନାଲଡ୍ ଟ୍ରମ୍ପ୍ କହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ମହାମାରୀ କରୋନାଭାଇରସ ସଂକ୍ରାନ୍ତ ଦୈନିକ ସୂଚନା ଦେବା ସମୟରେ ଗମ୍ଭୀର ହୋଇ ସେ କହିଲେ, ଦୁଃଖର ବିଷୟ, ଗୁଡ଼ାଏ ମୃତ୍ୟୁ ହେବ । ଅନେକ ମୃତ୍ୟୁ ।
ଟ୍ରମ୍ପଙ୍କ ସାଥିରେ ଥିଲେ ଉପରାଷ୍ଟ୍ରପତି ମାଇ ପେନସ୍, ଭାଇରସ୍ ଟାସ୍କ ଫୋର୍ସ କୋଅର୍ଡିନେଟର୍ ଡାକ୍ତର ଦେବୋରା ବ୍ରିକ୍ସ୍ ଏବଂ ଡାକ୍ତର ଆନ୍ଥୋନି ଫଅକି । ଛୋଟିଆ ମଞ୍ଚରେ ସଭିଏଁ ପରସ୍ପର ଠାରୁ ଦୂରଛଡ଼ା ହୋଇ ଠିଆ ହୋଇଥିଲେ ।
ଏହା ପୂର୍ବରୁ ପ୍ରତ୍ୟେକ ରାଜ୍ୟରେ ଯଥେଷ୍ଟ ପରିମାଣର ଗୁରୁତ୍ୱପୂର୍ଣ୍ଣ ଡାକ୍ତରୀ ସାମଗ୍ରୀ ମହଜୁଦ ରଖିବା ହେଉଛି ଆମର ଲକ୍ଷ୍ୟ ବୋଲି ଟ୍ରମ୍ପ୍ କହିଛନ୍ତି । ସେ ଆହୁରି ମଧ୍ୟ କହିଛନ୍ତି ଯେ ବାସ୍ତବ ଆବଶ୍ୟକତା ଠାରୁ ରାଜ୍ୟମାନେ ଅଧିକ ଡାକ୍ତରୀ ସାମଗ୍ରୀ ମାଗୁଛନ୍ତି । ଆଗକୁ ଅଭାବ ଆଂଶଙ୍କାରେ ରାଜ୍ୟମାନେ ଅଧିକ ସାମଗ୍ରୀ ପାଇଁ ଅନୁରୋଧ କରୁଛନ୍ତି ।
କିନ୍ତୁ, ରାଷ୍ଟ୍ରପତି ଟ୍ରମ୍ପ ଗୁରୁତ୍ୱାରୋପ କରି କହିଲେ ଯେ କେତେକ ପ୍ରତିରକ୍ଷାମୂଳକ ପଦକ୍ଷେପ ଗ୍ରହଣ କଲେ ମୃତ୍ୟୁସଂଖ୍ୟା କମାଇ ହେବ । ରାଷ୍ଟ୍ରପତିଙ୍କୁ ସମର୍ଥନ କରି କରୋନାଭାଇରସ୍ ଟାସ୍କ ଫୋର୍ସର ଅନ୍ୟତମ ସଦସ୍ୟା ଡାକ୍ତର ମେରି ଇ. ବର୍ଚ କହିଲେ ଯେ ଏହି ଦୁଇ ସପ୍ତାହ ମଧ୍ୟରେ ଲୋକେ ରାଷ୍ଟ୍ରପତିଙ୍କ ମାର୍ଗଦର୍ଶିକା ଅନୁଯାୟୀ ଚଳିବା ଆବଶ୍ୟକ । ସେମିତି ହେଲେ ମୃତ୍ୟୁସଂଖ୍ୟା କିଛି ପରିମାଣରେ ହ୍ରାସ କରାଯାଇ ପାରିବ ।