ଆହତ ହୋଇ ମଧ୍ୟ ଖାଲି ହାତରେ ୪ ସଶସ୍ତ୍ର ମାଓବାଦୀଙ୍କ ସହ ଲଢିଲେ ଏହି କମାଣ୍ଡୋ 

ନାଗପୁର:  ମହାରାଷ୍ଟ୍ର ପୁଲିସର ସ୍ୱତନ୍ତ୍ର କମାଣ୍ଡୋ ବାହିନୀ ସି-୬୦ରେ କାର୍ଯ୍ୟରତ କମାଣ୍ଡୋ ୩୩ ବର୍ଷ ବୟସ୍କ ଗୋମଜୀ ମାତାମୀଙ୍କ ଅପୂର୍ବ ବୀରତ୍ୱ ଏବେ ସାରା ସୁରକ୍ଷା ବାହିନୀରେ ଚର୍ଚ୍ଚାର ବିଷୟ ହୋଇଛି । ଛୁରାମାଡରେ ଆହତ ଥିବା ସତ୍ତ୍ୱେ ଏକୁଟିଆ ଖାଲି ହାତରେ ସେ ୪ ଜଣ ମାଓବାଦୀଙ୍କ ସହ ଲଢିବା ସହ ସେମାନଙ୍କୁ ପଛଘୁଞ୍ଚା ଦେବାକୁ ବାଧ୍ୟ କରିଥିଲେ । କେବଳ ଏତିକି ନୁହେଁ ସେ ମାଓବାଦୀମାନେ ନେଇ ଯାଇଥିବା ନିଜର ସରକାରୀ ଏକେ୪୭ ରାଇଫଲକୁ ଉଦ୍ଧାର କରିବା ସହ ମାଓବାଦୀଙ୍କ ପାଖରେ ଥିବା ବନ୍ଧୁକକୁ ମଧ୍ୟ ଜବତ କରିପାରିଥିଲେ ।

ଘଟଣାଟି ଘଟିଥିଲା ମହାରାଷ୍ଟ୍ରର ମାଓ  ପ୍ରବଣ ଗଡ଼ଚିରୋଲି ଜିଲ୍ଲାର ଏଟାପଲ୍ଲୀ ତାଲୁକାସ୍ଥିତ ଜାମ୍ବିଆ ଗଟ୍ଟାଠାରେ ।  ନିଜର ସାଥୀମାନଙ୍କ ସହ ସ୍ଥାନୀୟ ଏକ ବଜାରରୁ ଫେରିବାବେଳେ ମାତାମୀ ନିଜର ଜଣେ ପୁରୁଣା ସହପାଠୀଙ୍କୁ ଭେଟିବାକୁ ବଜାରରେ କିଛି ସମୟ ରହିଗଲେ । ଏହି ସମୟରେ ତାଙ୍କୁ ଏକୁଟିଆ ପାଇ କିଛି ମାଓବାଦୀତାଙ୍କୁ ଘେରିବା ସହ ତାଙ୍କର ରାଇଫଲ ଛଡାଇନେଲେ ଓ ତାଙ୍କ ଅଣ୍ଟାରେ ଛୁରୀ ଭୁଷିଦେଲେ । କିନ୍ତୁ ଆହତ ହେବା ସତ୍ତ୍ୱେ ମାତାମା ସେମାନଙ୍କ ସହିତ ଲଢିବାକୁ ଲାଗିଲେ । ତାଙ୍କର ସମ୍ମୁଖୀନ ହୋଇନପାରି ୪ଜଣଯାକ ମାଓବାଦୀ ଉକ୍ତ ସ୍ଥାନରୁ ପଳାୟନ କରିଥିଲେ । ତେବେ ମାତାମୀ ମାଓବାଦୀଙ୍କଠାରୁ  ନିଜର ରାଇଫଲକୁ ଉଦ୍ଧାର କରିବାକୁ ସକ୍ଷମ ହେବା ସହ ମାଓବାଦୀଙ୍କ ବନ୍ଧୁକ ଓ ଜୀବନ୍ତ ଗୁଳି ଜବତ କରିଥିଲେ ।