ନିର୍ଭୟା କାଣ୍ଡ ପରେ ଉତ୍ତରପ୍ରଦେଶର ୨ଲକ୍ଷ ଯୁବତୀଙ୍କୁ ଅସଦାଚରଣ ବିରୋଧରେ ଲଢ଼ିବା ପାଇଁ ପ୍ରଶିକ୍ଷଣ ଦେଇ ସାରିଲେଣି ଏହି ଯୁବକ
ଗୋରଖପୁର : ୨୦୧୨ ଡିସେମ୍ବର ୧୬ରେ ଦିଲ୍ଲୀରେ ଜଣେ ପାରାମେଡିକାଲ ଛାତ୍ରୀଙ୍କ ସହ ଘଟିଥିବା ଗଣଦୁଷ୍କର୍ମ ଦେଶକୁ ଦୋହଲାଇ ଦେଇଥିଲା । ଚଳନ୍ତା ବସ୍ରେ ପୀଡ଼ିତାଙ୍କ ସହ ବର୍ବରତାର ସହ ଦୁଷ୍କର୍ମ କରିବା ସହ ତାଙ୍କ ପ୍ରେମିକଙ୍କୁ ନିସ୍ତୁକ ପିଟିଥିଲେ ଅଭିଯୁକ୍ତ । ତେବେ କିଛି ଦିନ ନିଜ ଜୀବନ ସହ ସଂଘର୍ଷ କରି ଆର ପାରିକୁ ଚାଲି ଯାଇଥିଲେ ପୀଡ଼ିତା । ଏହି ଘଟଣା ଦେଶର ପ୍ରତିଟି ନାଗରିକକୁ ଚିନ୍ତା କରିବାକୁ ବାଧ୍ୟ କରିଥିବା ବେଳେ କେବଳ ଚିନ୍ତା କରି ବସି ନ ଥିଲେ ଉତ୍ତରପ୍ରଦେଶର ଗୋରଖପୁରରେ ରହୁଥିବା ଅଭିଷେକ ଯାଦବ।
Sambad is now on WhatsApp
Join and get latest news updates delivered to you via WhatsApp
ମହିଳାମାନଙ୍କ ସୁରକ୍ଷାକୁ ଆଖି ଆଗରେ ରଖି ସେ ନିଜେ ଶିଖିଥିବା କୌଶଳକୁ ଅନ୍ୟକୁ ଶିଖାଇବା ପାଇଁ ନିଷ୍ପତ୍ତି ନେଇଥିଲେ । ଅଭିସେଲ୍ଫ୍ ପ୍ରୋଟେକ୍ସନ ଟ୍ରଷ୍ଟ ନାମରେ ଏକ ଏନ୍ଜିଓ ଖୋଲି ସେ ମହିଳା ଓ ଯୁବତୀମାନଙ୍କୁ ଆତ୍ମସୁରକ୍ଷା କରିବାର କୌଶଳ ଶିଖାଇବା ଆରମ୍ଭ କରିଥିଲେ । ଏ ପର୍ଯ୍ୟନ୍ତ ସେ ୨.୫ଲକ୍ଷ ମହିଳା ଓ ଯୁବତୀଙ୍କୁ ମାର୍ସଲ ଆର୍ଟର ଟ୍ରେନିଂ ଦେଇ ସାରିଥିବା ଜଣାପଡ଼ିଛି । ‘ମେରି ରକ୍ଷା ମେରି ହାଥୋଁ ମେଁ ହେ’ କାର୍ଯ୍ୟକ୍ରମ ଜରିଆରେ ଅଭିଷେକ ଟ୍ରେନିଂ ଦେଉଥିବା ଜଣାପଡ଼ିଛି ।
ଅଭିଷେକ ଜାପାନିଜ୍ ମାର୍ସଲ ଆର୍ଟ ଏକିଡୋରେ ଏକ୍ସପର୍ଟ ହୋଇଥିବା ବେଳେ ପ୍ରଥମେ ସେ ଉତ୍ତରପ୍ରଦେଶ ପୁଲିସକୁ ଟ୍ରେନିଂ ଦେଉଥିଲେ ବୋଲି ଜଣାପଡ଼ିଛି । ଏହାକୁ ଏବେ ସେ ମହିଳା ଓ ଯୁବତୀମାନଙ୍କୁ ଶିଖାଉଛନ୍ତି । ଅଭିଷେକଙ୍କ କହିବା ଅନୁଯାୟୀ, ୨୦୦୭ରେ ମୁଁ ଉତ୍ତରପ୍ରଦେଶ ପୁଲିସ କମାଣ୍ଡୋଙ୍କୁ ମାର୍ସଲ ଆର୍ଟ ଶିଖାଇବା ଆରମ୍ଭ କରିଥିଲି । କିନ୍ତୁ ୨୦୧୨ ଗଣଦୁଷ୍କର୍ମ ପରେ ମୁଁ ଏହାକୁ ରାଜ୍ୟର ସମସ୍ତ ମହିଳା ଓ ଯୁବତୀମାନଙ୍କୁ ଶିଖାଇବି ବୋଲି ଚିନ୍ତା କରିଥିଲି । ଯାହାଦ୍ୱାରା ସେମାନେ ଅଭିଯୁକ୍ତକୁ ଉଚିତ୍ ଜବାବ ଦେଇ ନିଜକୁ ରକ୍ଷା କରି ପାରିବେ । ତେବେ ଅଭିଷେକ ୨୦୦୨ରେ ମାର୍ସଲ ଆର୍ଟ ଶିଖିବା ଆରମ୍ଭ କରିଥିବା ବେଳେ ବିଶ୍ୱସ୍ତରରେ ତାଙ୍କୁ କରାଟେରେ ସ୍ୱର୍ଣ୍ଣ ପଦକ ମିଳି ସାରିଥିବା ଜଣାପଡ଼ିଛି।